អង្គការសុខភាពពិភពលោកពិចារណាអំពីការចែកចាយថ្នាំបង្ការ AstraZeneca ដល់ប្រទេសក្រីក្រ
នៅអង់គ្លេស រដ្ឋាភិបាលសម្រេចកម្មវត្ថុ ចាក់វ៉ាក់សាំងកូវីដជូនប្រជាជនបានតាមផែនការកំណត់ពីដំបូងរបស់ខ្លួន។ ចំណែកប្រទេសក្រីក្រវិញ ក៏ជិតបានទទួលថ្នាំបង្ការកូវីដ-១៩ ព្រោះនៅថ្ងៃចន្ទនេះ អង្គការសុខភាពពិភពលោកត្រូវជួបប្រជុំគ្នា ដើម្បីសម្រេចអនុញ្ញាតឲ្យចែកចាយវ៉ាក់សាំង AstraZeneca មួយទៀត សម្រាប់យកទៅចែកចាយជូនប្រទេសក្រីក្រ តាមកម្មវិធីរបស់អង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៥៨
ក្រុមអ្នកជំនាញនៃអង្គការសុខភាពពិភពលោក ត្រូវជួបប្រជុំគ្នានៅថ្ងៃចន្ទទី ១៥កុម្ភៈនេះ ដើម្បីផ្តល់សេចក្តីសម្រេច “បន្ទាន់” ឱ្យប្រើប្រាស់ថ្នាំវ៉ាក់សាំងរបស់ក្រុមហ៊ុនអង់គ្លេស Oxford-AstraZeneca សម្រាប់ចែកចាយជូនប្រទេសក្រីក្រ ដែលខ្វះខាតថ្នាំបង្ការប្រឆាំងនឹងកូវីដ១៩។ ជាថ្នាំបង្ការរបស់ក្រុមហ៊ុនអង់គ្លេស AstraZeneca ដែលផលិតនៅក្នុងប្រទេសផ្សេង។
កាលពីថ្ងៃសុក្រទី ១២កុម្ភៈ អង្គការសុខភាពពិភពលោក បានពិភាក្សាគ្នារួចហើយអំពីលទ្ធភាពអនុញ្ញាតឱ្យប្រើប្រាស់ថ្នាំបង្ការ ផលិតនៅក្នុងប្រទេសកូរ៉េខាងត្បូង។ នៅថ្ងៃនេះ ជាការពិភាក្សាអំពីថ្នាំបង្ការផលិតនៅក្នុងប្រទេសឥណ្ឌា ដោយក្រុមហ៊ុនSerum Institute។ ក្រុមអ្នកជំនាញនឹងផ្តល់សេចក្តីសម្រេចឱ្យថ្នាំបង្ការទាំងពីរប្រភេទនេះ នៅរវាងពីរបីថ្ងៃទៀតខាងមុខ។
ក្នុងពេលទន្ទឹមគ្នានេះ នៅក្នុងប្រទេសអង់គ្លេស ការចាក់ថ្នាំបង្ការប្រព្រឹត្តទៅបានល្អដូចផែនការ។ គិតត្រឹមពាក់កណ្តាលខែកុម្ភៈ ប្រជាពលរដ្ឋបួនប្រភេទដែលមានអាទិភាពជាងគេ គឺមនុស្សចាស់អាយុលើស៧០ឆ្នាំ បុគ្គលិកសុខាភិបាលដែលនៅជួរមុខ បុគ្គលិកធ្វើការនិងអ្នករស់នៅក្នុងមណ្ឌលចាស់ជរា ព្រមទាំងអ្នកជំងឺងាយរងគ្រោះ បានទទួលថ្នាំបង្ការកូវីដ។ ពោលគឺអង់គ្លេសបានចាក់ថ្នាំបង្ការជូនប្រជាពលរដ្ឋបានជាង ១៥លាននាក់ ក្នុងចំណោមប្រជាពលរដ្ឋអង់គ្លេសសរុប៦៦លាននាក់។ រដ្ឋាភិបាលអង់គ្លេសរបស់លោក បូរីសចនស៊ុន សង្ឃឹមថានឹងអាចបើកសាលារៀនឡើងវិញចាប់ពីថ្ងៃទី ៨មីនាទៅ និងបើកប្រទេសឡើងវិញបន្តិចម្តង។ ប៉ុន្តែចាប់ពីថ្ងៃចន្ទនេះទៅអ្នកដំណើរមកពីប្រទេសមានហានិភ័យខ្ពស់នឹងជាប់ចត្តាឡីស័កសិន។
ចំណែកជប៉ុនវិញ រដ្ឋាភិបាលទើបបានផ្តល់ការព្រមព្រៀង កាលពី ថ្ងៃអាទិត្យទី ១៤កុម្ភៈ ឱ្យប្រើប្រាស់ថ្នាំវ៉ាក់សាំងរបស់ក្រុមហ៊ុនPfizer/BioNTech។ យុទ្ធនាការចាក់ថ្នាំបង្ការនឹងចាប់ផ្តើមនៅថ្ងៃពុធទី១៧កុម្ភៈ។ បុគ្គលិកសុខាភិបាលចំនួន១ម៉ឺនទៅ ២ម៉ឺននាក់បានទទួលថ្នាំបង្ការមុនគេ។ មនុស្សចាស់ចាប់ពីខែមេសាដោយប្រើថ្នាំបង្ការរបស់ក្រុមហ៊ុនផ្សេង។
ថ្នាំវ៉ាក់សាំងចំនួន ១៧២,១០លានដូស ត្រូវបានចាក់ជូនពលរដ្ឋនៅក្នុង ៩៥ប្រទេស នៅលើភពផែនដី គិតត្រឹមថ្ងៃ១៤ កុម្ភៈ ២០២១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ