សហភាពអឺរ៉ុបស្នើឲ្យដាក់ពិន័យនយោជក ដែលមិនគោរពសមភាពប្រាក់ខែរវាងបុរសនិងស្ត្រី
គណកម្មការអឺរ៉ុប បានស្នើកាលពីថ្ងៃព្រហស្បតិ៍ម្សិលមិញ នូវវិធានច្បាប់មួយ ដើម្បីការពារសមភាពប្រាក់ខែ រវាងបុរសនិងស្ត្រី។ ប្រទេសសមាជិក ត្រូវតែដាក់ពិន័យជាប្រាក់ ដើម្បីចាប់បង្ខំ ឲ្យក្រុមហ៊ុនសហគ្រាស ឬស្ថាប័នទាំងអស់ ត្រូវតែគោរពឲ្យបាន ថាចំពោះការងារដូចគ្នា ស្ត្រីនិងបុរស ត្រូវតែទទួលបានប្រាក់ខែស្មើគ្នា។ តែយ៉ាងណាក៏ដោយ អ្នកជំនាញខ្លះ បាន រិះគន់ថាសំណើរបស់គណកម្មការអឺរ៉ុបនេះ មានកំណត់នូវយន្តការដែលមិនឆ្លើយតប ទៅនឹងការអនុវត្តជាក់ស្តែង។
ចុះផ្សាយនៅថ្ងៃ៖
ស្តាប់ - ០២:៤៩
ទិវាសិទ្ធិនារីអន្តរជាតិ ៨មីនា ខិតជិតមកដល់ លោកស្រី Ursula von der Leyen ប្រធានគណកម្មការអឺរ៉ុប បានបញ្ចេញនូវសំណើមួយ ដើម្បីការពារ គោលការណ៍សមភាពប្រាក់ខែ រវាងបុរសនិងស្ត្រី។ ប្រទេសសមាជិកសហភាពអឺរ៉ុប ត្រូវតែ ដាក់ចេញនូវទណ្ឌកម្ម ពិន័យជាប្រាក់ ទៅលើកក្រុមហ៊ុន សហគ្រាស ឬស្ថាប័ន ដែលមិនគោរពគោលការណ៍នេះ។ លោកស្រី ប្រធានគណកម្មការអឺរ៉ុប បានបន្ថែមថា ចាំបាច់ត្រូវតែមានតម្លាភាពលើប្រាក់ខែ ដើម្បីឲ្យស្ត្រីអាចដឹងថា សិទ្ធិរបស់ខ្លួន ត្រូវគេរំលោភបំពានឬអត់។
តែយ៉ាងណាក៏ដោយ លោកស្រី Esther Lynch អគ្គលេខាធិការរងនៃសហព័ន្ធសហជីពអឺរ៉ុប(CES) បានលើកឡើងថា សំណើរបស់គណកម្មការអឺរ៉ុប គឺពេញដោយគោលការណ៍ល្អៗ។ តែការពិត សំណើនេះ មិនបានកំណត់នូវយន្តការអនុវត្តជាក់ស្តែង ដើម្បីធ្វើឲ្យមានការផ្លាស់ប្តូរដោយវិជ្ជមាន និងដោយឆាប់រហ័សនោះទេ។ សហព័ន្ធសហជីពអឺរ៉ុប នឹងព្យាយាមដាក់សំពាធទៅសមាជិកសភាអឺរ៉ុប ឲ្យពិនិត្យកែលំអ ខ្លឹមសារនៃសំណើរបស់គណកម្មអឺរ៉ុបនេះ។
សូមបញ្ជាក់ថា នៅអឺរ៉ុប សមភាពប្រាក់ខែ រវាងបុរសនិងស្ត្រី គឺជាសិទ្ធិដែលត្រូវបានទទួលស្គាល់តាំងតែពីឆ្នាំ១៩៥៧ម្លេះ។ តែយ៉ាងណា រហូតមកទល់បច្ចុប្បន្ន ស្ត្រីនៅតែទទួលបានប្រាក់កំរៃ តិចជាបុរស។ យោងតាមគណកម្មការអឺរ៉ុប រវាងបុរសនិងស្ត្រី ដែលមានមុខងារការងារស្មើគ្នា គំលាតប្រាក់ខែគឺមានចំនួនជាមធ្យម ១៤.១%។ ហើយគំលាតនេះ គឺមានកាន់តែខ្ពស់ ជាពិសេសនៅក្នុងតាមក្រុមហ៊ុនសហគ្រាសឯកជន។ ដោយឡែក ប្រាក់ចូលនិវត្តន៍វិញ គឺស្ត្រីទទួលបានតិចជាងបុរសជាមធ្យម៣០%។
លោកស្រី Helena Dalli ស្នងការអឺរ៉ុបទទួលបន្ទុកសមភាព បានទទួលស្គាល់ថា ការរើសអើងផ្នែកប្រាក់ខែ ដោយឈរលើភេទ គឺជាបញ្ហាដែលមានលក្ខណៈជាប្រព័ន្ធ ហើយដែលជនរងគ្រោះពិបាកនឹងបង្ហាញភស្តុតាងណាស់។ ប៉ុន្តែជាមួយនឹងវិធានច្បាប់ តម្លាភាពប្រាក់ខែ ព្រមទាំងយន្តការចាប់បង្ខំឲ្យគោរពអនុវត្ត គឺស្ត្រីអាចនឹងមានលទ្ធភាពទទួលបានព័ត៌មាន និងទិន្នន័យ ស្តីពីកម្រិតនៃប្រាក់ខែរបស់ខ្លួន ដោយប្រៀបធៀបទៅនឹងបុគ្គលិកបុរស។ ក្នុងន័យនេះ ស្ត្រីរងគ្រោះ អាចទាមទារសំណងជំងឺចិត្ត និងអាចប្តឹងទៅតុលាការបាន។
គួរកត់សំគាល់ថា ក្រៅពីបញ្ហាគំលាតប្រាក់ខែ ចំនួនស្ត្រីនៅតិចជាងបុរស នៅក្នុងមុខងារទទួលខុសត្រូវធំៗ។ គណកម្មការអឺរ៉ុបខ្លួនឯង ក៏មានការលំបាកដែរ ក្នុងការធានាឲ្យបាននូវសមភាព ក្នុងចំណោមបុគ្គលិក និងសមាជិកខ្លួន។ លោកស្រី Ursula von der Leyen បានមានៈយ៉ាងលំបាក ទំរាំតែប្រមូលបានក្រុមការងារលោកស្រី ដែលមានស្ត្រីចំនួន១៣រូប និងបុរស១៤រូប តំណាងឲ្យប្រទេសសមាជិកទាំង២៧ នៃសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ