ឧស្ម័នធម្មជាតិ ៖ តួកគីប្រកាសរកឃើញអណ្តូងឧស្ម័ននៅសមុទ្ទខ្មៅ
ប្រធានាធិបតីតួកគី លោក អ៊ែរដូហ្កាន (Recep Tayyip Erdogan) បានប្រកាសនៅថ្ងៃសុក្រ ទី ២១ សីហា ២០២០នេះ ថាតួកគី បានរកឃើញ អណ្តូងឧស្ម័នធម្មជាតិ ដ៏ធំជាងបង្អស់ ក្នុងប្រវត្តិសាស្ត្រ នៅសមុទ្ទខ្មៅ។ បើតាមលោកប្រធានាធិបតី តួកគីសង្ឃឹមថានឹងអាចចាប់ផ្តើមប្រមូលផលឧស្ម័ននេះ ចាប់ពីឆ្នាំ២០២៣ទៅ។
ចុះផ្សាយនៅថ្ងៃ៖
ស្តាប់ - ០២:១១
“ជាអណ្តូងឧស្ម័នដ៏ធំជាងគេបំផុត ដែលអាចមានស្តុកឧស្ម័នដល់ទៅប្រមាណ៣២០ ០០០លានម៉ែត្រគូប”។ នេះបើតាមប្រសាសន៍របស់លោកប្រធានាធិបតីតួកគី អ៊ែរដូហ្កាន ដោយអះអាងថា ជាការរកឃើញប្រភពថាមពលដ៏សំខាន់សម្រាប់អនាគតប្រទេសតួកគី ដែលធ្លាប់តែរំពឹងលើការនាំចូលថាមពលស្ទើរតែស្រុងពីបរទេស មកបម្រើសេចក្តីត្រូវការធំឡើងៗក្នុងស្រុក។
“ព្រះបានប្រទានភាពមានបានដ៏ធំធេងមិនធ្លាប់មានទេមកឱ្យតួកគី ! ចាប់ពីឆ្នាំ២០២៣ទៅ តួកគីនឹងយកធនធានឧស្ម័នក្រោមសមុទ្ទខ្មៅមកបម្រើប្រជាជាតិ”។ ជាមួយនឹងការកំណត់កម្មវត្ថុប្រកបដោយអំណរ លោកប្រធានាធិបតី បានគូសបញ្ជាក់ថា អណ្តូងឧស្ម័នទើបរកឃើញថ្មី ជាផ្នែកមួយនៃធនធានបំរុងដ៏សំខាន់ជាងគេមួយ។ មានន័យថាតួកគីរកឃើញប្រភពធនធានផ្សេងទៀត ?! លោកអ៊ែរដូហ្កានមិនបានផ្តល់ព័ត៌មានអ្វីលម្អិតបន្ថែមទៀតទេ។
ប៉ុន្តែប្រមុខរដ្ឋតួកគីបានឆ្លៀតព្រលយថា តួកគីនឹងពន្លឿនការស្វែងរុករកប្រភពថាមពលប្រេង នៅសមុទ្ទមេឌីទែរ៉ាណេ ខាងកើត នៅរវាងប៉ុន្មានខែខាងមុខ មិនខ្វល់នឹងសេចក្តីអំពាវនាវរបស់សហភាពអឺរ៉ុបទេ។
បើតាមលោកប្រធានាធិបតី នៅដំណាច់ឆ្នាំ២០២០ តួកគីនឹងដាក់ឱ្យដំណើរការឡើងវិញ នូវនាវាខួងរុករកប្រេង កានុនី ដែលពេលនេះកំពុងជួសជុល ក្រែងអាចរកឃើញអណ្តូងប្រេងស្រដៀងនឹងអណ្តូងឧស្ម័នទើបរកឃើញនៅសមុទ្ទខ្មៅ។ នាវាខួង និងនាវារុករកជាច្រើនគ្រឿងផ្សេងទៀត បានដាក់ពង្រាយធ្វើប្រតិបត្តិការរុករករួចហើយ ក្នុងតំបន់សមុទ្ទមេឌីទែរ៉ាណេខាងកើតដែលជាប់ជម្លោះជាមួយនឹងប្រទេសជិតខាង ក្រិក និងស៊ីប។ កាលពីពីរសប្តាហ៍មុន អមការពារដោយនាវាចម្បាំង នាវារុករកតួកគីមួយគ្រឿង បានចូលដល់ដែនទឹកជាប់ជម្លោះ ដែលក្រិកចាត់ទុកជារបស់ខ្លួន រហូតធ្វើឱ្យមានភាពតានតឹងយ៉ាងខ្លាំង។
សូមបញ្ជាក់ថា តាំងពីរកឃើញថាសមុទ្ទមេឌីទេរ៉ាណេខាងកើតមានបង្កប់ធនធានប្រេងដ៏សន្ធឹកសន្ធាប់មក ប្រទេសជិតខាងជាប់មាត់សមុទ្ទចាប់ស្រក់ទឹកមាត់ដណ្តើមគ្រប់គ្រងតំបន់នេះ។ យល់ថានឹងមិនបានទទួលចំណែក តួកគីក៏បានបង្កើនការខួងរុករកជាឯកតោភាគី ក្រោមក្រសែភ្នែកក្តៅក្រហាយរបស់ប្រទេសជិតខាង និងក្លាយជាប្រភពនៃជម្លោះតានតឹងរវាងតួកគីនិងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ