ប្រធានាធិបតីបារាំងស្វាគមន៍សមភាគីអេហ្ស៊ីប ដោយនិយាយតិចតួចពីបញ្ហាសិទ្ធិមនុស្ស
ប្រធានាធិបតីអេហ្ស៊ីប លោក អាប់ឌែល ហ្វាតា អាល់ស៊ីស៊ី Abdel Fattah al-Sissi កំពុងបំពេញទស្សនកិច្ចផ្លូវរដ្ឋនៅប្រទេសបារាំង ដែលផ្តោតជាសំខាន់ទៅលើបញ្ហាសន្តិសុខ។ នាឱកាសនេះប្រធានាធិបតីបារាំង បានសម្តែងអំណរគុណអេហ្ស៊ីប ដែលបានគាំទ្រយុទ្ធនាការប្រយុទ្ធប្រឆាំងនឹងការស្អប់ខ្ពើមបារាំង នៅក្នុងបណ្តាប្រទេសអារ៉ាប់។ ប៉ុន្តែប្រធានបទសិទ្ធិមនុស្សអាចនឹងធ្វើឱ្យដៃគូបារាំងអេហ្ស៊ីបទើសទាល់នឹងគ្នាខ្លាំង។
ចុះផ្សាយនៅថ្ងៃ៖
ក្នុងជំនួបជាមួយប្រធានាធិបតីបារាំងអេម៉ានុយអែលម៉ាក្រុង នាព្រឹកថ្ងៃចន្ទទី៧ ធ្នូ២០២០នេះ ប្រមុខដឹកនាំបារាំងនិងអេហ្ស៊ីប បានជជែកពិភាក្សាអំពីប្រធានបទសំខាន់ៗក្នុងតំបន់ជាច្រើនដូចការប្រយុទ្ធប្រឆាំងនឹងភេរវនិយម វិបត្តិនៅលីប៊ី ជម្លោះអ៊ីស្រាអែល-ប៉ាឡេស្ទីន អ៊ីរ៉ង់ លីបង់ ព្រោះអេហ្ស៊ីបជាដៃគូយុទ្ធសាស្ត្ររបស់បារាំង។
“បារាំងនិងអេហ្ស៊ីប រួបរួមគ្នាស្ថាបនាពិភពមួយមានអរិយធម៌ គ្មានការប្រហារជីវិត និង គ្មានការស្អប់ខ្ពើមគ្នាព្រោះចង់បញ្ចេញមតិទេ”។ នេះជាការអះអាងរបស់លោកម៉ាក្រុង ប្រធានាធិបតីបារាំង ដោយបានទទូចឱ្យអេហ្ស៊ីប ដែលរងការរិះគន់ពីសំណាក់អង្គការការពារសិទ្ធិមនុស្សនានា បើកចំហប្រទេសបែបប្រជាធិបតេយ្យ និងសង្គមស៊ីវិលសកម្ម។
ថ្វីបើបារាំងបានបង្ហើបអំពីបញ្ហាសិទ្ធិមនុស្សក្នុងជំនួបជាមួយសមភាគីអេហ្ស៊ីបនិងបានអបអរការដោះលែងមេដឹកនាំចលនាទាមទារសិទ្ធិបុគ្គលអេហ្ស៊ីបបីនាក់មែន ប៉ុន្តែលោក ម៉ាក្រុង បដិសេធមិនយកបញ្ហាសិទ្ធិមនុស្សនេះមកធ្វើជាលក្ខខណ្ឌនៃការរឹតចំណងភាពជាដៃគូយុទ្ធសាស្ត្រនឹងគ្នាទេ។
បើតាមក្រុមអ្នកការពារសិទ្ធិមនុស្ស អេហ្ស៊ីបមានឃុំឃាំងអ្នកទោសមនសិកាជាង៦ម៉ឺននាក់។ តាំងពីឡើងកាន់អំណាចមក រដ្ឋាភិបាលរបស់ លោក អាល់ស៊ីស៊ី បានធ្វើការបង្ក្រាបរាល់គ្រប់ទម្រង់ មិនថាជាបក្សប្រឆាំង ក្រុមជ្រុលនិយមអ៊ីស្លាម ឬក្រុមអ្នកសេរីនិយមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ