ក្រូអាស៊ី រងគ្រោះ ដោយសារការញ្ជួយដី ក្នុងកម្រិត ៦,៤មាត្រដ្ឋាន រិចទែរ
ក្រូអាស៊ី នៅតំបន់បាល់កង់បានរងគ្រោះ ដោយសារគ្រោះរញ្ជួយដី ពីរថ្ងៃជាប់ៗគ្នា។ នៅថ្ងៃអង្គារ ការរញ្ជួយប្រឹថពីក្នុងកម្រិត ៦,៤មាត្រដ្ឋាន រិចទែរបានបំផ្លាញធ្ងន់ធ្ងរ ផ្ទះសម្បែង អគារសាលារៀន និងបានសម្លាប់ក្មេងស្រីម្នាក់ នៅ ទីក្រុង Petrinja ភាគកណ្តាលប្រទេស។ កម្លាំងរញ្ជួយដីនៅ ក្រូអាស៊ីបានលាតសន្ធឹង ទៅដល់ប្រទេសជិតខាងស្លូវ៉ានី ហើយនិងប្រទេសក្នុងតំបន់ផ្សេងទៀត ដូចជា ហុងគ្រី និងអូទ្រីសជាដើម។
ចុះផ្សាយនៅថ្ងៃ៖
ចំណុចរញ្ជួយស្ថិតនៅក្នុងជម្រៅដី ១០គីឡូម៉ែត្រ និងឆ្ងាយ ពីរដ្ឋធានី Zagreb របស់ប្រទេសក្រូអាស៊ី ប្រមាណ ៥០គីឡូម៉ែត្រ ប៉ុន្តែ វាមានកម្លាំងខ្លាំង ទៅរង្គោះរង្គើ រញ្ជួយដល់រដ្ឋធានី Zagreb រហូតធ្វើឲ្យប្រជាជនភ័យខ្លាចរត់ចេញពីផ្ទះសម្បែង ទៅឈរនៅលើផ្លូវ គ្រប់គ្នា កាលពី ថ្ងៃអង្គារ។
នៅទីក្រុង Petrinja ដែលស្ថិតនៅចម្ងាយតែ ២គីឡូម៉ែត្រ ពីចំណុចរញ្ជួយ ក្រុមជួយសង្រ្គោះបន្ទាន់ និងទាហានក្រូអាស៊ី ត្រូវបានពង្រាយភ្លាមៗ ដើម្បី ស្វែងរក អូសទាញ មនុស្សចេញពីគំនរថ្មអគារបែកបាក់ ដោយសារកម្លាំងរញ្ជួយដី ដែលមានកម្រិត ៦,៤មាត្រដ្ឋានរិចទែរ។
តាមតួលេខបឋមរបស់ប៉ូលិសក្រូអាស៊ី មានក្មេងស្រី អាយុ ១២ឆ្នាំម្នាក់ ស្លាប់ និងមនុស្ស២០នាក់ត្រូវបានបញ្ជូនទៅ មន្ទីរពេទ្យ ដែលក្នុងនោះ ២នាក់រងរបួសធ្ងន់។ សម្រាប់នាយករដ្ឋមន្រ្តី ក្រូអាស៊ី លោក Andrej Plenkovic អគារភាគច្រើន របស់ទីក្រុង Petrinja រងការខូចខាតធ្ងន់ធ្ងរ និងគ្រោះថ្នាក់ ខ្លាំង សម្រាប់ប្រជាជន។ ដូច្នេះ លោកបានប្រកាសបញ្ជូនផ្ទះកុងតឺណ័រ សម្រាប់ឲ្យប្រជាជន ស្នាក់នៅបណ្តោះអាសន្ន ក្នុងពេលរង់ចាំការវាយតម្លៃ ការខូតខាតពីអ្នកជំនាញ។
ក្រូអាស៊ី ជាប្រទេសបាល់កង់ មួយដែលឧស្សាហ៍រងគ្រោះដោយសារការរញ្ជួយដី ព្រោះវាលាតសន្ធឹងនៅលើតំបន់ដែលមានគ្រោះរញ្ជួយដីសកម្មខ្លាំង។ នៅថ្ងៃចន្ទ ក្រូអាស៊ីបានរងគ្រោះម្តងហើយដោយសារគ្រោះរញ្ជួយដីតូចមួយ ដែលមិនបានបង្កការខូចខាតធ្ងន់ធ្ងរ ដូចថ្ងៃអង្គារនោះទេ។
នៅ ថ្ងៃ អង្គារ គ្រោះរញ្ជួយដីនៅ ក្រូអាស៊ី បានរញ្ជួយទៅដល់ប្រទេសហុងគ្រី អូទ្រីស។ ស្លូវ៉េនី ដែលមានព្រំដែនជាប់ជាមួយ ក្រូអាស៊ី បានសម្រេច បិទជាបន្ទាន់ រោងចក្រនុយក្លេអ៊ែរ តែមួយ របស់ខ្លួន។ តាមទីភ្នាក់ងារព័ត៌មានស្លូវ៉េនី STA ការបិទរោងចក្រនុយក្លេអ៊ែរ ជាដំណើរការប្រុងប្រយ័ត្នធម្មតា ក្នុងករណីមានគ្រោះរញ្ជួយដីក្នុងកម្រិតធ្ងន់ធ្ងរ។ វិធានការបិទរោងចក្រនុយក្លេអ៊ែរដែលអាចផលិត អគ្គិសនី ៧០០ម៉េហ្កាវ៉ាត់ អាចប៉ះពាល់ទៅដល់ការផ្គត់ផ្គង់អគ្គិសនី ទាំងនៅ ស្លូវ៉េនី និងក្រូអាស៊ី ព្រោះថា ប្រទេសទាំងពីរបានចែករំលែក ប្រើរួមគ្នារោងចក្រ ដែលសាងសង់ ឡើងតាំងពី សម័យយូហ្គោស្លាវី។ នៅ ក្រោយ ដាក់ឲ្យដំណើរការ អស់៤០ឆ្នាំ គេត្រូវបិទរោងចក្រនុយក្លេអ៊ែរ មួយនេះ នៅឆ្នាំ ២០២៣។ ប៉ុន្តែ ទាំងរដ្ឋាភិបាលស្លូវ៉េនី និងក្រូអាស៊ីបានសម្រេចកាលពីឆ្នាំ ២០១៥ ថា នឹងបន្តប្រើប្រាស់រោងចក្រនុយក្លេអ៊ែរ ដ៏ចំណាស់មួយនេះ ក្នុងរយៈពេល ២០ឆ្នាំទៀត ពោលគឺ រហូតដល់ឆ្នាំ ២០៣៥ ដោយមិនខ្វល់ពីកង្វល់ និងការតវ៉ា របស់ក្រុមអង្គការការពារបរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ