ស្លូវ៉ាគីជាប្រទេសដំបូងគេក្នុងលោកដែលធ្វើតេស្តរកកូវីដលើប្រជាជននៅទូទាំងប្រទេស
ស្លូវ៉ាគី នៅថ្ងៃសៅរ៍ ទី៣១ តុលា បានក្លាយជាប្រទេសដំបូងបង្អស់ក្នុងពិភពលោកដែលបានផ្តើមយុទ្ធនាការធ្វើតេស្តរកកូវីដ១៩ លើប្រជាជនយ៉ាងទូលំទូលាយនៅពាសពេញផ្ទៃប្រទេស។ សម្រាប់ដំណាក់កាលទី១ នាចុងសប្តាហ៍នេះ បញ្ជរធ្វើតេស្តប្រមាណ ៥ពាន់ត្រូវបានដំឡើងដើម្បីផ្តល់ជូននូវការធ្វើតេស្តដល់ប្រជាជន។
ចុះផ្សាយនៅថ្ងៃ៖
ស្តាប់ - ០២:៣០
សម្រាប់ការធ្វើតេស្តយ៉ាងទូលំទូលាយនេះ ប្រទេសស្លូវ៉ាគី ប្រើវិធីតេស្តអង់ទីហ្សែន (Antigen tests) ដែលជាប្រភេទតេស្តផ្តល់លទ្ធផលក្នុងរយៈពេលលឿន ពោលគេអាចដឹងលទ្ធផលតែប៉ុន្មាននាទីប៉ុណ្ណោះក្រោយការធ្វើតេស្ត។ អ្នកដែលធ្វើតេស្តឃើញមានវិជ្ជមានជំងឺកូវីដ នឹងត្រូវដាក់ឲ្យធ្វើចត្តាឡីស័ករយៈពេល ១០ថ្ងៃ។
ការចូលរួមក្នុងការធ្វើតេស្តនេះ មិនមែនជាកាតព្វកិច្ចចាំបាច់នោះទេ ក៏ប៉ុន្តែក្នុងករណីមានប៉ូលិសសាកសួរ ហើយគេមិនមានឯកសារណាមួយបញ្ជាក់ថាអវិជ្ជមានកូវីដ១៩ទេនោះ គេអាចនឹងត្រូវរងការផាកពិន័យធ្ងន់ធ្ងរ។
នាយករដ្ឋមន្ត្រីស្លូវ៉ាគី លោកអ៊ីហ្គ្ររ ម៉ាតូវីក (Igor Matovic) បានមានប្រសាសន៍ថា ពិភពលោកកំពុងក្រឡេកទៅកាន់ប្រទេសរបស់លោក និងថាវិធានការធ្វើតេស្តយ៉ាងទូលំទូលាយនឹងជួយសង្គ្រោះជីវិតប្រជាជនជាច្រើនរាប់រយនាក់។
ជាមួយគ្នានេះ លោកម៉ាតូវីក បានបន្ថែមថាការធ្វើតេស្តគឺជាមាគ៌ារបស់ស្លូវ៉ាគីសម្រាប់ដើរឆ្ពោះទៅរកសេរីភាព។ លោកថាមានរឿងពីរដែលអាចនឹងកើតឡើងដែលទី១ គឺវិធានការរឹតត្បិតនៅក្នុងប្រទេសនឹងអាចត្រូវបន្ធូរបន្ថយនៅពេលដែលការធ្វើតេស្តបានបញ្ចប់។ ទី២ វិធានការរឹតត្បិតនឹងត្រូវពង្រឹងបន្ថែម ប្រសិនបើកម្មវិធីធ្វើតេស្តមិនអាចជួយអ្វីបានច្រើនដូចការរំពឹងទុករបស់រដ្ឋាភិបាលទេនោះ។
គួរកត់សម្គាល់ថា ដូចបណ្តាប្រទេសអឺរ៉ុបផេងទៀតដែរ ស្លូវ៉ាគី បានជួបកំណើនយ៉ាងខ្លាំងនៃករណីឆ្លងកូវីដ១៩ នៅមួយរយៈពេលចុងក្រោយនេះ។ តាមរបាយការណ៍ផ្លូវការនៅថ្ងៃសុក្រ ទី ៣០ តុលា មានអ្នកឆ្លងថ្មីចំនួន ៣ ៣៦៣ នាក់ និងបន្ទាប់មកមាន ២ ៥៧៣ នាក់នៅថ្ងៃសៅរ៍។ គិតត្រឹមថ្ងៃសៅរ៍ ទី៣១ តុលា ក្នុងចំណោមប្រជាជនសរុបទាំងអស់ ៥ លាន៤ សែននាក់ ស្លូវ៉ាគីមានអ្នកឆ្លងកូវីដ ៥៧ ៦៦៤ នាក់ និងមានស្លាប់ចំនួន ២១៩ នាក់។
រដ្ឋាភិបាលស្លូវ៉ាគី សង្ឃឹមថានឹងអាចបញ្ចប់ការធ្វើតេស្តទូទាំងប្រទេសក្នុងរយៈពេលពីរថ្ងៃ និងអនុវត្តការធ្វើតេស្តទ្រង់ទ្រាយធំមួយផ្សេងទៀតនៅចុងសប្តាហ៍ក្រោយ។ យ៉ាងណាក៏ដោយ កម្មវិធីនេះ បានរងការរិះគន់ពីសមាគមន៍អ្នកជំនាញថា រដ្ឋាភិបាលនៅមិនទាន់បានរៀបចំខ្លួនល្អទេ ព្រោះធ្វើដោយមិនបានពិគ្រោះជាមួយក្រុមអ្នកជំនាញ។
សមាគមន៍ខាងលើបានសង្កត់ធ្ងន់ទៀតថា ការប្រមូលផ្តុំនូវចំនួនមនុស្សដ៏ច្រើនកុះករ នៅតាមកន្លែងធ្វើតេស្ត គឺផ្ទុយនឹងអនុសាសន៍របស់អ្នកជំនាញជំងឺឆ្លងដែលប្រាប់ឲ្យកាត់បន្ថយទំនាក់ទំនង និងការចល័តផ្លាស់ទីតាមទីសាធារណៈច្រើនតាមដែលអាចធ្វើទៅបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ