លោកបូរីស ចនសុន ត្រូវធ្វើចត្តាឡីស័ក ខណៈពេលកាន់តែខើចដើម្បីចរចាកិច្ចព្រមព្រៀងBrexit
លោកនាយករដ្ឋមន្ត្រីអង់គ្លេស បូរីស ចនសុន បានប្រាប់ឲ្យដឹងថា លោកនឹងត្រូវធ្វើចត្តឡីស័ក ដាក់ខ្លួនឲ្យនៅដាច់ដោយឡែក បន្ទាប់ពីលោកបានជួបប្រាស្រ័យជាមួយ មនុស្សម្នាក់ដែលមានផ្ទុកកូវីដ១៩។ ការធ្វើចត្តាឡីស័ករបស់លោកនាយករដ្ឋមន្ត្រីអង់គ្លេស គឺវាជួនចំពេល ដែលរដ្ឋាភិបាលអង់គ្លេស កំពុងជួបភាពរកាំរកូស ហើយជាងនេះទៀត ពេលវេលាក្នុងការចរចា ស្វែងរកកិច្ចព្រមព្រៀងជាមួយសហភាពអឺរ៉ុប គឺកាន់តែខើចទៅៗហើយ មុននឹងអង់គ្លេសផ្តាច់ខ្លួន ជាស្ថាពរពីសហភាពអឺរ៉ុប នៅដាច់ឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០២:៤២
លោកបូរីស ចនសុន បានសរសេរលើទំព័រ Twitter ថាលោកបានជួបប្រាស្រ័យជាមួយតំណាងរាស្រ្តម្នាក់ ដែលមានផ្ទុកកូវីដ១៩។ ដូច្នេះ លោកត្រូវតែធ្វើចត្តាឡីស័ក ដើម្បីបង្ការ កុំឲ្យឆ្លងទៅសមាជិកដទៃទៀតក្នុងរដ្ឋាភិបាល បើទោះបីជាលោកធ្លាប់ឆ្លងកូវីដ១៩ម្តងរួចហើយ និងមានអង់ទីក័រក្នុងខ្លួនក្តី។
គួរកត់សំគាល់ថា ដំណឹងនៃការធ្វើចត្តាឡីស័ក របស់លោកនាយករដ្ឋមន្ត្រីអង់គ្លេស បានមកបន្ថែម ធ្វើឲ្យអ្នកតាមដាននយោបាយអង់គ្លេស កាន់តែបារម្ភយ៉ាងខ្លាំង ព្រោះថាក្នុងអំឡុងពេលនេះ រដ្ឋាភិបាលអង់គ្លេស មានរឿងបន្ទាន់ដែលត្រូវដោះស្រាយច្រើនណាស់។ ក្រៅពីបញ្ហាជំងឺឆ្លងកូវីដ១៩ រដ្ឋាភិបាលអង់គ្លេស ត្រូវដោះស្រាយសំណុំរឿងធំមួយទៀត គឺការចរចាសម្រេចឲ្យបាន នូវកិច្ចព្រមព្រៀងជាមួយសហភាពអឺរ៉ុប មុននឹងចាកចេញជាស្ថាពរ នៅថ្ងៃទី៣១ធ្នូ។
ជាងនេះទៀត Dominic Cummings ទីប្រឹក្សាពិសេស និងជាមនុស្សជំនិតបំផុតរបស់លោកបូរីស ចនសុន បានលាឈប់ពីរដ្ឋាភិបាល កាលពីចុងសប្តាហ៍មុន ដោយទាំង លោក Lee Cain ប្រធានទំនាក់ទំនងទូទៅ របស់រដ្ឋាភិបាល ក៏បានលាឈប់ដែរ។ តាមដំណឹងពាក្យចចាមអារ៉ាមខ្លះ គឺដោយសារតែភាពប្រេះឆា ឈ្លោះគ្នាផ្ទៃក្នុងរដ្ឋាភិបាល។
យ៉ាងណាក៏ដោយ ការចរចាស្វែងរកកិច្ចព្រមព្រៀងជាមួយសហភាពអឺរ៉ុប គឺមិនអាចរងចាំបានឡើយ។ មន្ត្រីទូតនៅអឺរ៉ុប បានលើកឡើងថា គេចាប់ផ្តើមអស់សង្ឃឹមហើយ ព្រោះថាពេលវេលាកាន់តែខើច។ លោក Simon Coveney រដ្ឋមន្ត្រីការបរទេសអៀរឡង់ បានលើកឡើងថា អង់គ្លេសមានពេលយ៉ាងយូរបំផុត ២សប្តាហ៍ទៀតប៉ុណ្ណោះ ពុំនោះទេ នឹងត្រូវផ្តាច់ខ្លួនចេញពីអឺរ៉ុប ដោយគ្មានកិច្ចព្រមព្រៀងអ្វីទាំងអស់។
លោក Michel Barnier តំណាងសហភាពអឺរ៉ុបក្នុងការចរចា Brexit បានអះអាងថា ភាគីទាំងពីរបន្តការចរចា ដើម្បីស្វែងរកចំណុចស្របគ្នា ដែលនៅជាប់គាំង មានជាអាទិ៍ បញ្ហាបែងចែកដែនទឹកនេសាទ និងវិធានគ្រប់គ្រងការប្រកួតប្រជែងដោយសមភាព។ លោក Michel Barnier បន្ថែមថា សហភាពអឺរ៉ុប ចង់ឲ្យទំនាក់ទំនងរវាងអឺរ៉ុបនិងអង់គ្លេស នៅថ្ងៃអនាគត មានសមភាពគ្រប់វិស័យ។
ដោយឡែក លោកបូរីស ចនសុន បានអះអាងជាថ្មីថា លោកនឹងមិនព្រមទទួលជាដាច់ខាត បើកិច្ចព្រមព្រៀងនោះ ធ្វើឲ្យប៉ះពាល់ដល់អធិបតេយ្យភាពជាតិ របស់អង់គ្លេស។ តែយ៉ាងណា ការចាកចេញរបស់លោក Dominic Cummings ដែលជាមនុស្សមានជំហររឹងក្នុងរឿងBrexit នេះ បានធ្វើឲ្យអ្នកវិភាគ មានសង្ឃឹមថា លោកបូរីស ចនសុន អាចប្រហែលជាបន្ទន់ជំហរខ្លះ ហើយឈានទៅទទួលយកលក្ខខណ្ឌ របស់សហភាពអឺរ៉ុប ដើម្បីបញ្ចៀស កុំឲ្យផ្តាច់ខ្លួនដោយគ្មានកិច្ចព្រមព្រៀង នៅថ្ងៃទី៣១ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ