សហភាពអឺរ៉ុបសង្ឃឹមថា នឹងចាប់ផ្តើមយុទ្ធនាការចាក់វ៉ាក់សាំងកូវីដ១៩ នៅត្រីមាសទី១ឆ្នាំ២០២១
ស្ថានភាពឆ្លងរាលដាលជម្ងឺកូវីដ១៩ នៅតាមប្រទេសអឺរ៉ុបសឹងទាំងអស់ នៅតែស្ថិតក្នុងការព្រួយបារម្ភជាខ្លាំង។ វិធានការសុខាភិបាល ដើម្បីបង្ការការឆ្លងរាលដាល បានធ្វើឲ្យប៉ះពាល់យ៉ាងធ្ងន់ធ្ងរ ដល់សេដ្ឋកិច្ចអឺរ៉ុប។ គ្រប់គ្នាកំពុងរងចាំថ្នាំវ៉ាក់សាំង។ លោកស្រីប្រធានមជ្ឈមណ្ឌលគ្រប់គ្រងជម្ងឺនៅអឺរ៉ុប បានលើកឡើងថា លោកស្រីសង្ឃឹមថា អឺរ៉ុបនឹងអាចចាប់ផ្តើមយុទ្ធនាការចាក់វ៉ាក់សាំង ប្រឆាំងកូវីដ១៩ នៅរវាងត្រីមាសទីមួយ ឆ្នាំ២០២១។ ដំណឹងស្តីពីប្រសិទ្ធភាពល្អ របស់វ៉ាក់សាំង ផលិតដោយមន្ទីរពិសោធន៍ Pfizer និងBioNTech បានផ្តល់ក្តីសង្ឃឹមជាខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
លោកស្រី Andrea Ammon ប្រធានមជ្ឈមណ្ឌលគ្រប់គ្រងជម្ងឺនៅអឺរ៉ុប បាននិយាយថា ស្ថានភាពឆ្លងរាលដាលជម្ងឺកូវីដ១៩នៅអឺរ៉ុប នាពេលបច្ចុប្បន្ននេះ គឺមានគ្រោះថ្នាក់ខ្លាំងណាស់។ លោកស្រីបានអំពាវនាវ ឲ្យប្រជាជនអឺរ៉ុបទាំងអស់ ត្រូវតែប្រឹងប្រែង គោរពវិធានការបង្ការការឆ្លងរាលដាល ឲ្យខ្ជាប់ខ្ជួនជាទីបំផុត។ ទាក់ទិននឹងថ្នាំវ៉ាក់សាំងវិញ លោកស្រីលើកឡើងថា បើក្នុងន័យសុទិដ្ឋិនិយមបំផុត លោកស្រីសង្ឃឹមថា យុទ្ធនាការចាក់វ៉ាក់សាំង ប្រឆាំងកូវីដ១៩ នឹងអាចចាប់ផ្តើមបាន នៅក្នុងត្រីមាសទី១ ដើមឆ្នាំ២០២១នៅអឺរ៉ុប។ តែយ៉ាងណាលោកស្រី បញ្ជាក់ថា លោកស្រី មិនអាចអះអាងឲ្យច្បាស់នោះទេ ព្រោះមានដំណាក់ច្រើនទៀត ដែលត្រូវឆ្លងកាត់។
គួរបញ្ជាក់ថា ដំណឹងស្តីពីប្រសិទ្ធិភាពល្អ ប្រមាណ៩០% នៃវ៉ាក់សាំងស្រាវជ្រាវរួមគ្នា ដោយមន្ទីរពិសោធន៍អាមេរិក Pfizer និងមន្ទីរពិសោធន៍អាល្លឺម៉ង់ BioNTech បានធ្វើឲ្យគ្រប់គ្នា មានក្តីសង្ឃឹមជាខ្លាំង។ យ៉ាងណាមិញ នៅថ្ងៃពុធ ទី១១វិច្ឆិកា គណកម្មការអឺរ៉ុប បានបញ្ជាក់ថាខ្លួនទើបតែ បើកផ្លូវ អនុញ្ញាតឲ្យបញ្ជាទិញថ្នាំវ៉ាក់សាំងពីមន្ទីរពិសោធន៍ទាំង២នេះ ចំនួនប្រមាណ៣០០លានដូស។ ប្រភពមួយទៀត របស់ទីភ្នាក់ងារព័ត៌មានបារាំង AFP បញ្ជាក់ថា ទីភ្នាក់ងារឱសថអឺរ៉ុប អាចនឹងផ្តល់អាជ្ញាបណ្ណផលិត និងចែកចាយ ដល់វ៉ាក់សាំងប្រឆាំងកូវីដ១៩ នៅរវាងដើមឆ្នាំ២០២១។
គួរបញ្ជាក់ផងដែរ សហភាពអឺរ៉ុប បានបើកភ្លើងខៀវ ដល់កិច្ចសន្យាបញ្ជាទិញ ថ្នាំវ៉ាក់សាំង៣មុខផ្សេងទៀតរួចហើយ ដូចជា វ៉ាក់សាំងរបស់មន្ទីរពិសោធន៍អង់គ្លេស AstraZeneca និងពីមន្ទីរពិសោធន៍អាមេរិក Johnson & Johnson ម្នាក់ៗប្រមាណ៤០០លានដូស និងវ៉ាក់សាំងស្រាវជ្រាវដោយមន្ទីរពិសោធន៍ប៉ាស្ទឺបារាំង ជាមួយGSK ចំនួន៣០០លានដូសទៀត។
យ៉ាងណាក៏ដោយ លោកស្រី Stella Kyriakides ស្នងការអឺរ៉ុបទទួលបន្ទុកសុខាភិបាល បានលើកឡើងថា សម្រាប់ពេលនេះ គេមិនទាន់អាចអះអាងបានថា ពេលណានឹងទទួលបានថ្នាំវ៉ាក់សាំងមកចាក់ឲ្យប្រជាជននោះទេ។ លោកស្រីបញ្ជាក់ថា នៅមានដំណាក់កាលច្រើនណាស់ ដែលអ្នកជំនាញឱសថត្រូវពិនិត្យ មុននឹងអនុញ្ញាតចរចាវ៉ាក់សាំងនីមួយៗ ដើម្បីធានាថាវាពិតជាមានប្រសិទ្ធិភាព នឹងមិនប៉ះពាល់សុខភាព។ ទាំងនេះ វាគឺជាការងាររបស់ទីភ្នាក់ងារត្រួតពិនិត្យឱសថអឺរ៉ុប។ ហើយម្យ៉ាងទៀត វ៉ាក់សាំងកូវីដ១៩ ដែលនឹងទទួលបាននៅដំណាក់កាលដំបូង គឺនឹងត្រូវប្រើទៅលើក្រុមប្រជាជនដែលងាយរងគ្រោះ ដូចជាមនុស្សចាស់ជរា និងក្រុមបុគ្គលិកពេទ្យជាដើម។ លោកស្រីសង្កត់ធ្ងន់ថា អ្វីដែលយើងគ្រប់គ្នាត្រូវដឹង គឺថាមិនមែនមានវ៉ាក់សាំងភ្លាម ជម្ងឺកូវីដ១៩ និងត្រូវសាបរលាបក្នុងមួយថ្ងៃនោះទេ។ ដូច្នេះគ្រប់គ្នា ត្រូវតែប្រុងប្រយ័ត្ន គោរពវិធានការបង្កា ទប់ស្កាត់ការឆ្លងរាលដាល កុំធ្វេសប្រហែសឲ្យសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ