លោកម៉ាក្រុងប្តេជ្ញាការពារតម្លៃចំណេះដឹង និងការសិក្សាចំពោះមុខវិញ្ញាណក្ខន្ធលោកគ្រូSamuel Paty
អំពើឃាតកម្មសម្លាប់គ្រូបង្រៀនម្នាក់ ឈ្មោះ សាមុអ៊ែល ប៉ាទី នៅជាយពាយ័ព្យទីក្រុងប៉ារីស កាលពីថ្ងៃសុក្រសប្តាហ៍មុន បានបង្កឲ្យមានសេចក្តីតក់ស្លុតជាខ្លាំង នៅទូទាំងប្រទេសបារាំង។ គ្រូអនុវិទ្យាល័យអាយុ៤៧ម្នាក់នេះ ត្រូវបានជនអ៊ីស្លាមជ្រុលនិយមម្នាក់ សម្លាប់កាត់ក្បាល នៅក្បែរសាលារៀន ក្រោមហេតុផលថាគាត់ បានមើលងាយសាសនាអ៊ីស្លាម។ ឆ្លងកាត់លទ្ធផលនៃការស៊ើបអង្កេតបឋម ប្រកាសដោយរដ្ឋអាជ្ញាបារាំង កាលពីល្ងាចថ្ងៃពុធទី២១តុលា គឺឃាតករឈានទៅធ្វើអំពើព្រៃផ្សៃនេះ ក៏ដោយសារតែបានទទួលឥទ្ធិពល ពីសកម្មភាពបរិហារចោទប្រកាន់ នៅតាមបណ្តាញសង្គម ដែលរៀបចំប្រឌិត បង្កើតឡើងដោយឪពុកសិស្សស្រីម្នាក់ រួមសហការជាមួយនឹងសកម្មជនអ៊ីស្លាមជ្រុលនិយមម្នាក់ទៀត។
ចុះផ្សាយនៅថ្ងៃ៖
ស្តាប់ - ០៤:០៣
មរណៈភាពលោកគ្រូ សាមុអ៊ែល ប៉ាទី (Samuel Paty) ដោយស្នាដៃរបស់ក្រុមជនអ៊ីស្លាមជ្រុលនិយម បានធ្វើឲ្យសង្គមបារាំងទាំងមូល ក្រោកឈរឡើង ដើម្បីការពារមុខអាជីពគ្រូបង្រៀនដ៏មានសារៈសំខាន់ ព្រមទាំងសិទ្ធិសេរីភាពនៃការបញ្ចេញមតិ ដែលជាតម្លៃកំពូលនៃច្បាប់បារាំង។
កម្មវិធីរំលឹកវិញ្ញាណក្ខន្ធថ្នាក់ជាតិ ត្រូវបានប្រារព្ធឡើង នៅក្នុងបរិវេណសកលវិទ្យាល័យស៊កបូន Université de la Sorbonne Paris ដែលជានិម្មិតរូបធំបំផុត នៃវិស័យសិក្សាធិការជាតិបារាំង។ លោកប្រធានាធិបតីម៉ាក្រុង បានថ្លែងសន្ទរកថា រយៈពេលជាង១០នាទី ដើម្បីរំលឹកអំពីវីរៈភាពរបស់លោក សាមុអ៊ែល ប៉ាទី ក្នុងនាមជាគ្រូបង្រៀន ដែលមានកម្មវត្ថុតែមួយគត់ គឺបណ្តុះក្មេងជំនាន់ក្រោយ ឲ្យស្គាល់ពីតម្លៃនៃសិទ្ធិសេរីភាព៖
"ល្ងាចនេះ ខ្ញុំនឹងមិននិយាយអំពីពពួកក្រុមភេរជនអ៊ីស្លាមជ្រុលនិយម ដែលបានរួមគ្នាជំរុញឲ្យ អំពើយង់ឃ្នងនេះ អាចកើតទៅបាននោះទេ។ ហើយខ្ញុំក៏មិនរំលឹក អំពីឈ្មោះមនុស្សកំសាក ដែលបានចូលរួម សម្រេចអំពើព្រៃផ្សៃនេះឡើយ ព្រោះឈ្មោះទាំងនោះគ្មានតម្លៃអ្វីទាល់តែសោះ។
តែល្ងាចនេះ ខ្ញុំចង់និយាយពីមនុស្សម្នាក់ ដែលត្រូវជាកូន ជាបងប្រុស ជាឪពុកមា និងជា ឪពុកម្នាក់ជាទីស្រលាញ់បំផុត។ ខ្ញុំចង់និយាយពីមនុស្សម្នាក់ ដែលជាមិត្តរួមការងាររបស់អ្នក ជាគ្រូបង្រៀនរបស់អ្នក ហើយដែលមនុស្សម្នាក់នោះ ត្រូវបានគេសម្លាប់ ដោយសារតែគាត់បានជ្រើសរើសមុខអាជីពជាគ្រូបង្រៀន គាត់ត្រូវគេសម្លាប់ ដោយសារតែគាត់បានតាំងចិត្ត បណ្តុះបណ្តាលសិស្ស ឲ្យក្លាយជាពលរដ្ឋល្អ។
ល្ងាចនេះខ្ញុំសូមនិយាយពី លោកគ្រូ សាមុអ៊ែល ប៉ាទី។ លោកគ្រូ សាមុអែល ប៉ាទី ស្រលាញ់សៀវភៅលើសអ្វីៗទាំងអស់។ គាត់តែងយកសៀវភៅ ជាការចែករំលែកចំណេះដឹង មិនថាទៅកាន់ក្រុមគ្រួសារមិត្តភ័ក្តិ និងទៅកាន់សិស្សរបស់គាត់។ លោកគ្រូ សាមុអែល ប៉ាទី ស្រលាញ់ការបង្រៀន ជាទីបំផុត។
យើងគ្រប់គ្នា តែងតែចាំក្នុងជំរៅដួងចិត្តជានិច្ច នូវគ្រូបង្រៀនម្នាក់ ដែលបានផ្លាស់ប្តូរជីវិតយើង។ គ្រូបង្រៀនម្នាក់ ដែលបានបង្រៀនយើង ឲ្យចេះអានអក្សរ ឲ្យចេះរាប់លេខ ឲ្យមានភាពក្លាហាន មានទំនុកចិត្តលើខ្លួនឯង។ គ្រូបង្រៀនម្នាក់ ដែលមិនត្រឹមតែផ្ទេរចំណេះដឹងមកឲ្យយើងទេ តែគាត់បាន បង្ហាញផ្លូវជីវិតឲ្យយើងដើរ។
លោកគ្រូ សាមុអ៊ែល ប៉ាទី គឺមិនខុសពីលោកគ្រូទាំងនោះឡើយ ពោលគឺជាលោកគ្រូ ដែលយើងចងចាំ គ្មានថ្ងៃភ្លេច។ ជាគ្រូដែលបានបើកចំហរគំនិត ការយល់ឃើញ សតិស្មារតីរបស់យើង ឲ្យយល់ពីតម្លៃកំពូលនៃអរិយធម៌ បង្រៀនឲ្យយើងចេះគោរពគ្នា ស្រលាញ់គ្នា។
ទីនេះ ប្រទេសបារាំង យើងស្រលាញ់មាតុភូមិយើង យើងស្រលាញ់ប្រវត្តិសាស្ត្រ យើងស្រលាញ់ភូមិសាស្រ្តយើង ស្រលាញ់វប្បធម៌បារាំង ស្រលាញ់បេះដូងព្រលឹងជាតិបារាំង។ យើងចង់បណ្តុះបណ្តាលកូនចៅយើងទាំងអស់ ដោយឥតរើសអើងពណ៌សំបុរ ដើមកំណើត ឬសាសនា។
លោកគ្រូសាមុអ៊ែល ប៉ាទី ត្រូវបានគេសម្លាប់ ដោយសារតែគាត់ ជាមនុស្សម្នាក់តំណាងអោយសារធារណៈរដ្ឋ ដែលផ្ទេរចំណេះដឹងទៅកូនចៅជំនាន់ក្រោយនៅក្នុងថ្នាក់រៀនជានិរន្ត។ លោកគ្រូ ត្រូវបានពពួកជនអ៊ីស្លាមជ្រុលនិយមសម្លាប់ ព្រោះពួកនេះវាចង់បំផ្លាញអនាគតរបស់ជាតិយើង។ ពួកមនុស្សអស់នេះដឹងច្បាស់ថា បើមានវិរៈបុរសដូចជាលោកគ្រូ នោះពួកវានឹងមិនអាចសម្រេចបំណងដ៏លាមករបស់ពួកវាបានឡើយ។
ពួកយើងសូមប្តេជ្ញា ថានឹងការពារសិទ្ធិសេរីភាព ដែលលោកគ្រូតែងតែការពារបានយ៉ាងល្អ។ ហើយយើងនឹងលើកទូល គោលការណ៍មិនប្រកាន់សាសនាណាមួយ។ យើងនឹងផ្តល់សំណាង និងឱកាសទៅគ្រប់កូនចៅយើងទាំងអស់ ដោយឥតរើសអើងសោះឡើយ។
យុវជនវ័យក្មេង រាប់រយនាក់ ដែលលោកគ្រូបានបណ្តុះបណ្តាល នឹងបន្តប្រកាន់ជំហរស្មារតី វែកញែករកហេតុផល ប្រកបដោយភាពអង់អាចក្លាហាន ដែលលោកគ្រូធ្លាប់បានបង្រៀនពួកគេ។ ពួកគេខ្លះ ក៏នឹងអាចក្លាយជាគ្រូបង្រៀនដូចលោកគ្រូ ទៅថ្ងៃខាងមុខ។ ពេលនោះ គឺដល់វេនពួកគេ ដែលត្រូវបន្តវេន បណ្តុះបណ្តាលក្មេងជំនាន់ក្រោយទៀត។ នេះគឺជាកងចក្រនៃការផ្ទេរចំណេះដឹង ដល់ពលរដ្ឋជំនាន់ក្រោយ ដែលវិលគ្មានថ្ងៃឈប់។ លោកគ្រូដឹងទេ ថានៅប្រទេសបារាំង ពន្លឺនៃចំណេះដឹង ភ្លឺគ្មានគ្រារលត់ឡើយ៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ