ក្រុមអ្នកជំនាញ៖ជំងឺកូវីដ១៩ នឹងគ្មានទីបញ្ចប់ បើប្រទេសទាំងអស់ក្នុងលោកមិនទទួលបានវ៉ាក់សាំង
ក្រុមអ្នកជំនាញបានព្រមានក្នុងថ្ងៃសៅរ៍ ទី១៣ កុម្ភៈថា វ៉ាក់សាំងបង្ការកូវីដ១៩ នឹងមិនអាចបិទបញ្ចប់ការឆ្លងរាលដាលបានឡើយ ប្រសិនបើប្រទេសទាំងអស់នៅក្នុងលោកមិនទទួលបានវ៉ាក់សាំងឆាប់ៗ និងស្មើភាពគ្នាទេនោះ។ ការព្រមាននេះបានធ្វើឡើង ខណៈដែលមានប្រទេសជាច្រើនកំពុងពិចារណាពីការចង់បង្កើតឲ្យមានលិខិតបញ្ជាក់ចាក់វ៉ាក់សាំងចំពោះអ្នកដែលបានចាក់វ៉ាក់សាំងរួច មុននឹងធ្វើដំណើរចេញទៅបរទេស។ តាមក្រុមអ្នកជំនាញដដែល ការដែលក្រុមប្រទេសអ្នកមានស្រវ៉ាយកវ៉ាក់សាំងតែឯងនឹងបង្កឲ្យមានហានិភ័យនៃការអូសបន្លាយវិបត្តិសុខភាពសកល។
ចុះផ្សាយនៅថ្ងៃ៖
ស្តាប់ - ០២:២១
ការព្រមានយ៉ាងដូចនេះរបស់ក្រុមអ្នកជំនាញបានធ្វើឡើងនៅលិខិតមួយចុះផ្សាយដោយទស្សនាវដ្តីវិទ្យាសាស្រ្តអង់គ្លេសឈ្មោះ The Lancet។ លោក Olivier Wouters អ្នកជំនាញមកពី London School of Economics and Political Science.បានបញ្ជាក់ដោយមិនលាក់លៀមថា វ៉ាក់សាំងបង្ការកូវីដ១៩ ជាវ៉ាក់សាំងដែលពិភពលោកសព្វថ្ងៃត្រូវការខ្លាំងជាងវ៉ាក់សាំងផ្សេងៗទៀតនៅក្នុងប្រវត្តិសាស្រ្ត។ តែដើម្បីអាចបង្កើតឲ្យមានអង់ទីកសមូហភាពសម្រាប់ការពារនឹងការឆ្លងជំងឺកូវីដ១៩ បាន ពិភពលោកត្រូវមានវ៉ាក់សាំងគ្រប់គ្រាន់ ហើយការចែកចាយវ៉ាក់សាំងទៀតសោតក៏ត្រូវធ្វើឡើងឲ្យបានឆាប់ និងស្មើភាពសម្រាប់គ្រប់ប្រទេសទាំងអស់ នេះជាការអះអាងរបស់ក្រុមអ្នកជំនាញ។
តាមក្រុមអ្នកជំនាញ ការដែលក្រុមប្រទេសអ្នកមានបូមយកវ៉ាក់សាំងតែឯង និងការប្រកាន់ជាតិនិយមវ៉ាក់សាំងអាចធ្វើឲ្យយន្តការកូវ៉ាក់របស់អង្គការសុខភាពពិភពលោកប្រឈមនឹងកង្វះវ៉ាក់សាំងរយៈពេលច្រើនឆ្នាំ។ គួររម្លឹកថា យន្តការកូវ៉ាក់នេះមានកម្មវត្ថុផ្តល់វ៉ាក់សាំងបង្ការកូវីដ១៩ ទៅឲ្យក្រុមប្រទេសក្រីក្រ និងក្រុមប្រទេសកំពុងអភិវឌ្ឍ។ ក្រុមអ្នកជំនាញដដែលបានកត់សម្គាល់ឃើញថា ក្រុមប្រទេសអ្នកមានតំណាងឲ្យតែ ១៦% នៃប្រជាជនសរុបក្នុងលោកទេ តែបែរជាមានវ៉ាក់សាំងក្នុងដៃដល់ទៅ ៧០% ពោលគ្រប់គ្រាន់ដើម្បីអាចចាក់ឲ្យប្រជាជនខ្លួនបានច្រើនដងឯណោះ។ លោក Mark Jit អ្នកជំនាញមកពី London School of Hygiene and Tropical Medicine មានការសោកស្តាយដែលក្រុមប្រទេសអ្នកមានបានបង្ការទុកវ៉ាក់សាំងក្នុងបរិមាណដ៏ច្រើនរបៀបនេះ។
យ៉ាងណាក៏ដោយ និងដើម្បីឲ្យពិភពលោកមានវ៉ាក់សាំងបង្ការកូវីដ១៩ គ្រប់គ្រាន់ឆាប់ៗ ក្រុមអ្នកជំនាញបានអំពាវនាវឲ្យក្រុមហ៊ុនផលិតវ៉ាក់សាំងបញ្ជូនបច្ចេកវិទ្យាទៅឲ្យក្រុមប្រទេសកំពុងអភិវឌ្ឍដើម្បីឲ្យប្រទេសទាំងនោះអាចផលិតវ៉ាក់សាំងដោយខ្លួនឯង។ ទន្ទឹមគ្នានេះ ក្រុមអ្នកជំនាញក៏បានស្នើឲ្យមានយន្តការត្រួតពិនិត្យលើតម្លៃវ៉ាក់សាំងដែលបច្ចុប្បន្នមានតម្លៃខ្ពស់ជ្រុល។ តែក្រុមអ្នកជំនាញសង្ឃឹមថា បើអង្គការសុខភាពពិភពលោកអនុញ្ញាតឲ្យប្រើវ៉ាក់សាំងរបស់ចិន និងរុស្ស៊ីនៅថ្ងៃណាមួយនោះ ការប្រឈមនឹងកង្វះវ៉ាក់សាំងក៏អាចមិនសូវមានខ្លាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ