លីបង់មាននាយករដ្ឋមន្ត្រីថ្មី ប្រធានាធិបតីចង់ផ្តាច់សាសនាពីរបបគ្រប់គ្រងរដ្ឋ
ចុះផ្សាយនៅថ្ងៃ៖
ស្តាប់ - ០៥:៣៥
នេះជាលើកទីពីរ ក្នុងចន្លោះពេលមិនដល់មួយខែផង ដែលប្រធានាធិបតីបារាំង លោក ម៉ាក្រុង អញ្ជើញទៅក្រុងបេរូត។ លោកម៉ាក្រុងសង្ឃឹមថាលីបង់នឹងអាចមានរដ្ឋាភិបាលថ្មីស្វាហាប់ មកជំនួសរដ្ឋាភិបាលចាស់ដែលបានលាលែងចេញពីតំណែង ក្រោយហេតុការណ៍ផ្ទុះនៅកំពង់ផែក្រុងបេរូត។ មុនដំណើរទៅដល់របស់ប្រធានាធិបតីបារាំង តែប៉ុន្មានម៉ោង លីបង់មាននាយករដ្ឋមន្រ្តីថ្មី។ ប្រធានាធិបតីលីបង់ក៏បានប្រកាសទៀតអំពីចេតនាចង់ធ្វើកំណែទម្រង់ ដោយផ្តាច់សាសនាចេញពីរបបគ្រប់គ្រងរដ្ឋ។
ក្រោយហេតុការណ៍ផ្ទុះនៅកំពង់ផែក្រុងបេរូត លោក ម៉ាក្រុង ជាប្រមុខរដ្ឋបស្ចឹមលោកដំបូងគេ ដែលបានធ្វើដំណើរទៅលីបង់។ នៅថ្ងៃនេះ លោកបានត្រលប់ទៅម្តងទៀត ចំថ្ងៃគម្រប់ខួប១០០ឆ្នាំគត់ (ថ្ងៃទី ១ កញ្ញា១៩២០) នៃការប្រកាសបង្កើតរដ្ឋលីបង់ ក្រោមការផ្តួចផ្តើមរបស់បារាំង។ មានន័យថា បារាំងនិងលីបង់មានចំណងប្រវត្តិសាស្ត្រនឹងគ្នាខ្លាំងណាស់។ ហេតុដូច្នេះបានជាបារាំងប្រឹងចេញមុខជាថ្មី តម្រង់ផ្លូវលីបង់ តាមរយៈការដាក់គំនាបនយោបាយផង បង្កើនវត្តមានផង។
វត្តមានជាលើកទីពីររបស់លោកម៉ាក្រុងនេះ មានតម្លៃសំខាន់ជានិម្មត្តិរូបខ្លាំងណាស់ បើទោះបីជាបារាំងគ្មានជម្រើសច្រើនក៏ដោយ។
លោកម៉ាក្រុងបានប្រើភាពជាមិត្តផង បានប្រើវិធីដាក់សម្ពាធនយោបាយនិងសេដ្ឋកិច្ចទៀត ដោយសហការជាមួយសហរដ្ឋអាមេរិក គំរាមដាក់ទណ្ឌកម្មបុគ្គលទៀត។ កាលពីថ្ងៃសុក្រទី ២៩សីហា លោកម៉ាក្រុង បានជំរុញលីបង់ជាថ្មី ឱ្យបង្កើតរដ្ឋាភិបាលថ្មីសកម្មស្វាហាប់ និងប្តូរផ្លាស់ប្រព័ន្ធដឹកនាំ។
កំណែទម្រង់ ផ្តាច់សាសនាពីរបបគ្រប់គ្រងរដ្ឋ
មួយថ្ងៃ មុនដំណើរទៅដល់របស់លោកម៉ាក្រុង ស្ថានភាពនយោបាយនៅលីបង់ ចាប់កំរើកច្រើន។ លោកប្រធានាធិបតីលីបង់ មីឆែល អាអ៊ូន ដែលមិនចេញស្តីអ្វីសោះតាំងពីចលនាបាតុកម្មប្រជាជនបានផ្ទុះឡើងនៅឆ្នាំ២០១៩ និងរីកធំធាត់កាន់តែខ្លាំងក្រោយការផ្ទុះកំពង់ផែនោះ ទើបបានប្រកាសនៅល្ងាចថ្ងៃអាទិត្យម្សិលមិញ ថាដល់វេលាដែលលីបង់ត្រូវប្តូរផ្លាស់ ផ្តាច់សាសនាពីរបបគ្រប់គ្រងរដ្ឋ និងត្រូវប្រកាសលីបង់ ជារដ្ឋគ្មានសាសនា។
សូមបញ្ជាក់ថា រហូតមកទល់ពេលនេះ លីបង់មានប្រព័ន្ធដឹកនាំ ដែលបែបចែកអំណាចគ្រប់គ្រងប្រទេស ទៅតាមសហគមន៍សាសនា។ សហគមន៍និកាយសាសនា ដែលមានសរុបចំនួន១៨ក្រុម ទទួលគ្រប់គ្រងអំណាចផ្សេងៗគ្នា ៖ សហគមន៍សាសនានិកាយស៊ុននីត ត្រូវជាប្រមុខរដ្ឋាភិបាល ប្រធានាធិបតីសម្រាប់អ្នកកាន់សាសនាគ្រឹស្ត ប្រធានសភា សម្រាប់សហគមន៍និកាយឈីអ៊ីត... ។ ប្រព័ន្ធនយោបាយបែបនេះ បើតាមលោកប្រធានាធិបតីបារាំង គឺប្រភពនៃការជាប់គាំងនយោបាយ និងពុំអនុញ្ញាតឱ្យមានការប្តូរផ្លាស់បុគ្គលអ្នកដឹកនាំទេ ហើយក៏មិនអាចធ្វើកំណែទម្រង់អ្វីបានទាំងអស់។
នៅក្នុងសុន្ទរកថានាឱកាសខួប១០០ឆ្នាំនៃការបង្កើតរដ្ឋលីបង់ លោកប្រធានាធិបតីលីបង់ អាអ៊ូន បានអំពាវនាវបើកការចរចារវាងអាជ្ញាធរសាសនា និងប្រមុខដឹកនាំនយោបាយ ដើម្បីបង្កើតកត្តិការនយោបាយថ្មីមួយ ផ្តាច់សាសនាពីរបបគ្រប់គ្រងរដ្ឋ ដែលគ្រប់ភាគីអាចទទួលយកបាន និងដែលអាចដាក់ឱ្យដំណើរការក្រោយការធ្វើវិសោធនកម្មច្បាប់ធម្មនុញ្ញត្រឹមត្រូវ។
ពីរបីម៉ោងក្រោយសុន្ទរកថារបស់ប្រធានាធិបតី ប្រមុខចលនាហេស្បូលា ស្និទ្ធនឹងអ៊ីរ៉ង់ លោក ហាសាន ណាស្រាឡះ បានប្រកាសភ្លាមព្រមចូលចរចា។
តើនេះជាឆន្ទៈពិតរបស់លីបង់ ឬយ៉ាងណា មានតែពេលវេលាទេទើបអាចឆ្លើយបាន។
នាយករដ្ឋមន្ត្រីលីបង់ថ្មី ជានរណា ?
ប្រធានាធិបតីលីបង់ លោក មីឆែល អាអ៊ូន បានចាប់ផ្តើម ពិគ្រោះសភា តាំងពីព្រឹក និងបានប្រកាសតែងតាំង លោក មូស្តាហ្វា អាដីប ជានាយរដ្ឋមន្ត្រីលីបង់ថ្មី បន្ទាប់ពីទទួលការគាំទ្រ ក្នុងសំឡេងភាគច្រើននៅសភា។
មានអាយុ៤៨ឆ្នាំ សាស្ត្រាចារ្យនៅសកលវិទ្យាល័យ មូស្តាហ្វា អាដីប បានក្លាយជាឯកអគ្គរដ្ឋទូតលីបង់ប្រចាំអាល្លឺម៉ង់ តាំងពីឆ្នាំ២០១៣មក។ គ្រាន់តែបានទទួលការតែងតាំងភ្លាម លោកបានសន្យាបង្កើតរដ្ឋាភិបាលថ្មីដែលមានសមាជិក ខ្លាំង រឹងម៉ាំ មានសមត្ថភាព និងចេះទទួលបន្ទុកធ្វើកំណែទម្រង់ ដែលពលរដ្ឋរង់ចាំជាយូរមកហើយ។
ប៉ុន្តែឥស្សរជនដែលគេមិនសូវស្គាល់ពីមុន លោក មូស្តាហ្វា អាដីប ជាមនុស្សជំនិតរបស់អតីតនាយករដ្ឋមន្ត្រី ណាជីប មីកាទី។ លោក អាចនឹងត្រូវចលនាប្រជាជន ដែលទាមទារឱ្យគ្រប់អ្នកនយោបាយចាស់ចេញ បដិសេធមិនទទួលយក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ