ស្នងការសហភាពអឺរ៉ុប ៖ គ្មានរដ្ឋាភិបាលគួរឱ្យជឿជាក់ គ្មានជំនួយស្ថាបនាលីបង់
ស្នងការសហភាពអឺរ៉ុបទទួលបន្ទុកគ្រប់គ្រងវិបត្តិ លោក Janez Lenarcic បានចេញសេចក្តីអំពាវនាវ នៅល្ងាចសៅរ៍ទី ១២កញ្ញា ២០២០ ឱ្យលីបង់រៀបចំបង្កើតរដ្ឋាភិបាល ដ៏គួរឱ្យជឿជាក់មួយ និងឱ្យបានឆាប់រហ័ស។ មានរដ្ឋាភិបាលគួរជាទីទុកចិត្តរបស់ប្រជាពលរដ្ឋ និងមានឆន្ទៈដាច់ខាតដឹកនាំប្រទេស ទើបសហភាពអឺរ៉ុបទម្លាយកញ្ចប់ជំនួយសម្រាប់ស្ថាបនាជាតិលីបង់ ដំណាក់កាលទីពីរ។
ចុះផ្សាយនៅថ្ងៃ៖
ស្តាប់ - ០២:១១
ធ្វើដំណើរទៅដល់ក្រុងបេរ៉ូត តាមជើងយន្តហោះមនុស្សធម៌ ដែលជាយន្តហោះដឹកជំនួយមនុស្សធម៌ទីបី គិតចាប់តាំងពីលីបង់រងគ្រោះផ្ទុះនៅកំពង់ផែមក លោកស្នងការអឺរ៉ុប Janez Lenarcic បានចូលរួមចែកចាយប្រគល់ជំនួយ ទៅអង្គការកាកបាទក្រហមលីបង់។ បន្ទាប់មកលោកត្រូវចូលជួបសន្ទនាជាមួយនាយករដ្ឋមន្ត្រីលីបង់ថ្មី លោក ម៉ូស្តាហ្វា អាដីប Moustafa Adib ដែលមានបន្ទុកបង្កើតរដ្ឋាភិបាលថ្មី។
គ្រោះផ្ទុះកំពង់ផែ កាលពីថ្ងៃទី ៤សីហា បានសម្លាប់ជីវិតមនុស្សអស់ជាង១៩០នាក់ របួសជាង៦៥០០នាក់ និងពលរដ្ឋប្រមាណបីសែននាក់បាត់បង់ទីជម្រក ព្រមទាំងបំផ្លិចបំផ្លាញរដ្ឋធានីស្ទើរខ្ទេចខ្ទី។ ភ្លាមមួយរំពិច សហភាពអឺរ៉ុបតែម្នាក់ឯងបានផ្តល់ជំនួយបន្ទាន់ ដល់លីបង់ អស់៦៤លានអឺរ៉ូ និង ចំណែករដ្ឋជាសមាជិកអឺរ៉ុបបានចូលរួមចែកវិភាគទានរៀងខ្លួនដាច់ដោយឡែកប្រមាណជិត៦៥លានអឺរ៉ូផ្សេងទៀត។ នេះបើតាមការលម្អិតរបស់លោកស្នងការអឺរ៉ុប ដោយបញ្ជាក់ថា “ដំណាក់កាលបន្ទាប់ គឺការស្ថាបនាប្រទេសលីបង់។ ប៉ុន្តែជំនួយស្ថាបនាប្រទេស ត្រូវដើរទន្ទឹមនឹងការធ្វើកំណែទម្រង់ ព្រោះសហគមន៍អន្តរជាតិ មិនគាំទ្ររដ្ឋាភិបាលណាដែលដឹកនាំប្រទេសឆ្ពោះទៅរកវិបត្តិសេដ្ឋកិច្ច និងការដួលរលំប្រព័ន្ធហិរញ្ញវត្ថុឡើយ”។
លោកស្នងការបានអះអាងទៀតថា អ្នកដឹកនាំនយោបាយលីបង់ ត្រូវឆ្លើយតបទៅនឹងសេចក្តីត្រូវការរបស់ពលរដ្ឋ និងជាអ្វីដែលសហគមន៍អន្តរជាតិចង់បាន ដោយមិនមែនត្រឹមតែធ្វើកំណែទម្រង់សេដ្ឋកិច្ចទេ តែត្រូវប្តូរផ្លាស់របៀបដឹកនាំប្រទេសទៀត។ លីបង់ ត្រូវបង្កើតរដ្ឋាភិបាលឱ្យបាន យ៉ាងឆាប់រហ័ស និងគួរជាទីទុកចិត្តសម្រាប់ពលរដ្ឋលីបង់ ហើយត្រូវធ្វើកំណែទម្រង់ ដោយផ្តើមជាបឋមស្វែងរកកិច្ចព្រមព្រៀងជាមួយមូលនិធិរូបិយវត្ថុអន្តរជាតិ ដើម្បីផ្តល់សន្ទុះសេដ្ឋកិច្ចដល់ប្រទេស។ បើលីបង់ធ្វើបែបនេះបាន នោះសហភាពអឺរ៉ុបនឹងប្រកាន់យកចំណែកដ៏សំខាន់មួយ គឺធានារ៉ាប់រងជួយស្ថាបនាលីបង់ឡើងវិញ ពីការខូចខាតដែលបើតាមការវាយតម្លៃរបស់ធនាគារពិភពលោក មានទំហំប្រមាណ៨ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ