សហភាពអឺរ៉ុបបើកជំនួបកំពូលពិសេស ស្តីអំពីវិបត្តិនយោបាយនៅប្រទេសបេឡារុស
ប្រមាណ១០ថ្ងៃហើយ ដែលប្រជាជនបេឡារុស បានធ្វើបាតុកម្ម កាន់តែធំឡើងៗ ដើម្បីទាមទារ ឲ្យលោកប្រធានាធិបតី លូកាឆិនកូ ចុះចេញពីតំណែង។ តែការអំពាវនាវរបស់ប្រជាជននេះ ហាក់មិនត្រូវបានប្រធានាធិបតីចាស់វស្សារូបនេះ យកចិត្តទុកដាក់ស្តាប់ទេ។ ផ្ទុយទៅវិញ លោកលូកាឆិនកូ បានថែមទាំងបំពាក់មេដាយ សរសើរមេកងកម្លាំងសមត្ថកិច្ច ក្នុងការបង្រ្កាបក្រុមបាតុករ ថែមទៀតផង។ នៅថ្ងៃពុធនេះ សហភាពអឺរ៉ុប បានរៀបចំជំនួបកំពូលវិសាមញ្ញមួយ តាមប្រព័ន្ធវីស្យូខុនហ្វឺរិនស៍ ដើម្បីពិក្សាគ្នា ស្វែងរកផ្លូវជួយដោះស្រាយវិបត្តិ នៅបេឡារុសនេះ។
ចុះផ្សាយនៅថ្ងៃ៖
ស្តាប់ - ០២:៣៦
លោកស្រី Svetlana Tikhanovskaïa បានថ្លែងទៅកាន់សហភាពអឺរ៉ុប នៅក្នុងឱកាសបើកជំនួបកំពូលវិសាមញ្ញ ដើម្បីស្វែងរកដំណោះស្រាយ ជួយប្រជាជនបេឡារុស។ លោកស្រីបានអំពាវនាវ ឲ្យសហភាពអឺរ៉ុប ក៏ដូចជាប្រទេសស្រលាញ់លទ្ធិប្រជាធិបតេយ្យទាំងអស់ ត្រូវតែរួមគ្នា បដិសេធចោលលទ្ធផលបោះឆ្នោត នៅបេឡារុសកាលពីថ្ងៃទី៩សីហា ព្រោះវាពោរពេញទៅដោយការក្លែងបន្លំ។ លោកស្រីបន្តថា ប្រជាជនបេឡារុស បានចេញធ្វើបាតុកម្មរាប់ម៉ឺននាក់ ដើម្បីការពារសន្លឹកឆ្នោតរបស់ពួកគេ។ តែផ្ទុយទៅវិញ ពួកគេបានរងនូវការបង្រ្កាប ការចាប់ចង់ និងការធ្វើទារុណកម្ម ពីសំណាក់អាជ្ញាធររដ្ឋាភិបាលផ្តាច់ការ របស់លោកកាឆិនកូ។
សូមបញ្ជាក់ថា នៅថ្ងៃទី១៩សីហានេះ សហភាពអឺរ៉ុប បានបើកការប្រជុំបន្ទាន់មួយ ជាមួយនឹងមេដឹកនាំប្រទេសសមាជិកទាំងអស់ ដើម្បីស្វែងរកគោលជំហររួម ក្នុងការដោះស្រាយវិបត្តិនៅបេឡារុស។ ថ្វីបើ បេឡារុស មិនមែនជាប្រទេសសមាជិករបស់សហភាពអឺរ៉ុបមែនពិត តែបេឡារុស ស្ថិតនៅចំកណ្តាលទ្វីបអឺរ៉ុប ដែលសហភាពអឺរ៉ុប មិនអាចព្រងើយកន្តើយ ឈរមើលការទាមទារលទ្ធិប្រជាធិបតេយ្យ របស់ប្រជាជនបេឡារុស បានទេ។
គួរកត់សំគាល់ថា បេឡារុសមានទំនាក់ទំនងស្និទស្នាលជាមួយនឹងរុស្ស៊ី។ យ៉ាងណាមិញ រុស្ស៊ី គឺជាមហាអំណាចតែមួយគត់ ដែលបានទទួលស្គាល់លទ្ធផលបោះឆ្នោត និងបានអបអរសាទរ ជ័យជំនះអាណត្តិទី៦ របស់លោកប្រធានាធិបតី លូកាឆិនកូ។
កាលពីថ្ងៃអង្គារទី១៨សីហា លោក ម៉ាក្រុង និង លោកស្រី មែរកិល បានទូរស័ព្ទម្តងម្នាក់ ទៅនិយាយ ជាមួយលោកពូទីន ដើម្បីបញ្ចុះបញ្ចូលឲ្យរុស្ស៊ី ងាកមកស្តាប់ការទាមទារចង់បាន របស់ប្រជាជនបេឡារុស ដែលបានចុះផ្លូវធ្វើបាតុកម្ម ប្រមាណ១០ថ្ងៃមកហើយ។ ទាំងលោកម៉ាក្រុង ទាំងលោកស្រីមែរកិល សុទ្ធតែបានអំពាវនាវ ឲ្យរុស្ស៊ីគាំទ្រការរកដំណោះស្រាយដោយសន្តិវិធី តាមរយៈការចរចាគ្នា រវាងបក្សនយោបាយទាំងអស់ និងចៀសវាងឲ្យបាន នូវការប្រើកម្លាំងបង្ក្រាបបាតុករ ឬការចាប់ចងធ្វើទារុណកម្ម។
លោក Charles Michel ប្រធានក្រុមប្រឹក្សាអឺរ៉ុប ក៏បានទូរស័ព្ទនិយាយជាមួយលោកពូទីនដែរ កាលពីថ្ងៃទី១៨សីហា។ ខ្លឹមសារសន្ទនាគ្នាយ៉ាងណានោះ មិនត្រូវបានលោក Charles Michel ប្រាប់ឲ្យដឹងទេ។ ប៉ុន្តែនៅលើទំព័រ Twitter លោក Charles Michel បានសរសេរថា « មានតែការចរចាគ្នាដោយសន្តិវិធី និងការរួមប្រមូលគ្រប់ភាគីនយោបាយទាំងអស់ ទើបអាចដោះស្រាយវិបត្តិបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ