សហភាពអឺរ៉ុប បង្ហាញផែនការសកម្មដែលផ្តោតលើការផ្តល់សន្ទុះថ្មីនិងអាកាសធាតុ
នៅក្នុងសុន្ទរកថាជាលើកទីមួយ ទៅកាន់ប្រជាជាតិអឺរ៉ុប ក្នុងនាមជាប្រធានគណៈកម្មការអឺរ៉ុប លោកស្រី Ursula von der Leyen បានបង្ហើបបង្ហាញអំពីផែនការដឹកនាំអឺរ៉ុប។ លោកស្រីប្រធានគណៈកម្មការ សន្យាដឹកនាំអឺរ៉ុប ឱ្យបានខ្លាំងក្លាប្រឈមនឹង វិបត្តិសុខភាព ការប្រែប្រួលអាកាសធាតុ និងវិបត្តិសេដ្ឋកិច្ច។ តើអឺរ៉ុបក្រោមអាណត្តិថ្មី មានផែនការសកម្មយ៉ាងណា ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
លោកស្រី Ursula von der Leyen ប្រមុខដឹកនាំសហភាពអឺរ៉ុប បានយកបញ្ហាអាកាសធាតុ មកធ្វើជាសរសរទ្រូងនៃអាណត្តិរបស់លោកស្រី ដោយបានប្រកាសដំឡើងមហិច្ឆតា កាត់បន្ថយការបញ្ចេញឧស្ម័នកាបូនិក នៅឆ្នាំ២០៣០ ឱ្យបានដល់៥៥%បើប្រៀបទៅនឹងឆ្នាំ១៩៩០ មិនមែនត្រឹម៤០% ដូចកម្មវត្ថុបច្ចុប្បន្ននេះទេ។
លោកស្រីបានទទួលស្គាល់ថាការដំឡើងកម្មវត្ថុកាបោន អាចជះផលវិបាកខ្លាំងដល់វិស័យថាមពល ដឹកជញ្ជូន ឬកសិកម្ម តែសេដ្ឋកិច្ចនិងឧស្សាហកម្មអឺរ៉ុប អាចប្រឈមបាន។ អឹរ៉ុបត្រូវតែក្លាយនៅឆ្នាំ២០៥០ ជាទ្វីបដំបូងគេដែលគ្មានឧស្ម័នបំពុលបរិយាកាស មានន័យ រាល់ឧស្ម័នកាបូនិកបញ្ចេញមកនឹងត្រូវស្រូបទៅវិញអស់។ ក្នុងន័យនេះ ផែនការផ្តល់សន្ទុះសេដ្ឋកិច្ចតម្លៃ ៧៥០ពាន់លានអឺរ៉ូ ដែលសមាជិកអឺរ៉ុបបានព្រមព្រៀងគ្នាកាលពីខែកក្កដា នឹងត្រូវផ្គត់ផ្គង់ដោយកញ្ចប់ថវិកាបរិស្ថានក្នុងកំរិត៣០%។
ប្រឈមនឹងកូវីដ១៩ ដែលរដ្ឋនីមួយៗដោះស្រាយរៀងខ្លួននោះ លោកស្រីប្រធានគណៈកម្មការបានអំពាវនាវបង្កើត ភ្នាក់ងារស្រាវជ្រាវនិងអភិវឌ្ឍជីវវេជ្ជសាស្ត្រថ្នាក់អឺរ៉ុបមួយ ដូចអ្វីដែលសហរដ្ឋអាមេរិកមាន។ សូមរដ្ឋនីមួយៗពិចារណា។ សម្រាប់លោកស្រី មានការប្រកួតប្រជែងស្វែងរកថ្នាំបង្ការខ្លាំងណាស់ថ្នាក់ពិភពលោក គំនិតជាតិនិយមមានថ្នាំបង្ការ អាចធ្វើមានការបាត់បង់ជីវិតច្រើន។
ស្តីអំពីBrexit លោកស្រីបានព្រមានថា កិច្ចព្រមព្រៀងអឺរ៉ុបអង់គ្លេសកាលពីខែមករា មិនអាចកែប្រែជាឯកតោភាគីបានឡើយ។ ដាច់ឆ្នាំ ជាការដាច់ដំណាក់អន្តរកាលនៃការលែងលះជាមួយអង់គ្លេស។
អឺរ៉ុបអាណត្តិថ្មី ត្រូវតែមានជំហរច្បាស់ និងសម្រេចជំហរយ៉ាងលឿនរហ័ស នៅលើឆាកអន្តរជាតិ មិនថាក្នុងសំណុំរឿងហុងកុង រុស្ស៊ី ឬបេឡារុស្ស៊ីឡើយ។ លោកស្រីប្រធានគណៈកម្មការអឺរ៉ុប បានព្រលយច្បាស់ៗ ដាក់រុស្ស៊ីដោយប្រកាសថា ការបំពុលលោក ណាវ៉ាល់នី មិនមែនជាទង្វើទោលទេ ហើយមិនរាប់អំពីការជ្រៀតជ្រែកការបោះឆ្នោតនៅលើពិភពលោកផង។ រុស្ស៊ីមិនប្តូរឥរិយាបថ ហើយមិនមែនកិច្ចព្រមព្រៀងសង់បំពង់បង្ហូរឧស្ម័នទេដែលនឹងទៅប្តូរទៅចរិតរុស្ស៊ី។ ដើម្បីដាក់ទណ្ឌកម្មរុស្ស៊ី មានប្រទេសជាច្រើនក្នុងនោះមានអាល្លឺម៉ង់មួយផង ចង់បង្កកការដ្ឋានសាងសង់បំពង់បង្ហូរឧស្ម័ន Nord Stream 2 ដែលតត្រង់ពីរុស្ស៊ីមកអឺរ៉ុបខាងលិច ។
លោកស្រី សន្យាដឹកនាំគណៈកម្មការភូមិសាស្ត្រនយោបាយ ដោយមិនបណ្តោយឱ្យតួកគីបង្កជម្លោះឧស្ម័នជាមួយក្រិកក្នុងតំបន់សមុទ្ទមេឌីទែរ៉ាណេខាងកើតទេ បើទោះបីជាតួកគីបានជួយអឺរ៉ុបទទួលជនភៀសខ្លួនជាច្រើនលាននាក់ក៏ដោយ។
វិបត្តិជនភៀសខ្លួនជាប្រធានបទដ៏រសើបបំផុតរបស់សហភាពអឺរ៉ុប ដែលលោកស្រីនឹងលើកបង្ហាញផែនការថ្មី នៅថ្ងៃទី ២៣កញ្ញាខាងមុខ។ បន្ទាប់មកទៀត លោកស្រីនឹងលើកផែនការសកម្មប្រឆាំងនឹងការរើសអើងពូជសាសន៍ និងការស្អប់ខ្ពើមអ្នកស្រលាញ់ភេទដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ