អង់គ្លេស ជំរុញការទំលាក់អាវុធបណ្តោះអាសន្ន នៅតាមតំបន់មានជម្លោះ ដើម្បីចាក់វ៉ាក់សាំងកូវីដ១៩
រដ្ឋមន្ត្រីការបរទេសអង់គ្លេស បានថ្លែងថាប្រទេសលោក និងប្រឹងប្រែងជំរុញក្រុមប្រឹក្សាសន្តិសុខ នៃអង្គការសហប្រជាជាតិ ឲ្យសម្រេចឲ្យបាននូវសេចក្តីសម្រេចចិត្តរួមមួយ ឈានទៅដាក់កំហិតការទំលាក់អាវុធជាបណ្តោះអាសន្ន នៅតាមតំបន់មានជម្លោះទូទាំងពិភពលោក។ ការទំលាក់អាវុធ នឹងអនុញ្ញាតផងដែរ ឲ្យអនុវត្តការចាក់វ៉ាក់សាំងប្រឆាំងកូវីដ១៩ នៅតាមតំបន់ប្រឈមគ្រោះថ្នាក់ទាំងនោះ។
ចុះផ្សាយនៅថ្ងៃ៖
ស្តាប់ - ០២:១៩
លោក ដូមីនីក រ៉ាប រដ្ឋមន្ត្រីការបរទេសអង់គ្លេស បានលើកឡើងថា វាគឺជាកាតព្វកិច្ចមនសិកាជាមនុស្ស របស់យើងទាំងអស់គ្នា ដែលត្រូវតែដាក់សំពាធ ធ្វើយ៉ាងណា ជំរុញឲ្យមានការទំលាក់អាវុធ ឈប់បាញ់ជាបណ្តោះអាសន្ន និងជាបន្ទាន់ នៅក្នុងកាលៈទេសៈដ៏លំបាក នាពេលបច្ចុប្បន្ននេះ។ លោកអះអាងថា វាគឺជារឿងបន្ទាន់បំផុត ដែលត្រូវបើកការចាក់វ៉ាក់សាំងប្រឆាំងកូវីដ១៩ ទៅលើប្រជាជនប្រមាណ១៦០លាននាក់ នៅតាមតំបន់ដែលកំពុងតែមានសង្រ្គាម ជម្លោះប្រដាប់អាវុធ ដូចជានៅយេម៉ែន សូម៉ាលី អេត្យូពី និង ស៊ូដង់ខាងត្បូង។
សូមបញ្ជាក់ថា ខែកុម្ភៈនេះ អង់គ្លេសមានតួនាទីជាប្រធានវិលជុំ នៃក្រុមប្រឹក្សាសន្តិសុខ។ នៅក្នុងក្របខណ្ឌ Covax អង់គ្លេសបានចូលជាថវិកា ចំនួន៦៣០លានអឺរ៉ូ ដើម្បីទិញវ៉ាក់សាំងកូវីដ១៩ ជួយប្រទេសក្រីក្រ។ នៅក្នុងគំរោងសេចក្តីសម្រេចចិត្តរបស់អង់គ្លេស ក៏មានកំណត់ផងដែរ អំពីការបែងចែងវ៉ាក់សាំងប្រឆាំងកូវីដ១៩ ឲ្យមានសមភាពនៅទូទាំងពិភពលោក។
លោកស្រី Barbara Woodward ឯកអគ្គរាជទូតអង់គ្លេសប្រចាំអង្គការសហប្រជាជាតិ បានទទួលស្គាល់ថា ការអនុវត្តសេចក្តីសម្រេចចិត្តរួមនេះ នឹងត្រូវការឲ្យមានការប្រឹងប្រែងខ្លាំងណាស់ ទាំងនយោបាយការទូត ទាំងការចាត់ចែងឡូជីស្ទីក និងផ្នែកហិរញ្ញវត្ថុ។ លោកស្រីបន្ថែមថា មានប្រទេសខ្លះបាន ផ្តួចផ្តើមគំនិតរួចហើយ ដូចជារុស្ស៊ី និងចិន តាមរយៈការចែកចាយវ៉ាក់សាំង ដែលប្រទេសទាំងនេះអាចផលិតខ្លួនឯងបាន ហើយដោយសង្ឃឹមថានឹងបានចំណេញមុខមាត់ការទូត។ សម្រាប់លោកស្រី ការងារដែលត្រូវធ្វើបន្ទាន់ គឺត្រូវស្វែងរក ការសហការ គូសវាសផែនការរួម និងកម្មវត្ថុរួម ជាមួយប្រទេសទាំងអស់នេះ។
គួរបញ្ជាក់ថា យន្តការ Covax របស់អង្គការសុខភាពពិភពលោក សង្ឃឹមថា នឹងអាចចែកចាយ វ៉ាក់សាំងប្រឆាំងកូវីដ ទៅឲ្យប្រទេសក្រីក្រ ចំនួនប្រមាណ៣៣៧លានដូស នៅក្នុងឆមាសទីមួយ ឆ្នាំ២០២១នេះ។ ក្នុងចំណោមវ៉ាក់សាំងទាំងនេះ គឺភាគច្រើនជាវ៉ាក់សាំងរបស់មន្ទីរពិសោធន៍អង់គ្លេសAstraZeneca ហើយដែលត្រូវផលិតនៅកូរ៉េខាងត្បូង និងនៅឥណ្ឌា។ វ៉ាក់សាំងរបស់មន្ទីរពិសោធន៍ AstraZeneca មានចំណុចល្អមួយ គឺអាចស្តុកទុកក្នុងទូទឹកកធម្មតា ដែលងាយស្រួលក្នុងការដឹកជញ្ជូន និងចែកចាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ