លោកម៉ាក្រុង ទីបំពេញទស្សនកិច្ចលើកទី១ នៅប្រទេសលីទុយអានី និងឡេតូនី
លោកអេម៉ានុយអែល ម៉ាក្រុង ប្រធានាធិបតីបារាំង នៅថ្ងៃទី២៨កញ្ញា ទៅបំពេញទស្សនកិច្ចផ្លូវរដ្ឋ ជាលើកទីមួយនៅប្រទេសលីទុយទានី និង ឡេតូនី។ ទស្សនកិច្ចរបស់លោកម៉ាក្រុង នៅក្នុងប្រទេសតំបន់បាល់ទិកទាំង២នេះ គឺវាស្ថិតនៅក្នុងបរិបទ ស្តីពីវិបត្តិនៅប្រទេសបេឡារុស។ ប្រទេសតំបន់បាល់ទិក មានបំណងចង់ឲ្យលោកប្រធានាធិបតីបារាំង ប្រកាសជំហរជាក់ច្បាស់ ក្នុងការគាំទ្រ ការទាមទារលទ្ធិប្រជាធិបតេយ្យនៅបេឡារុស និងជាពិសេសនោះ គឺត្រូវនិយាយជាមួយលោកពូទីន ប្រធានាធិបតីរុស្ស៊ី ឲ្យយល់ព្រមបើកផ្លូវ ឲ្យមានការផ្លាស់ប្តូរអំណាចដោយសន្តិវិធី ទៅតាមឆន្ទៈរបស់ប្រជាជនបេឡារុស។
ចុះផ្សាយនៅថ្ងៃ៖
អស់រយៈពេល១៩ឆ្នាំហើយ ដែលមិនមានប្រធានាធិបតីបារាំងរូបណា ទៅធ្វើទស្សនកិច្ច នៅប្រទេសតំបន់បាល់ទិក។ ដូចដែលបានសន្យា នៅថ្ងៃចន្ទទី២៨កញ្ញា ២០២០ លោកអេម៉ានុយ អែល ម៉ាក្រុង បានទៅដល់ទីក្រុងវីលញូស (Vilnius) រដ្ឋធានីប្រទេសលីទុយអានី ក្នុងដំណើរទស្សនកិច្ចផ្លូវរដ្ឋរយៈពេល២ថ្ងៃ។ នៅថ្ងៃពុធ លោកម៉ាក្រុង នឹងបន្តដំណើរទៅ ប្រទេសឡេតូនី។
ដំណើរទស្សនកិច្ចនេះ ស្ថិតក្នុងបរិបទស្ថានភាពភូមិសាស្ត្រនយោបាយ ដ៏សំខាន់ ខណៈដែលប្រទេសតំបន់បាល់ទិកទាំង២នេះ គឺជាសមាជិកនៃសហភាពអឺរ៉ុបផង និងជាសមាជិកនៃអង្គការសម្ពន័្ធមិត្តអូតង់ផងដែរ។ ប្រទេសទាំងនេះ គឺជាអ្នកស្ថិតនៅជួរមុខគេ ប្រឈមជាមួយនឹងរុស្ស៊ី។ យ៉ាងណាមិញ លោកម៉ាក្រុង ក៏នឹងឆ្លៀត ទៅសួរសុខទុក្ខ ទាហានបារាំង ទាំង៣០០នាក់ ដែលកំពុងឈរជើង នៅមូលដ្ឋាន Rukla ប្រទេសលីទុយអានី ក្នុងក្រមខណ្ឌអូតង់។
វាក៏ជាបរិបទមួយដ៏តានតឹងផងដែរ នៅក្នុងតំបន់នេះ បន្ទាប់ពីប្រជាជនបេឡារុស បានធ្វើបាតុកម្មប្រមាណជិត២ខែមកនេះ ដើម្បីទាមទារ ឲ្យមេដឹកនាំផ្តាច់ការ លូកាឆិនកូ ចុះចេញពីតំណែង។ ដំណើរវិវឌ្ឍន៍នៃលទ្ធិប្រជាធិបតេយ្យ នៅបេឡេរុស កំពុងតែត្រូវបានប្រទេសតំបន់បាល់ទិកផ្សេងទៀត តាមដានយ៉ាងយកចិត្តទុកដាក់។ យ៉ាងណា លោកស្រី ស្វេតឡាណា ទីខាងណូវស្កាយ៉ា ដែលជាមេបក្សប្រឆាំងបេឡារុស បានភៀសខ្លួនទៅស្នាក់នៅប្រទេសលីទុយអានី។
ក្នុងឱកាសទៅដល់របស់លោកម៉ាក្រុង ក្រុមអ្នកវិទ្យាសាស្ត្រ អ្នកនយោបាយ និងសិល្បៈករផង បានរួមគ្នាសរសេរញត្តិមួយ ជូនលោកម៉ាក្រុង ដោយបានសំណូមពរ ឲ្យបារាំង ត្រូវប្រកាសជំហរ ឲ្យបានជាក់ច្បាស់ និងម៉ឺងម៉ាត់ ក្នុងការគាំទ្រ ចលនាបាតុកម្ម របស់ប្រជាជនបេឡារុស។ ញត្តិបានសរសេរថា៖ « ក្នុងសតវត្សទី២១ទៅហើយ តែនៅទ្វីបអឺរ៉ុប ប្រជាជនបេឡេរុស កំពុងតែទទួលរងនូវការជិះជាន់ ការចាប់បង្ឃាំង ការធ្វើទារុណកម្ម យ៉ាងអយុត្តិធម៌ជាទីបំផុត »។ បញ្ញវន្តលីទុយអានី ក៏ចឹងឃើញ ផងដែរថា លោកម៉ាក្រុង ត្រូវបានហ៊ានចេញមុខ ប្រឈមជាមួយលោកពូទីន ដើម្បីឲ្យរុស្ស៊ីឈប់គាំទ្រមេដឹកនាំផ្តាច់ការបេឡារុស លូកាឆិនកូ។
កាលពីថ្ងៃអាទិត្យ ទី២៧កញ្ញា លោកម៉ាក្រុងបានលើកឡើងថា៖ « អ្វីដែលបេឡារុស កំពុងឆ្លងកាត់ គឺជាវិបត្តិនៃការក្រាញអំណាច។ វាជាអំណាចបែបផ្តាច់ការមួយ ដែលមិនយល់ មិនផ្តល់តម្លៃដល់គោលការណ៍លទ្ធិប្រជាធិបតេយ្យ ហើយគិតប្រឹងក្រាញននាល ដោយប្រើកម្លាំងបង្រ្កាប »។ លោកម៉ាក្រុងបន្ថែមថា៖ « វាច្បាស់ណាស់ ដែលលោកលូកាឆិនកូ ត្រូវតែចាកចេញពីអំណាចនេះ »។
យោងតាមប្រភពស្និទ្ធនឹងវិមានប្រធានាធិបតីបារាំង លោកម៉ាក្រុង អាចប្រហែលជានឹងជួប លោកស្រី ទីខាណូវស្កាយ៉ា នៅទីក្រុងវីលញូស ក្នុងពេលទស្សនកិច្ចនៅលីទុយអានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ