សហភាពអឺរ៉ុប អំពាវនាវឲ្យរុស្ស៊ី កុំបញ្ជូនកម្លាំង ទៅអន្តរាគមនៅបេឡារុសឲ្យសោះ
ប្រមុខការទូតសហភាពអឺរ៉ុប បានអំពាវនាវ កាលពីល្ងាចថ្ងៃសុក្រ ទៅ២៨សីហា ថាបើសិនជារុស្ស៊ី គោរពអធិបតេយ្យភាព និងការសម្រេចចិត្តរបស់ប្រជាជនបេឡារុស នោះសូមរុស្ស៊ីកុំបញ្ជូនកម្លាំង ទៅអន្តរាគមនៅបេឡារុសឲ្យសោះ។ ការអំពាវនាវ របស់ប្រមុខការទូតអឺរ៉ុបនេះ គឺធ្វើឡើងបន្ទាប់ពី លោកពូទីន ប្រធានាធិបតីរុស្ស៊ី បានអះអាងថា រុស្ស៊ីបានត្រៀមរៀនចំកម្លាំងពិសេសរួចហើយ ដើម្បីទៅអន្តរាគមនៅបេឡារុស្ស ប្រសិនបើចាំបាច់ក្នុងការស្តាសណ្តាប់ធ្នាប់ឡើងវិញ។
ចុះផ្សាយនៅថ្ងៃ៖
ស្តាប់ - ០២:៣៤
លោក Josep Borrell ប្រមុខការទូតអឺរ៉ុប បានថ្លែងអំពាវនាវ សុំកុំឲ្យរុស្ស៊ី បញ្ជូនកម្លាំងទៅធ្វើអន្តរាគមនៅបេឡារុស។ លោកបានលើកឡើងថា បើសិនជារុស្ស៊ី គោរពឯករាជ្យ អធិបតេយ្យភាពរបស់ប្រជាជាតិបេឡារុស គឺរុស្ស៊ីត្រូវតែគោរពការសម្រេចចិត្ត និងបំណងប្រាថ្នាចង់បាន របស់ប្រជាជនបេឡារុស ដែលជ្រើសយកលទ្ធិប្រជាធិបតេយ្យ។
លោកប្រមុខការទូតអឺរ៉ុប បន្ថែមថា លោកធ្លាប់ឮថ្នាក់ដឹកនាំរុស្ស៊ី និយាយជាញឹកញាប់ថា អ្វីដែលកំពុងតែកើតឡើង នៅបេឡារុស គឺជារឿងផ្ទៃក្នុងរបស់ប្រទេសនេះ ហើយប្រទេសផ្សេងដទៃ មិនត្រូវលូកដៃចូលទេ។ ដូច្នេះលោកសង្ឃឹមថា រុស្ស៊ីក៏នឹងមិនលូកដៃចូលក្នុងវិបត្តិផ្ទៃក្នុងរបស់ បេឡារុសនេះទេ។
គួរបញ្ជាក់ថា ការប្រកាសអំពាវនាវ របស់លោកប្រមុខការទូតសហភាពអឺរ៉ុបនេះ គឺធ្វើឡើងបន្ទាប់ពីមានដំណឹងថា រុស្ស៊ីមានគម្រោងបញ្ជូនកងកម្លាំងពិសេស ចូលអន្តរាគមនៅបេឡារុស។ បណ្តាញព័ត៌មាន Interfax បានចុះផ្សាយថា លោកពូទីន ប្រធានាធិបតីរុស្ស៊ី បានថ្លែងថា លោកលូកាឆិនកូ ប្រធានាធិបតីបេឡារុស បានស្នើសុំមកខាងរុស្ស៊ី ឲ្យបញ្ជូនកងកម្លាំងពិសេសទៅជួយ។ លោកពូទីន ក៏បានឆ្លើយយល់ព្រម និងបានរៀបចំកម្លាំងនេះ រួចស្រេចហើយ ព្រោះរុស្ស៊ីមានកាតព្វកិច្ចជួយបេឡារុស។ ក៏ប៉ុន្តែរុស្ស៊ីនឹងបញ្ជូនកម្លាំងទៅ លុះណាតែបញ្ហានៅបេឡារុស ធ្លាក់ដុនដាបធ្ងន់ធ្ងរ ដើម្បីស្តារសណ្តាប់ធ្នាប់ឡើងវិញតែប៉ុណ្ណោះ។
ការប្រកាសរបស់លោកពូទីននេះ បានបង្កជាការតវ៉ា រិះគន់យ៉ាងខ្លាំង ពីសំណាក់ប្រទេសប៉ូឡូញ រួមទាំងអង្គការអូតង់ផងដែរ។ នាយករដ្ឋមន្ត្រីប៉ូឡូញ បានលើកឡើងថា រុស្ស៊ីមិនអាចយកលេស ថាដើម្បីស្តារសណ្តាប់ធ្នាប់ ហើយលើកកម្លាំងចូលទៅកាន់បេឡារុសបានទេ។ រុស្ស៊ីត្រូវតែបោះបង់ចោលគម្រោងនេះជាបន្ទាន់។ ដូចគ្នាដែរ ក្រុមប្រឹក្សាចលនាបក្សនយោបាយប្រឆាំងនៅបេឡារុស បានច្រានចោលគម្រោងប្រើកម្លាំងអន្តរាគមរបស់រុស្ស៊ី ថាគឺជាអំពើបំពាននឹងច្បាប់អន្តរជាតិ។
សូមរំលឹកថា ប៉ុន្មានសប្តាហ៍មកហើយ ដែលប្រជាជនបេឡារុស រាប់សិបម៉ឺននាក់ បានធ្វើបាតុកម្ម បដិសេធលទ្ធផលបោះឆ្នោត ដែលផ្តល់ជ័យជំនះទៅឲ្យលោក លូកាឆិនកូ។ ធ្វើជាប្រធាធិបតីប្រមាណ២៦ឆ្នាំមកហើយ លោកលូកាឆិនកូត្រូវបានបាតុករ ចោទថាបានក្លែងបន្លំសន្លឹកឆ្នោត ដើម្បីបន្តអំណាច។ យ៉ាងណាមិញ សហភាពអឺរ៉ុប ទើបតែបានសម្រេចដាកទណ្ឌកម្ម ទៅលើថ្នាក់ដឹកនាំ និងមនុស្សមានអំណាចមួយចំនួននៅបេឡារុស ពីបទចូលរួមក្នុងការក្លែងបន្លំសន្លឹកឆ្នោត ក្បត់ឆន្ទៈរបស់ប្រជាពលរដ្ឋបេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ