OMS/WHO ថាមិនត្រូវបណ្តោយឲ្យកូវីដ១៩ ឆ្លងរាលដាលដោយគ្មានការទប់ស្កាត់នោះទេ
លោកអគ្គនាយកអង្គការសុខភាពពិភពលោក បានលើកឡើង កាលពីថ្ងៃចន្ទទី១២តុលាថា គេមិនអាចបណ្តោយឲ្យមេរោគជម្ងឺកូវីដ១៩ ឆ្លងរាលដាលដោយគ្មានការទប់ស្កាត់បានទេ ព្រោះមេរោគនេះ មិនមែនដូចមេរោគផ្តាសាយសាមញ្ញឡើយ។ ការលើកឡើង ក្រើនរំលឹកពីសំណាក់ លោកអគ្គនាយកអង្គការសុខភាពពិភពលោកបែបនេះ គឺបន្ទាប់ពីមានមតិមួយចំនួន ដែលយល់ឃើញថា អាជ្ញាធរសុខាភិបាលគួរតែបើកចំហរ ឲ្យមេរោគជម្ងឺកូវីដ១៩នេះ ឆ្លងរាលដាលសព្វក្នុងចំណោមប្រជាជន។ ធ្វើបែបនេះ ទើបរាងកាយមនុស្សអាចបន្សាំ ហើយអាចមានកម្លាំង ទប់ទល់ ជាមួយមេរោគនេះបាន។
ចុះផ្សាយនៅថ្ងៃ៖
ស្តាប់ - ០២:៣៨
លោកវិជ្ជបណ្ឌិត Tedros Adhanom Ghebreyesus បានលើកឡើងថា ៖ នៅក្នុងប្រវត្តិសាស្ត្រនៃសុខភាពសាធារណៈ គេមិនដែលប្រយុទ្ធយកឈ្នះ នឹងករណីជម្ងឺឆ្លងរាលដាលធ្ងន់ធ្ងរ ដោយការប្រើយុទ្ធសាស្ត្របើកចំហរ បណ្តោយឲ្យវាឆ្លងទូទៅក្នុងសង្គម ដោយសង្ឃឹមថារាងកាយមនុស្ស នឹងបន្សាំជាមួយមេរោគនោះទេ។ លោកបន្ថែមថា បណ្តោយឲ្យមេរោគថ្មីមួយ ដែលអាចបង្កគ្រោះថ្នាក់ ឲ្យវាឆ្លងរាលដាលសព្វក្នុងសង្គម គឺវាជារឿងមួយគ្មានសិលធម៌ ទាំងក្នុងន័យវិទ្យាសាស្ត្រ ទាំងក្នុងន័យមនុស្សធម៌។
ចំណែក លោកស្រីវិជ្ជបណ្ឌិត Maria Van Kerkhove អ្នកទទួលបន្ទុកជំងឺឆ្លងកូវីដ១៩ នៅអង្គការសុខភាពពិភពលោក បានបញ្ជាក់ថា មេរោគកូរ៉ូណាវីរុសថ្មី ដែលបង្កជំងឺកូវីដ១៩ មានកម្រិតគ្រោះថ្នាក់ដល់ស្លាប់ ខ្ទង់ជាមធ្យម ០,៦%។ ក៏ប៉ុន្តែកម្រិតនេះ វាឡើងខ្ពស់ខ្លាំងណាស់ សម្រាប់អ្នកជំងឺដែលមានវ័យចំណាស់។ បើប្រៀបធៀបទៅនឹងមេរោគជំងឺផ្តាសាយធំធម្មតា គឺកូវីដ១៩ មានភាពធ្ងន់ធ្ងរខ្លាំងជាង។
លោកអគ្គនាយកអង្គការសុខភាពពិភពលោក បានអះអាងថា រហូតមកទល់ពេលនេះ អ្នកជំនាញនៅដឹងតិចតួចណាស់ ទាក់ទិននឹង ភាពបន្សាំរបស់រាងកាយមនុស្ស ទៅនឹងមេរោគជំងឺកូវីដ១៩។ ភាគច្រើន មនុស្សដែលបានឆ្លងមេរោគនេះហើយ គឺរាងកាយអាចបង្កើតជាប្រព័ន្ធទប់ទល់ ក្នុងរវាងសប្តាហ៍ដំបូងពិតមែន ក៏ប៉ុន្តែប្រព័ន្ធទប់ទល់នោះ គឺគេមិនទាន់ដឹងច្បាស់ទេ ថាវាអាចមានកម្លាំងខ្លាំងកម្រិតណា ហើយក្នុងរយៈពេលយូរប៉ុណ្ណា។ មានករណីច្រើនណាស់ ដែលអ្នកឆ្លងកូវីដ១៩ម្តងហើយ បានឆ្លងវាម្តងទៀត ក្រោយពីជាសះស្បើយហើយ។ លោកបន្ថែមថា ក្នុងករណីជម្ងឺឆ្លងដូចជាជំងឺកញ្ជ្រិល គឺគេត្រូវការឲ្យមនុស្សយ៉ាងហោច៩៥% ត្រូវតែចាក់ថ្នាំវ៉ាក់សាំងការពារ ទើបអាចជួយឲ្យមនុស្ស៥%ដែលនៅសល់ អាចគេចផុតពីការឆ្លងមេរោគជម្ងឺកញ្ជ្រិលបាន។
គួរកត់សំគាល់ថា នៅតាមប្រទេសខ្លះ មានប្រជាជនមួយចំនួនហាក់នឿយណាយ នឹងវិធានការបង្ការការឆ្លងរាលកូវីដ១៩ ដែលអាជ្ញាធរបានតម្រូវឲ្យអនុវត្ត ដូចជាការពាក់ម៉ាស ការលាងសម្អាតដៃនឹងអាល់កុល នឹងការរក្សាគម្លាតជាដើម។ ពួកគេយល់ថា គួរតែបើកចំហរ ឲ្យមេរោគនេះឆ្លងឲ្យបានសព្វក្នុងចំណោមប្រជាជន យូរៗទៅរាងកាយមនុស្សនឹងស៊ាំ លែងមានគ្រោះថ្នាក់ទៀតហើយ។
តែយ៉ាងណា ការយល់ឃើញបែបនេះ ត្រូវបានអ្នកជំនាញភាគច្រើន បដិសេធថាជារឿងគ្រោះថ្នាក់ ព្រោះវា យកជីវិតមនុស្សទៅប្រថុយ។ ចាប់តាំងពីផ្ទុះកូវីដ១៩មក មនុស្សជាង១លាននាក់ហើយបានស្លាប់។ ថ្នាំវ៉ាក់សាំង គឺជាក្តីសង្ឃឹមតែមួយគត់ ដើម្បីអាចប្រឈមនឹងមេរោគនេះ។ យោងតាមអង្គការសុខភាពពិភពលោក មានបេក្ខភាពវ៉ាក់សាំងប្រមាណ៤០ ហើយក្នុងចំណោមនេះ គឺមាន១០ ដែលស្ថិតក្នុងដំណាក់កាលសាកល្បងទី៣ ដែលជាដំណាក់កាលចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ