វ៉ាក់សាំងAstraZeneca គ្មានប្រសិទ្ធិភាពលើមេរោគកូវីដបំប្លែងខ្លួនថ្មីមកពីអាហ្វ្រិកខាងត្បូង
ជាវ៉ាក់សាំងលក់ក្នុងតម្លៃថោក និងងាយស្រួលស្តុក ដឹកជញ្ជូន វ៉ាក់សាំងរបស់ក្រុមហ៊ុនអង់គ្លេស AstraZenecaនឹងគ្មានប្រសិទ្ធិភាព ទប់ទល់នឹងមេរោគកូវីដ បំប្លែងខ្លួនថ្មី ដែលមានប្រភពមកពី អាហ្វ្រិកខាងត្បូងនោះទេ។ នេះបើតាមប្រធានក្រុមស្រាវជ្រាវរបស់សកលវិទ្យាល័យ Oxford ដែលសហការផលិតវ៉ាក់សាំងជាមួយក្រុមហ៊ុនAstraZeneca។ មានប្រទេសជាច្រើន បានផ្តល់អាជ្ញាបណ្ណ ឲ្យប្រើប្រាស់វ៉ាក់សាំង របស់ក្រុមហ៊ុន AstraZeneca ប៉ុន្តែ នៅ ក្នុងរង្វង់សហភាពអឺរ៉ុប អាជ្ញាធរសុខាភិបាលណែនាំឲ្យគេចាក់វ៉ាក់សាំង AstraZenecaសម្រាប់មនុស្សដែលមានអាយុ ក្រោម ៦៥ឆ្នាំ ដោយសារថា គេគ្មានតួលេខច្បាស់ដែលបង្ហាញថា វ៉ាក់សាំង មានប្រសិទ្ធិភាពសម្រាប់មនុស្សចាស់ ដែលមានអាយុ លើសពី៦៥ឆ្នាំឡើងទៅ។
ចុះផ្សាយនៅថ្ងៃ៖
ស្តាប់ - ០២:៤៧
ជាប់ចំណាត់ថ្នាក់លេខ ២ បន្ទាប់ពីអាមេរិក ខាងមានប្រជាជនទទួលបានវ៉ាក់សាំងបង្ការកូវីដច្រើនជាងគេ ក្នុងពិភពលោក ប្រមាណ ១១លាននាក់ អង់គ្លេសនៅមិនទាន់ធូរស្រាលចិត្តទាំងស្រុងនោះទេ។ ក្រោយរដ្ឋាភិបាល ចាប់ផ្តើមបើកយុទ្ធនាការចាក់វ៉ាក់សាំងផលិតក្នុងស្រុក AstraZeneca អ្នកដឹកនាំការសិក្សាថ្មីរបស់ក្រុមហ៊ុន AstraZenecaបានអះអាងថា វ៉ាក់សាំង AstraZenecaដែលងាយស្រួលស្តុក ដឹកជញ្ជូន និងមានតម្លៃថោក គ្មានប្រសិទ្ធិភាពទៅលើមេរោគបំប្លែងខ្លួនថ្មី ដែលមានប្រភពមកពីអាហ្វ្រិកខាងត្បូងនោះទេ។
ប្រឈមនឹងមេរោគបំប្លែងខ្លួនថ្មីមកពី អាហ្រ្វិកខាងត្បូង ដែលគេរកឃើញមានជាង១០០ករណីនៅ ទឹកដី អង់គ្លេស ក្រុមហ៊ុន AstraZeneca បានធ្វើការសិក្សាថ្មី ទៅលើក្រុមមនុស្ស ២ពាន់នាក់ ដើម្បី ចង់ដឹងថា តើវ៉ាក់សាំងមានប្រសិទ្ធិភាពទប់ទល់នឹងមេរោគបំប្លែងខ្លួនថ្មី ដែលមានប្រភពមកពីអាហ្វ្រិកខាងត្បូង ដែរឬទេ។ ការសិក្សាដែលត្រូវចេញផ្សាយជាផ្លូវការ នៅថ្ងៃចន្ទនេះ បានបង្ហាញថា វ៉ាក់សាំង AstraZenecaគ្មានប្រសិទ្ធិភាព ប្រឆាំងមេរោគបំប្លែងខ្លួនថ្មី មកពីអាហ្វ្រិកខាងត្បូងនោះទេ ប៉ុន្តែ វាអាចជួយទប់ទល់ កុំឲ្យស្ថានភាពអ្នកជំងឺធ្លាក់ធ្ងន់ធ្ងរ ត្រូវចូលសម្រាកព្យាបាល នៅមន្ទីរពេទ្យ ឬ នៅបន្ទប់សង្រ្គោះបន្ទាន់។
ក្នុងបទសម្ភាសន៍ជាមួយទូរទស្សន៍អង់គ្លេស BBC លោកAndrew Pollard សាស្ត្រាចារ្យផ្នែកជំងឺឆ្លង និងប្រព័ន្ធភាពស៊ាំ និងជាប្រធានក្រុមអង្កេត លើការសាកល្បងវ៉ាក់សាំង AstraZenecaបាននិយាយថា ការសិក្សាបញ្ជាក់កាន់តែច្បាស់ថា ជំងឺរាតត្បាតកូវីដ ១៩ នឹងនៅតែអាចរកផ្លូវ ទៅឆ្លងអ្នកដែលទទួលបានវ៉ាក់សាំង រួចហើយ។ នេះជារឿងដែលគេធ្លាប់រំពឹងថា នឹងអាចកើតមាន។
សម្រាប់ សាស្រ្តាចារ្យ Sarah Gilbert ដែលជាប្រធានក្រុមសា្រវជា្រវវ៉ាក់សាំងOxford ដែលរួមសហការជាមួយ AstraZeneca ថ្វីបើវ៉ាក់សាំង AstraZeneca មិនអាចការពារពីការឆ្លងមេរោគបំប្លែងខ្លួនកូវីដ មកពី អាហ្វ្រិកខាងត្បូង ប៉ុន្តែ ប្រសិទ្ធិភាពរបស់វា ដើម្បីកុំឲ្យមនុស្សធ្លាក់ខ្លួនឈឺខ្លាំង នឹងទៅជួយសម្រាលបន្ទុករបស់មន្ទីរពេទ្យ មួយចំណែកដែរ។ មួយវិញទៀត មន្ទីរពិសោធន៍របស់សកលវិទ្យាល័យOxford និងក្រុមហ៊ុន AstraZenecaកំពុងសិក្សាបន្ថែម ដើម្បី អាចផលិតវ៉ាក់សាំង ថ្មី ដែលអាចប្រឆាំង នឹងមេរោគបំប្លែងខ្លួន មកពីអាហ្វ្រិកខាងត្បូង ដែលនឹងអាចចេញរូបរាង នៅអំឡុងរដូវក្តៅខាងមុខ។
ប្រឈមនឹងមេរោគបំប្លែងខ្លួនថ្មី មានវ៉ាក់សាំងរបស់ក្រុមហ៊ុនPfizer Moderna និង AstraZenecaដែលមានប្រសិទ្ធិភាព ទប់ទល់នឹងមេរោគបំប្លែងខ្លួន មកពីអង់គ្លេស។ ប៉ុន្តែ មានតែ Pfizer ប៉ុណ្ណោះដែលអះអាងថា វ៉ាក់សាំង របស់ខ្លួនមានប្រសិទ្ធិភាព ទប់ទល់នឹងមេរោគបំប្លែងខ្លួន មកពីអាហ្វ្រិកខាងត្បូង ចំណែកក្រុមហ៊ុនModerna ធ្លាប់បានប្រកាសថា ខ្លួនកំពុងអភិវឌ្ឍវ៉ាក់សាំងប្រភេទថ្មី សម្រាប់ប្រឆាំងមេរោគបំប្លែងខ្លួនថ្មី មកពីអាហ្វ្រិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ