មេដឹកនាំបេឡារុសរត់រកជំនួយរុស្ស៊ី នៅពេលអាមេរិកអំពាវនាវឲ្យមានការចរចាជាមួយសង្គមស៊ីវិល
ប្រធានាធិបតីបេឡារុស លោកអាឡិចសង់ លូកាឆិនកូ Alexandre Loukachenko កាលពីថ្ងៃសៅរ៍ម្សិលមិញ បានស្វែងរកជំនួយគាំទ្រពីប្រធានាធិបតី រុស្ស៊ី នៅក្នុងខណៈពេលប្រទេសរបស់លោក កំពុងប្រឈមនឹងរលកបាតុកម្មប្រឆាំង របស់មហាជនបេឡារុស។ ចាប់តាំងពីថ្ងៃអាទិត្យចុងសប្តាហ៍មុន ប្រជាជនបេឡារុស រាប់ម៉ឺននាក់បានធ្វើបាតុកម្មតវ៉ាលទ្ធផលបោះឆ្នោត ដែលបានផ្តល់ជ័យជំនះទៅឲ្យលោកប្រធានាធិបតីផុតអាណត្តិ Alexandre Loukachenko ដែលបានកាន់អំណាចផ្តាច់ការ នៅ បេឡារុស អស់ រយៈពេល ២៦ឆ្នាំមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
មេដឹកនាំបេឡារុស លោក Alexandre Loukachenkoបានរត់រកជំនួយ ពីប្រធានាធិបតីរុស្ស៊ី ដើម្បីទប់ទល់នឹងរលកបាតុកម្មប្រឆាំង ដែលកាន់តែពុះកញ្ច្រោល ក្នុងប្រទេស។ នៅមុនកិច្ចសន្ទនាតាមទូរស័ព្ទ ជាមួយ ប្រមុខរដ្ឋរុស្ស៊ី លោកវ្លាឌីមៀរ ពូទីន កាលពីថ្ងៃសៅរ៍ ប្រធានាធិបតីបេឡារុសធ្លាប់បានពន្លយឲ្យដឹងថា បាតុកម្មប្រឆាំងនៅបេឡារុស នៅប៉ុន្មានថ្ងៃនេះ មានគោលដៅ បង្កអស្ថិរភាព បេឡារុស និងតំបន់ទាំងមូល។ មេដឹកនាំបេឡារុស បានលើកឡើងថា បាតុកម្មកំពុងបំផ្លាញ ចំណងសម្ព័ន្ធភាពរវាងបេឡារុស និងរុស្ស៊ី។
“បាតុកម្មតវ៉ា មិនមែន គំរាមកំហែងត្រឹមតែបេឡារុសប៉ុណ្ណោះទេ។ ការពារបេឡារុស គឺដូចជាការពារលំហ សហគមន៍រដ្ឋ អតីតសហភាពសូវៀត ដែលឈរនៅខាងភាគី រុស្ស៊ី យ៉ាងដូច្នេះឯង”។ នេះជាបញ្ជាក់របស់លោកប្រធានាធិបតីបេឡារុស។
នៅក្រោយ កិច្ចសន្ទនារវាងមេដឹកនាំទាំងពីរ វិមានក្រេមឡាំងបានចេញសេចក្តីថ្លែងការណ៍ ដែលថា ប្រធានាធិបតីរុស្ស៊ី ថ្លែងពីការជឿជាក់ដែលថា នឹងមានដំណោះស្រាយ ដ៏ឆាប់មួយសម្រាប់វិបត្តិនៅបេឡារុស។ សម្រាប់ក្រេមឡាំង អ្វីដែលសំខាន់ គឺមិនត្រូវឲ្យកម្លាំងបំផ្លាញ ពីបរទេស ឆ្លៀតកេងយកផលប្រយោជន៍ពីបញ្ហានៅបេឡារុស ដើម្បី បំផ្លាញ ទំនាក់ទំនង រុស្ស៊ី និងបេឡារុស។
ប្រធានាធិបតីបេឡារុសវិញបានលើកឡើងថា ប្រទេសរបស់លោកកំពុងប្រឈមនឹងបដិវត្តន៍ពណ៌ ដែលសំដៅ ដល់ចលនាទាមទាររបស់មហាជន គាំទ្រដោយបរទេស សម្រាប់ផ្លាស់ប្តូរមេដឹកនាំកាន់អំណាច នៅក្នុងបណ្តាប្រទេសអតីតសហភាពសូវៀត។
សហភាពអឺរ៉ុប អង្គការអូតង់ ប៉ូឡូញ និងលីទុយអានី ដែលបានផ្តល់ជំរកនយោបាយ ដល់មេដឹកនាំបក្សប្រឆាំង បេឡារុស បានអំពាវនាវឲ្យមានការចរចានយោបាយ រវាងភាគីជម្លោះ ដើម្បី ដោះស្រាយវិបត្តិជាប់គាំង នៅបេឡារុស។ នៅថ្ងៃសៅរ៍ម្សិលមិញ នៅក្នុងសន្និសីទកាសែតរួមគ្នាជាមួយភាគីប៉ូឡូញ ប្រមុខការទូតអាមេរិកលោក Mike Pompeo បានសំដែងការគាំទ្រ ដល់ប្រជាជនបេឡារុស និងអំពាវនាវឲ្យមេដឹកនាំបេឡារុសចរចាជាមួយ សង្គមស៊ីវិល ដែលជាការចង់បានរបស់ប្រជាជនបេឡារុស។
ប្រមុខដឹកនាំបក្សប្រឆាំង លោកស្រី Svetlana Tikhanoskaïa ដែលបានរត់ភៀសខ្លួន ទៅប្រទេសលីទុយអានី នៅក្រោយ ការបោះឆ្នោត បានអំពាវនាវឲ្យមានការប្រមូលផ្តុំសន្តិភាពដ៏ធំសម្បើម មួយ នៅចុងសប្តាហ៍នេះ នៅទីក្រុងMinskដើម្បី ទាមទារឲ្យមានការរាប់សន្លឹកឆ្នោត សាឡើងវិញ នៅក្រោយមានការចោទប្រកាន់ ពីការលួចបន្លំសន្លឹកឆ្នោត ដែលធ្វើឲ្យលោកAlexandre Loukachenko អាចទទួលបានសំឡេងឆ្នោត ដល់ទៅ ៨០ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ