ថ្នាំអាស្ពីរីន នឹងត្រូវយកទៅសាកល្បងព្យាបាលអ្នកជំងឺកូវីដ១៩ ក្នុងការសិក្សាសាកល្បងរបស់អង់គ្លេស
អ្នកជំនាញ នៃការសិក្សាស្រាវជ្រាវ រកថ្នាំព្យាបាលជំងឺកូវីដ១៩ របស់អង់គ្លេស បានសម្រេចចាត់បញ្ចូល ថ្នាំអាស្ពីរីន ទៅក្នុងចំណោមថ្នាំ ដែលត្រូវគេយកមកសាកល្បង ដើម្បីព្យាបាលអ្នកជំងឺកូវីដ១៩។ យោងតាមអ្នកជំនាញ ថ្នាំអាស្ពីរីន មានប្រសិទ្ធិជួយធ្វើឲ្យគ្រាប់ឈាម មានភាពរាវ មិនកកដុំ។ ដូច្នេះថ្នាំនេះ ប្រហែលជាអាច ជួយអ្នកជំងឺកូវីដ១៩ ដែលជួបបញ្ហា គ្រាប់ឈាមឡើងកក។
ចុះផ្សាយនៅថ្ងៃ៖
ស្តាប់ - ០២:៤៥
នៅក្នុងកម្មវិធីសិក្សាស្រាវជ្រាវរកថ្នាំព្យាបាលកូវីដ១៩ ឈ្មោះRECOVERY របស់អង់គ្លេស គឺគេបានសម្រេច បញ្ចូលថ្នាំ អាស្ពីរីន (Aspirine) ជាថ្នាំសាកល្បងក្នុងការព្យាបាលអ្នកជំងឺកូវីដ១៩។ អ្នកជំនាញរបស់ RECOVERY បានលើកឡើងថា អ្នកជំងឺកូវីដ១៩ អាចប្រឈមនឹងបញ្ហាគ្រាប់ឈាមឡើងកក និងអាចបណ្តាលឲ្យស្ទះសរសៃឈាម។ បញ្ហានេះ គឺដោយសារតែកោសិកា បង្កគ្រាប់ឈាម ធ្វើសកម្មភាពខ្លាំងលើសកម្រិត នៅពេលណាត្រូវប្រឈមនឹងមេរោគជំងឺកូវីដ១៩។
លោកវិជ្ជបណ្ឌិត Peter Horby អ្នកជំនាញទទួលខុសត្រូវម្នាក់ នៃកម្មវិធីសិក្សា RECOVERY បានបញ្ជាក់ថា អ្នកជំនាញមានហេតុផលគ្រប់គ្រាន់ ដែលទុកចិត្តថា ថ្នាំ អាស្ពីរីន អាចជួយអ្នកជំងឺកូវីដ១៩ កុំឲ្យជួបបញ្ហា កកគ្រាប់ឈាម នៅក្នុងសរសៃឈាម។ អ្នកជំនាញរូបនេះ បន្ថែមថា ជាងនេះទៀត ថ្នាំ អាស្ពីរីន ជាថ្នាំដែលត្រូវគេស្គាល់ និងប្រើប្រាស់ យូរយាមកហើយ ហើយជាថ្នាំដែលមានតម្លៃថោក អាចរកជាវបានគ្រប់ទីកន្លែង។
យោងតាមព័ត៌មានលំអិត នៅលើគេហទំព័រ RECOVERY គឺការសាកល្បង នឹងចាប់ផ្តើម ជាមួយនឹង អ្នកជំងឺកូវីដ១៩ ចំនួន២០០០នាក់ ដែលនឹងត្រូវទទួលថ្នាំអាស្ពីរីន កម្រិត១៥០មីលីក្រាម លាយជាមួយនឹងថ្នាំព្យាបាលផ្សេងទៀត។ បន្ទាប់មកទិន្នន័យសាកល្បងនេះ នឹងត្រូវយកទៅប្រៀបធៀប នឹងអ្នកជំងឺ២០០០នាក់ផ្សេងទៀត ដែលមិនទទួលថ្នាំអាស្ពីរីន។
សូមបញ្ជាក់ផងដែរថា កម្មវិធីសាកល្បង RECOVERY ក៏កំពុងសាកល្បងថ្នាំផ្សេងទៀតដែរ ក្នុងការព្យាបាលជំងឺកូវីដ១៩ ក្នុងនោះមានដូចជា ថ្នាំអង់ទីប្យូទិក Azithromycine និងសារធាតុអង់ទីក័រផ្សំ ឈ្មោះ Regeneron ដែលត្រូវបានគេចាក់សាកល្បង ទៅលើលោកដូណាល់ ត្រាំ។ គឺតាមរយៈកម្មវិធីសិក្សាសាកល្បង RECOVERY នេះដែរ ដែលបានបង្ហាញឲ្យឃើញអំពី ប្រសិទ្ធិភាពល្អ របស់ថ្នាំឈ្មោះ Dexamethasone នៅក្នុងការសង្រ្គោះជីវិតអ្នកជំងឺកូវីដ១៩។
គួររំលឹកថា ទន្ទឹមដែលពិភពលោកកំពុងទន្ទឹងរងចាំ ថ្នាំវ៉ាក់សាំងការពារជំងឺកូវីដ១៩ អ្នកជំនាញមួយចំនួន ក៏បានលើកឡើង អំពីសារៈសំខាន់ណាស់ដែរ នៅក្នុងការស្រាវជ្រាវរកថ្នាំព្យាបាលកូវីដ១៩។ ក្នុងករណីខ្លះ ថ្នាំព្យាបាល អាចត្រូវបានគេរកឃើញមុន ថ្នាំវ៉ាក់សាំងក៏មាន ជាក់ស្តែងជាថ្នាំព្យាបាលមេរោគអេដស៍ (HIV) ។ ផ្ទុយទៅវិញរហូតមកទល់ពេលនេះ គ្មានថ្នាំវ៉ាក់សាំង ប្រឆាំងមេរោគអេដស៍ទេ។ មន្ទីរពិសោធន៍បារាំងមួយ ឈ្មោះ Abivax កំពុងត្រូវបានគេចាប់អារម្មណ៍យ៉ាងខ្លាំង បន្ទាប់ពីមន្ទីរពិសោធន៍នេះ អះអាងថាកំពុងស្រាវជ្រាវលើម៉ូលេគុលថ្មីមួយ ឈ្មោះ ABX464 ដើម្បីព្យាបាលជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ