របាយការណ៍៖ អ្នកធ្លាប់ឆ្លងកូវីដ១៩ហើយម្តង អាចមានអង់ទីក័រការពារបានយ៉ាងហោច៦ខែ
របាយការណ៍ថ្មីមួយ របស់សកលវិទ្យាល័យ Oxford បានសន្និដ្ឋានថា អ្នកដែលធ្លាប់ឆ្លងមេរោគជំងឺកូវីដ១៩រួចហើយ គឺរាង្គកាយអាចបង្កើតជាប្រព័ន្ធការពារខ្លួន ធ្វើមិនឲ្យឆ្លងសាជាថ្មី យ៉ាងហោចរយៈពេល៦ខែ។ ការអង្កេតស្រាវជ្រាវនេះ ត្រូវបានធ្វើទៅលើមនុស្សចំនួន ១២១៨០នាក់ ដែលគឺជាបុគ្គលិកពេទ្យនៅប្រទេសអង់គ្លេស រវាងពីខែមេសា ដល់ខែវិច្ឆិកានេះ។
ចុះផ្សាយនៅថ្ងៃ៖
ស្តាប់ - ០២:២៥
លោក David Eyre អ្នកជំនាញស្រាវជ្រាវផ្នែកសុខភាព នៃសកលវិទ្យាល័យOxford ដែលបានចូលរួមសរសេររបាយការណ៍នេះ បានបញ្ជាក់ថា ក្នុងចំណោមអ្នកដែលបានចូលរួមក្នុងការសិក្សាស្រាវជ្រាវនេះ មាន១២៤៦នាក់ ដែលមានលទ្ធផលតេស្តវិជ្ជមានកូវីដ១៩ ដែលមានអង់ទីក័រក្នុងខ្លួន ហើយក្រោយមក មិនមានឆ្លងកូវីដ១៩សាជាថ្មីទេ។ ចំណែក មនុស្ស៨៩នាក់ ផ្សេងទៀត ដែលមានលទ្ធផលតេស្តអវិជ្ជមាន និងគ្មានអង់ទីក័រ ក្រោយមកបានឆ្លងកូវីដ១៩។ ដោយឡែក មានតែមនុស្ស៣នាក់ប៉ុណ្ណោះ ដែលមានអង់ទីក័រប្រឆាំងកូវីដ១៩រួចហើយ តែក្រោយមកបានឆ្លងមេរោគនេះម្តងទៀត ប៉ុន្តែមានសុខភាពល្អធម្មតាទេ។
អ្នកជំនាញរូបនេះអះអាងថា ជាការសន្និដ្ឋាន គឺអ្នកដែលឆ្លងកូវីដ១៩ម្តងហើយ គឺអាចមានអង់ទីក័រការពារខ្លួន ក្នុងរយៈពេលយ៉ាងហោច៦ខែ មិនឲ្យឆ្លងជាលើកទី២។ តែយ៉ាងណា លោកទទួលស្គាល់ថា កម្លាំងរបស់ប្រព័ន្ធអង់ទីក័រនេះ អាចចុះថយទៅតាមពេលវេលា។
គួរបញ្ជាក់ថា ការសិក្សានេះ នៅមិនទាន់ចប់នៅឡើយទេ ដោយក្រុមការងារនៅតែបន្តស្រង់ទិន្នន័យ។ មួយវិញទៀត ការសន្និដ្ឋាននេះ នៅមិនទាន់មានការផ្តល់យោបល់ ពីអ្នកជំនាញផ្សេងទៀតនៅឡើយដែរ។ អ្នកជំនាញសកលវិទ្យាល័យ Oxford កំពុងប្រមូលទិន្នន័យបន្ថែម ដើម្បីចង់ដឹងអំពីស្ថានភាពជំងឺមានកម្រិតធ្ងន់ធ្ងរប៉ុណ្ណា ក្នុងករណីមនុស្សម្នាក់ឆ្លងកូវីដ១៩ ជាលើកទី២ បើទោះបីជាមានប្រព័ន្ធអង់ទីក័រក្នុងខ្លួនរួចហើយក្តី។
ទោះយ៉ាងយ៉ាងក៏ដោយ នេះជារបាយការណ៍ សិក្សាស្រាវជ្រាវ ដែលបានបង្ហាញក្តីសង្ឃឹមខ្លះដែរ ខណៈដែលកន្លងមក អ្នកជំនាញមិនមានទិន្នន័យណាមួយ ស្តីអំពីប្រព័ន្ធអង់ទីក័រ របស់អ្នកដែលធ្លាប់ឆ្លងកូវីដ១៩ទេ។ យោងតាមតួលេខផ្លូវការ នៅទូទាំងពិភពលោក មានអ្នកឆ្លងកូវីដ១៩ ចំនួនជាង៥៦លាននាក់ ដែលក្នុងចំណោមនេះ គឺមានជាង៣៦លាននាក់ ដែលត្រូវគេចាត់ទុកថាបានជាសះស្បើយ។ បើមានប្រព័ន្ធអង់ទីក័រការពារ សម្រាប់អ្នកដែលជាសះស្បើយ អាចមានន័យថា អ្នកនោះនឹងមិនឆ្លងមេរោគនេះជាថ្មីទៀតទេ យ៉ាងហោចណាស់ ក្នុងរយៈពេលមួយកំណត់។
ដោយឡែក មានការសិក្សាស្រាវជ្រាវមួយទៀត ធ្វើឡើងដោយ Imperial College of London បានសន្និដ្ឋានថា ប្រព័ន្ធអង់ទីក័រក្នុងខ្លួនអ្នកដែលជាសះស្បើយពីកូវីដ១៩ គឺអាចរលាយសាបសូន្យទៅវិញក្នុងរយៈពេលខ្លី ជាពិសេសនោះ គឺក្នុងករណីដែលមនុស្សនោះ ពុំមានចេញជាអាការៈជម្ងឺ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ