កូវីដ១៩៖ AztraZeneca អះអាងថាបានរកវិធី ធ្វើឲ្យវ៉ាក់សាំងខ្លួនមានប្រសិទ្ធិភាព១០០%
មន្ទីរពិសោធន៍ឱសថរបស់អង់គ្លេស AztraZeneca បានបញ្ជាក់ឲ្យដឹង កាលពីថ្ងៃទី២៧ធ្នូថា អ្នកជំនាញខ្លួន បានរកវិធីបានសម្រេច ដើម្បីធ្វើឲ្យវ៉ាក់សាំងកូវី៩របស់ខ្លួន មានប្រសិទ្ធិភាពខ្ពស់ រហូតដល់១០០%។ នេះជាដំណឹងល្អមួយ ខណៈដែលរដ្ឋាភិបាលអង់គ្លេស កំពុងត្រៀមបើកយុទ្ធនាការចាក់វ៉ាក់សាំងទូទាំងប្រទេស នៅដើមឆ្នាំ២០២១ ហើយដែលគេបានផ្តល់ក្តីសង្ឃឹមធំដល់វ៉ាក់សាំងនេះ ព្រោះវាមានតម្លៃថោក និងងាយស្រួលស្តុកទុក។
ចុះផ្សាយនៅថ្ងៃ៖
ស្តាប់ - ០២:២៥
លោក Pascal Soriot អគ្គនាយកមន្ទីរពិសោធន៍ AztraZeneca បានអះអាងប្រាប់កាសែត Sunday Times ថា វ៉ាក់សាំងផលិតដោយមន្ទីរពិសោធន៍លោក សហការជាមួយសកលវិទ្យាល័យ Oxford គឺអាចមានប្រសិទ្ធិភាពខ្ពស់ ១០០% ក្នុងការប្រឆាំងនឹងទំរងធ្ងន់ធ្ងរនៃជម្ងឺកូវីដ១៩។ លោកបានពន្យល់ថា អ្នកជំនាញបានរកឃើញវិធី ការចាក់វ៉ាក់សាំងនេះ ២លើក ដោយមួយលើកចំនួន១ដូស ទៅលើមនុស្សម្នាក់ គឺអាចធ្វើឲ្យបង្កើនប្រសិទ្ធិភាពនៃវ៉ាក់សាំង។
សូមរំលឹកថា យោងតាមលទ្ធផលសិក្សាសាកល្បងពាក់កណ្តាល ដែលបានធ្វើនៅអង់គ្លេស និងប្រេស៊ីល វ៉ាក់សាំងរបស់មន្ទីរពិសោធន៍ AztraZeneca មានប្រសិទ្ធិភាពត្រឹមតែប្រមាណ៧០%ប៉ុណ្ណោះ ពោលគឺទាបជាងវ៉ាក់សាំងរបស់ BioNTech/Pfizer និង Moderna ដែលមានប្រសិទ្ធិភាពសុទ្ធតែជាង៩០%។
តែយ៉ាងណា អ្នកជំនាញរបស់មន្ទីរពិសោធន៍ AztraZeneca បានលើកឡើងពន្យល់ថា នៅក្នុងពេលចាក់សាកល្បង គឺគេបានចែកមនុស្សជា២ក្រុម ដោយក្រុមទី១ ត្រូវទទួលការចាក់ចំនួន២លើក មួយលើកមួយដូស ឃ្លាតគ្នាមួយខែ។ តែពេលប្រតិបត្តិការគឺមានការភ័ន្តច្រឡំ ដោយលើកទីមួយ មានអ្នកខ្លះបានទទួលបានតែកន្លះដូស។ សម្រាប់ក្រុមទីមួយនេះ លទ្ធផលប្រសិទ្ធិភាព គឺមាន៩០%។ ចំណែកក្រុមទី២ គឺបានទទួលការចាក់ចំនួនតែមួយលើកទេ តែចាក់ម្តងចំនួន២ដូសតែម្តង។ សម្រាប់ក្រុមនេះ លទ្ធផលប្រសិទ្ធិភាព គឺមានត្រឹមតែ ៦២%។
គួរបញ្ជាក់ថា វ៉ាក់សាំងរបស់មន្ទីរពិសោធន៍ AztraZeneca ត្រូវបានគេរំពឹងរងចាំខ្លាំងជាងគេ ដោយសារតែវ៉ាក់សាំងនេះ មានតម្លៃថោក ពោលគឺប្រមាណតែ ៤ដុល្លារប៉ុណ្ណោះ ក្នុងមួយដូស ហើយមួយវិញទៀត វ៉ាក់សាំងនេះ អាចរក្សាទុកបាននៅក្នុងទូទឹកកកធម្មតា ដោយមិនចាំបាច់ ទុកក្នុងទូបង្កកមានសីតុណ្ហភាព ដល់ទៅក្រោម៨០°C ដូចវ៉ាក់សាំងរបស់ Pfizer នោះទេ។
យ៉ាងណាមិញ អាជ្ញាធរឱសថអង់គ្លេស កំពុងតែរៀបចំផ្តល់ភ្លើងខៀវ ឲ្យវ៉ាក់សាំងរបស់ AztraZeneca ក្នុងពេលដ៏ឆាប់នេះ ដើម្បីចាប់ផ្តើមបើកយុទ្ធនាការចាក់ នៅថ្ងៃទី៤មករា។ អង់គ្លេសបានបញ្ជាទិញវ៉ាក់សាំង AztraZeneca ចំនួន១០០លានដូស។ ទាក់ទិននឹងមេរោគកូវីដ១៩ដែលបំប្លែងខ្លួនថ្មីវិញ លោកអគ្គនាយកមន្ទីរពិសោធន៍ AztraZeneca បានអះអាងថា មិនប៉ះពាល់ដល់ប្រសិទ្ធិភាពវ៉ាក់សាំងទេ។ តែយ៉ាងណាមន្ទីរពិសោធន៍នេះ នឹងចាប់ផ្តើមត្រៀមស្រាវជ្រាវវ៉ាក់សាំងថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ