ប្រមុខការទូតបារាំង ព្រួយបារម្ភខ្លាចក្រែង លីបង់ រលាយបាត់
សំណុំរឿងលីបង់ រដ្ឋមន្ត្រីការបរទេសបារាំង បានអំពាវនាវ នៅថ្ងៃទី២៧សីហា ឲ្យភាគីលីបង់ទាំងអស់ «ត្រូវរកច្រកចេញនយោបាយជាបន្ទាន់ ពុំនោះទេ ប្រទេស លីបង់ អាចនឹងត្រូវរលំរលាយ។» សេចក្តីអំពាវនាវរបស់ប្រមុខការទូតបារាំងនេះ ធ្វើឡើងតាមរយៈបទសម្ភាសមួយរបស់វិទ្យុឯកជន RTLនៅក្រុងប៉ារីស និងដែលជាការប្រកាសជំហរជាមុន នៅមុនពេលប្រធានាធិបតីបារាំង ត្រូវអញ្ជើញបំពេញទស្សនកិច្ចជាថ្មី នៅថ្ងៃទី១កញ្ញា នៅលីបង់។ លីបង់ ដែលបានរងគ្រោះផ្ទុះសារធាតុគីមី នៅកំពង់ផែបេរូត ថ្ងៃទី៤សីហា បានសម្លាប់មនុស្សយ៉ាងហោច ១៨០នាក់។ ពលរដ្ឋ ជាង ៦៥០០នាក់ រងរបួស។ ប្រជាជនប្រមាណ ៣សែននាក់ គ្មានផ្ទះសម្បែងស្នាក់នៅ។
ចុះផ្សាយនៅថ្ងៃ៖
ស្តាប់ - ០១:៥១
ការព្រួយបារម្ភខ្លាចក្រែង លីបង់ រំលំរលាយបាត់ របស់ប្រមុខការទូតបារាំង Jean-Yves Le Drian គឺនៅក្នុងន័យដែល បារាំង ចង់ឃើញ លីបង់ មានរដ្ឋាភិបាលថ្មីបានឆាប់ ហើយជារដ្ឋាភិបាលដែលមានកំណែទម្រង់ស៊ីជម្រៅ។ ការបង្កើតរដ្ឋាភិបាលថ្មីដែលមានសមត្ថភាពនេះ គឺត្រូវតែធ្វើឱ្យបានឆាប់រហ័សបំផុត ព្រោះពលរដ្ឋលីបង់ កំពុងតែប្រឈមនឹងវិបត្តិសុខភាពធ្ងន់ធ្ងរ និងត្រូវការជំនួយសង្គ្រោះជាបន្ទាន់។
នៅលីបង់ ជាងពីរសប្តាហ៍មកហើយ ដែលនាយករដ្ឋមន្ត្រីលីបង់ Hassan Diab សុំចុះចេញពីតំណែង ប៉ុន្តែ លោកប្រធានាធិបតី Michel Aoun នៅតែពុំទាន់អាចចាត់តាំងនរណាឱ្យមកជំនួសបាននៅឡើយទេ ត្បិតថា ការតែងតាំងនាយករដ្ឋមន្ត្រី តាមទម្លាប់ប្រពៃណីរបស់លីបង់ គឺចាំបាច់ត្រូវមានការផ្តល់សេចក្តីទុកចិត្តពីបណ្តាពហុបក្សនយោបាយដែលមាននិន្នាការបន្ទាត់នយោបាយនិងជំនឿសាសនាចម្រុះផ្សេងៗគ្នា ហើយម្យ៉ាង ក៏ត្រូវសុំសេចក្តីទុកចិត្តពីរដ្ឋសភាដែលកាន់កាប់ដោយប្រមុខសាសនា ប្លែកគ្នាទៀត។ ហេតុនេះ ការយល់ព្រមលើកបន្តុបឥស្សរជនរូបណាម្នាក់ សម្រាប់តំណែងប្រមុខរដ្ឋាភិបាល និងសម្រាប់បម្រើប្រយោជន៍រួមនៃគ្រប់ភាគី គឺមិនងាយស្រួលឡើយ។
ចំពោះបារាំង ដែលមានប្រវត្តិសាស្ត្រវែងឆ្ងាយយូរលង់ជាមួយគ្នា បារាំងចង់ឃើញ លីបង់ ដើរលឿនទៅមុខ មានរដ្ឋាភិបាលថ្មី មានកំណែទម្រង់នយោបាយនិងសេដ្ឋកិច្ច ហើយនិងអាចអនុញ្ញាតឱ្យសហគមអន្តរជាតិ អាចចាប់ដៃធ្វើការជាមួយគ្នាបាន។ តាមប្រសាសន៍របស់ ប្រមុខការទូតបារាំង Jean-Yves Le Drian ប្រសិនបើគ្មានកំណែទម្រង់ស៊ីជម្រៅ នៅពេលនេះទេ គឺលីបង់លំបាកនឹងឱ្យសហគមអន្តរជាតិជួយណាស់ ព្រោះថា គេមិនអាចផ្តល់ជំនួយលុយកាក់ដល់រដ្ឋាភិបាលមួយ ដែលមានអំពើពុករលួយជាប្រព័ន្ធ នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ