ការសិក្សា ៖ ម៉ាសការពារកូវីដ១៩ មិនសូវត្រូវនឹងទម្រង់មុខរបស់ស្ត្រីនិងជនជាតិអាស៊ី
បើតាមការសិក្សា ការការពារទប់ទល់នឹងកូវីដ១៩ មិនមែនកំណត់ត្រឹមតែលើ សមត្ថភាពចម្រោះរបស់ម៉ាសទេ តែការពាក់ម៉ាសឱ្យត្រូវនឹងទម្រង់មុខ កាន់តែសំខាន់ និងជួយការពារបានខ្លាំងជាង។ ក្នុងន័យនេះ ក្រុមអ្នកសិក្សា សង្កេតឃើញថា ម៉ាសការពារកូវីដ១៩ ដែលបុគ្គលិកពេទ្យពាក់ មិនសូវស៊ីទៅនឹងទម្រង់មុខរបស់ ស្ត្រី និង របស់ជនជាតិអាស៊ីទេ។
ចុះផ្សាយនៅថ្ងៃ៖
ស្តាប់ - ០២:២៦
ម៉ាសប្រភេទ FFP2 និង FFP3 ដែលជាម៉ាសសម្រាប់ក្រុមគ្រូពេទ្យពាក់ការពារខ្លួនពីជំងឺកូវីដ១៩ នៅតាមមន្ទីរពេទ្យ មិនសូវ ត្រូវ នឹងទម្រង់មុខរបស់ ស្ត្រី និងទម្រង់មុខរបស់ជនជាតិអាស៊ីទេ។ ដូច្នេះ ពួកគេទាំងនេះ មានការប្រឈមខ្ពស់នឹងគ្រោះឆ្លងកូវីត១៩ ខ្លាំងជាងគេ។ នេះបើតាមការសិក្សាមួយទើបចេញផ្សាយនៅថ្ងៃពុធទី ១៦ កញ្ញា ក្នុងទស្សនាវដ្តីវេជ្ជសាស្ត្រAnaesthesia។
បើតាមប្រសាសន៍របស់លោក Britta von Ungern-Sternberg សាស្ត្រាចារ្យ នៅសកលវិទ្យាល័យ អូស្ត្រាលី University of Western Australia ដែលជាប្រធានដឹកនាំការស្រាវជ្រាវ “ម៉ាសប្រឆាំងមេរោគ អាចបំពេញតួនាទីការពារបានត្រឹមត្រូវល្អ ដរាបណាតែម៉ាសនោះ ពាក់ទៅត្រូវ នឹងទម្រង់មុខ អិបជាប់មុខគ្មានសល់ចន្លោះឬរន្ធណាដែលខ្យល់អាចជ្រៀតចូលបាន”។
ការសិក្សាវាយតម្លៃអំពីប្រសិទ្ធភាពការពារប្រឆាំងនឹងមេរោគ នៃម៉ាសប្រភេទ FFP2 និង FFP3 ឬ N95 និង N99 បានធ្វើឡើង ដោយឆ្លងកាត់ការធ្វើតេស្តសាកល្បងនៅក្នុងប្រទេសជាច្រើន មានជាអាទិ៍នៅសហរដ្ឋអាមេរិក និងតាំងពីមុនមានការរាតត្បាតនៃជំងឺកូវីដ១៩ ផ្ទុះឡើងទៅទៀត។
លទ្ធផលនៃការធ្វើតេស្តបានបង្ហាញថា បុរសអាចពាក់ម៉ាស បានយ៉ាងត្រឹមត្រូវ ចូលស៊ុបអិបនឹងមុខ បានដល់ទៅ ៩៥% តែស្ត្រីអាចពាក់ត្រូវស៊ុប ត្រឹម៨៥%ប៉ុណ្ណោះ។ ម៉ាសប្រភេទនេះ ត្រូវនឹងទម្រង់មុខរបស់មនុស្សអំបូរអឺរ៉ុបកូកាស ដល់ទៅ ៩០% ទល់នឹងតែត្រឹម៨៤%សម្រាប់ជនជាតិអាស៊ី និង ត្រឹមប្រមាណ ៦០% ជាមធ្យម ប៉ុណ្ណោះ ចំពោះស្ត្រីអាស៊ី។
ក្រុមអ្នកដឹកនាំការសិក្សា កាន់តែព្រួយបារម្ភខ្លាំងថែមទៀត ព្រោះនៅក្នុងពេលធ្វើតេស្ត ស្ត្រីអាស៊ីមានចំនួនតិច ប៉ុន្តែក្នុងស្ថានភាពជាក់ស្តែង ស្ត្រីមានចំនួនច្រើននៅក្នុងវិស័យសុខាភិបាល។ បើតាមការប៉ាន់ស្មាន របស់អាជ្ញាធរសុខាភិបាល នៅក្នុងប្រទេសភាគច្រើនលើពិភពលោក ពីរភាគបីនៃបុគ្គលិកពេទ្យ ជាស្ត្រី។
ដូច្នេះដើម្បីការពារស្ត្រី ការពារបុគ្គលិកពេទ្យជាទូទៅ អ្នកស្រាវជ្រាវបានសំណូមពរឱ្យគ្រប់មន្ទីរពេទ្យ ត្រូវយកម៉ាសមកធ្វើតេស្តជាស្វ័យប្រវត្តិ លើបុគ្គលិកជាមុនសិន មុននឹងបញ្ជូនពួកគេ ឱ្យទៅមើលថែអ្នកជំងឺកូវីដ១៩ ព្រោះពេលនេះ គ្រប់មន្ទីរពេទ្យសុទ្ធតែមានស្តុកគ្រប់គ្រាន់ហើយ មិនដូចពេលផ្ទុះការរាតត្បាតខ្លាំងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ