ប្រជាជនស្វ៊ីសបោះឆ្នោតប្រជាមតិ ដើម្បី ទាមទារឲ្យក្រុមហ៊ុនគោរពបរិស្ថាន និងសិទ្ធិមនុស្ស នៅបរទេស
នៅក្នុងការបោះឆ្នោតប្រជាមតិ នៅពីថ្ងៃអាទិត្យ ប្រជាជនស្វ៊ីស ត្រូវឆ្លើយយល់ព្រម ឬ ប្រឆាំង នឹងសេចក្តីផ្តួចផ្តើម ដែលទាមទារឲ្យក្រុមហ៊ុនដែលមានទីស្នាក់ការនៅ ស្វ៊ីស គោរពបរិស្ថាន និងសិទ្ធិមនុស្ស នៅពេលធ្វើជំនួញនៅទឹកដីបរទេស។ សម្រាប់អង្គការ និងក្រុមសាសនា ដែលជាអ្នកផ្តួចផ្តើមគំនិត សំឡេងយល់ព្រម របស់ប្រជាជនស្វ៊ីស សំខាន់ព្រោះវានឹងជួយជំរុញ ឲ្យក្រុមហ៊ុនគោរពបទដ្ឋានអន្តរជាតិ ឲ្យបានខ្ជាប់ខ្ជួនជាងមុន។ ប៉ុន្តែ រដ្ឋាភិបាលស្វ៊ីសវិញ បានអំពាវនាវរួចហើយ ឲ្យប្រជាជនបោះឆ្នោត ប្រឆាំង ព្រោះថា សំណើខាងលើ នឹងធ្វើឲ្យសេដ្ឋកិច្ចស្វ៊ីស ខាតបង់ខ្លាំង។
ចុះផ្សាយនៅថ្ងៃ៖
ស្តាប់ - ០២:៥១
នៅថ្ងៃអាទិត្យ ប្រជាជនស្វ៊ីស ត្រូវសម្រេចអារកាត់ សំណើច្បាប់សំខាន់ពីរ ដែលស្នើឡើងដោយបណ្តាញសង្គមស៊ីវិល អ្នកនយោបាយ និងអ្នកច្បាប់។ សំណើទី១ មានគោលដៅ ជំរុញឲ្យក្រុមហ៊ុនអន្តរជាតិ ដែលមានទីស្នាក់ការនៅ ស្វ៊ីស ធ្វើជំនួញ ប្រកបដោយការទទួលខុសត្រូវ នៅបរទេស ចំណែកសំណើទី២ ដែលស្នើឡើងដោយសកម្មជនប្រឆាំងសង្រ្គាម មានគោលដៅទាមទារឲ្យធនាគារកណ្តាលស្វ៊ីស ឈប់ ផ្តល់ហិរញ្ញវត្ថុ ប្រាក់កម្ចី ដល់ក្រុមហ៊ុនដែលមានប្រាក់ចំណេញ ៥% បានពីការលក់អាវុធ។
ស្វ៊ីស ជាប្រទេសដ៏តូចមួយមែន ប៉ុន្តែ ប្រទេសដែលមិនធ្លាប់ជួបសង្រ្គាមមួយនេះ មានអានុភាព បោះដៃ ទៅគ្រប់កន្លែងក្នុងពិភពលោក។ ក្រុមហ៊ុនអន្តរជាតិធំៗ ហើយនិង ធនាគារល្បីៗ មានទីស្នាក់ការ នៅប្រទេសស្វ៊ីស ចំណែក ការដោះដូរ ពាណិជ្ជកម្មសំខាន់ៗ ក៏ធ្វើឡើង នៅទឹកដីស្វ៊ីស ដោយមកពី ច្បាប់ នយោបាយអនុគ្រោះពន្ធ។
សម្រាប់សមាជិកសភាមកពីគណបក្សឆ្វេងនិយម សាស្ត្រាចារ្យ និងក្រុមសាសនា អង្គការសង្គមស៊ីវិលចំនួន ១៣០ ដែលជាអ្នកផ្តួចផ្តើមគំនិត បង្កើតសេចក្តីព្រាងច្បាប់ ខាងលើ ក្រុមហ៊ុន ស៊្វីសជាច្រើនបានគិតគូរពីបញ្ហាសិទ្ធិមនុស្ស នៅក្នុងវិធានរបស់ក្រុមហ៊ុន ក៏ប៉ុន្តែ នៅតែមិនគ្រប់គ្រាន់ ព្រោះវាធ្វើឡើងទៅតាមឆន្ទៈតែប៉ុណ្ណោះ។ ដើម្បី បញ្ចុះបញ្ចូលឲ្យប្រជាជនស្វ៊ីស បោះឆ្នោត យល់ព្រមគាំទ្រសំណើច្បាប់ របស់ខ្លួន ក្រុមអ្នកផ្តួចផ្តើមគំនិត បានធ្វើយុទ្ធនាការ ឃោសនាក្នុងទ្រង់ទ្រាយធំ ដែលនៅក្នុងនោះ គេបានបង្ហាញ រូបភាពប្រជាជនដែលរងគ្រោះ ដោយសារតែមុខជំនួញរបស់ក្រុមហ៊ុន ដែលមានទីស្នាក់ការនៅ ប្រទេសស្វ៊ីស។
ឧទាហរណ៍ គេបានលើកយកករណីកុមារ និងប្រជាជនដែលរងគ្រោះ មានបញ្ហាសុខភាព ដោយសារតែ សារធាតុពុល ហូរចេញមកពីអាជីវកម្មជីករ៉ែរបស់ក្រុមហ៊ុនមួយ ដែលមានការិយាល័យ នៅ ទីក្រុង Barr ប្រទេសស្វ៊ីស។
ទៅតាមសំណើរបស់ក្រុម អ្នកផ្តួចផ្តើមឲ្យមានច្បាប់ស្តីពីការទទួលខុសត្រូវរបស់ក្រុមហ៊ុន បុគ្គល ឬអង្គការដែលវាយតម្លៃថា ក្រុមហ៊ុនអន្តរជាតិ បានចូលរួមបំផ្លាញបរិស្ថាន ឬ ចូលរួមរំលោភសិទ្ធិមនុស្ស អាចនឹងមានសិទ្ធិ ដាក់ពាក្យប្តឹងទៅកាន់តុលាការស្វ៊ីស ជាទីដែលមានទីស្នាក់ការធំរបស់ក្រុមហ៊ុន។ នៅតុលាការ ដើមបណ្តឹង អាចទាមទារសំណងខូចខាត ដែលបង្កឡើងដោយក្រុមហ៊ុន ដែលមានទីតាំងនៅស្វ៊ីស។ គឺបណ្តឹងតវ៉ានៅតុលាការ ដែលធ្វើឲ្យក្រុមហ៊ុនអន្តរជាតិ ធំៗនៅស្វ៊ីស ភ័យ ព្រួយបារម្ភនិងខ្លាច ថា ខ្លួនត្រូវជាប់ឈ្មោះ ស្អុយអាក្រក់ មុននឹងត្រូវលាងសំអាត មកវិញ នៅក្រោយការដេញដោល បង្ហាញភស្តុតាង នៅទីបញ្ចប់។
សំណើច្បាប់ ពីខាងគណបក្សឆ្វេងនិយម និងអង្គការស៊ីវិល បានរងការរិះគន់ពីរដ្ឋាភិបាល និងរដ្ឋសភាស្វ៊ីស ដែលបានអំពាវនាវឲ្យប្រជាជនបោះឆ្នោត មិនគាំទ្រ។ សម្រាប់រដ្ឋាភិបាលស្វ៊ីស សំណើរបស់អ្នកផ្តួចផ្តើមគំនិត ជ្រុលហួសហេតុ និងធ្វើឲ្យប៉ះពាល់ដល់សេដ្ឋកិច្ច បំផ្លាញ បរិយាកាសធ្វើជំនួញ នៅស្វ៊ីស។ តាមរដ្ឋាភិបាល ដដែល ក្រុមហ៊ុនអន្តរជាតិជាច្រើន ដែលជាអ្នកបង្កើតការងារ សម្រាប់ប្រជាជនស្វ៊ីស នឹងអាចរើ ចេញពីប្រទេស ស្វ៊ីស ដោយសារតែសំណើច្បាប់ខាងលើ។
រដ្ឋាភិបាលបានដាក់សំណើច្បាប់ថ្មីមួយ ទៀត ដែលប្រឆាំង នឹងសំណើច្បាប់របស់ក្រុមអង្គការ។ តាមសំណើច្បាប់របស់រដ្ឋាភិបាល ក្រុមហ៊ុនត្រូវគិតគូរពីបញ្ហាបរិស្ថាន នៅពេលធ្វើជំនួញនៅបរទេស ប៉ុន្តែ មិនរងការដាក់ពិន័យ។ ក្នុងករណី សំណើច្បាប់របស់ក្រុមអង្គការ បរាជ័យមិនបានទទួលសំឡេងគាំទ្រ នៅក្នុងការបោះឆ្នោតប្រជាមតិ នៅថ្ងៃអាទិត្យ សំណើច្បាប់របស់រដ្ឋាភិបាល នឹងចូលជាធរមាន ដោយស្វ័យប្រវត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ