របាយការណ៍៖ បារាំងខ្វាក់ភ្នែក មើលមិនឃើញអំពើប្រល័យពូជសាសន៍នៅរវ៉ាន់ដា
រដ្ឋាភិបាលបារាំង នៅសម័យដឹកនាំរបស់លោកប្រធានាធិបតី ហ្វ្រង់ស័រ មីទែរ៉ង់ មានចំណែកទទួលខុសត្រូវលើអំពើប្រល័យពូជសាសន៍នៅរវ៉ាន់ដា។ នេះបើតាមរបាយការណ៍ កម្រាស ១ពាន់ទំព័រ ដែលគណៈកម្មការប្រមូលផ្តុំដោយ អ្នកស្រាវជ្រាវ និងប្រវត្តិវិទូបារាំង បានដាក់ជូនលោកប្រធានាធិបតី បារាំង អេម៉ានុយអែល ម៉ាក្រុង កាលពីថ្ងៃសុក្រទី២៦មីនា ២០២១។ កាលពី ២៦ឆ្នាំមុន អំពើប្រល័យពូជសាសន៍របស់ជនជាតិហ៊ូទូ ទៅលើប្រជាជន ទូតស៊ី នៅរវ៉ាន់ដា បានសម្លាប់មនុស្សជាង ៨សែននាក់។
ចុះផ្សាយនៅថ្ងៃ៖
ស្តាប់ - ០៣:១៥
នៅក្នុងរបាយការណ៍ដែលគេទន្ទឹងរង់ចាំជាយូរ ដើម្បី ស្វែងយល់ពីតួនាទី និងការជាប់ពាក់ព័ន្ធរបស់បារាំងនៅក្នុងអំពើប្រល័យពូជសាសន៍ នៅប្រទេសរវ៉ាន់ដា គណៈកម្មការដែលប្រមូលផ្តុំដោយក្រុមអ្នកស្រាវជ្រាវ និងប្រវត្តិវិទូបារាំង ចំនួន១៥រូប បានសន្និដ្ឋានថា រដ្ឋាភិបាលបារាំង នៅក្នុងជំនាន់ដឹកនាំរបស់លោកប្រធានាធិបតីហ្វ្រង់ស័រ មីតេរ៉ង់ មានចំណែកទទួលខុសត្រូវ ក្នុងអំពើប្រល័យពូជសាសន៍ ទៅលើជនជាតិទូតស៊ី នៅរវ៉ាន់ដា។ តាមគណៈកម្មការខាងលើ បារាំងបានចូលរួមមួយចំណែក ធ្វើឲ្យកើតមានអំពើប្រល័យពូជសាសន៍ ប៉ុន្តែ បារាំង មិនបានឃុបឃិតសម្លាប់ប្រល័យពូជសាសន៍ ជនជាតិទូតស៊ី ដូចដែលមេដឹកនាំរវ៉ាន់ដាបច្ចុប្បន្នចោទប្រកាន់នោះទេ។
បារាំងទទួលខុសត្រូវមួយចំណែក ក្នុងអំពើប្រល័យពូជសាសន៍រវ៉ាន់ដា ព្រោះថា ចាប់តាំងពីឆ្នាំ ១៩៩០ រហូតដល់ឆ្នាំ ១៩៩៤ រដ្ឋាភិបាលបារាំង របស់លោកប្រធានាធិបតី ហ្វ្រង់ស័រ មីទែរ៉ង់ ធ្លាប់បានគាំទ្រ ផ្នែកយោធា ដូចជាលក់អាវុធ និងបណ្តុះបណ្តាលទាហានរបស់រដ្ឋាភិបាល រវ៉ាន់ដា ដឹកនាំ ដោយលោក Juvénal Habyarimanaមកពីក្រុមជាតិពិន្ធុ ហ៊ូទូ។ នោះបើទោះបីជាអង្គការ និងមន្រ្តីទូតបារាំង ខ្លះ ធ្លាប់បានទាញសញ្ញាអាសន្ន ពីការបែកឆ្វេង សកម្មភាព សម្លាប់រង្គាល របស់កងទ័ព និងមន្រ្តីរដ្ឋាភិបាលហ៊ូទូ ទៅលើជនជាតិទូតស៊ី តាំងពីឆ្នាំ ១៩៩០ក្តី។
នៅឆ្នាំ ១៩៩៣ ពោលគឺមួយឆ្នាំ មុនកើតមាន ប្រល័យពូជសាសន៍ នៅរវ៉ាន់ដា ទីភ្នាក់ងារស៊ើបការណ៍សម្ងាត់បារាំង ធ្លាប់បានសរសេរថា នៅក្រោមការដឹកនាំរបស់ប្រធានាធិបតី មកពីជាតិពិន្ធុ ហ៊ូទូ គេសង្កេតឃើញមាននយោបាយបន្សុទ្ធជាតិសាសន៍ នៅរវ៉ាន់ដា តាមរយៈ ការសម្លាប់រង្គាលជនជាតិទូតស៊ី។ ប៉ុន្តែ រដ្ឋាភិបាលបារាំង ជំនាន់នោះ ក្រោមហេតុផលថា ជួយរដ្ឋាភិបាលហ៊ូទូ ដើម្បីប្រឆាំងពួកឧទ្ទាមទ័ពព្រៃ ទូតស៊ី មិនបានយកចិត្តទុកដាក់លើសញ្ញាទាញអាសន្ននោះទេ។ នៅត្រង់ចំណុចនេះ ក្រុមអ្នកស្រាវជ្រាវបារាំងបានស្តីបន្ទោស នយោបាយរបស់អតីតប្រធានាធិបតី បារាំងថា ដោយសារតែងប់ងល់ ចង់បានរវ៉ាន់ដា ជាទឹកដីប្រើប្រាស់ភាសាបារាំង និងមិនចង់ឲ្យក្រុមឧទ្ទាមទូតស៊ី ដែលគាំទ្រដោយប្រទេសអ៊ូហ្កង់ដា និយាយភាសាអង់គ្លេស ទទួលជ័យជំនះដឹកនាំរវ៉ាន់ដា លោកប្រធានាធិបតី ហ្វ្រង់ស័រ មីទែរ៉ង់ បានគាំទ្ររដ្ឋាភិបាលហ៊ូទូ ផ្កាប់មុខ និងខ្វាក់ភ្នែកមើលមិនឃើញ រលកប្រល័យពូជសាសន៍ប្រព្រឹត្តដោយជនជាតិហ៊ូទូ ទៅលើជនជាតិទូតស៊ី។
ជាមួយ នឹងរបាយការណ៍ ដែលជាលទ្ធផលនៃការស្រាវជ្រាវឯកសារសម្ងាត់ចាស់ អស់ រយៈពេល២ឆ្នាំ តួនាទីរបស់បារាំង នៅក្នុងប្រល័យពូជសាសន៍ រវ៉ាន់ដា លែងស្រពិចស្រពិលទៀតហើយ។ សម្រាប់ប្រធានាធិបតីបារាំង លោកអេម៉ានុយអែល ម៉ាក្រុង ដែលបានបើកទម្លាយ ឲ្យគេ ចូលប្រើឯកសារសម្ងាត់រដ្ឋ របាយការណ៍លើកនេះ ជាការបោះជំហានមួយដ៏សំខាន់ដើម្បីស្វែងយល់ពីការចូលរួមរបស់បារាំង នៅរវ៉ាន់ដា។ លោកសង្ឃឹមដែរថា ការបោះពុម្ពផ្សាយ របាយការណ៍មួយនេះ នឹងជួយឲ្យបារាំង មានទំនាក់ទំនងល្អប្រសើរឡើងវិញជាមួយប្រទេសរវ៉ាន់ដា។ រវ៉ាន់ដា ដែលធ្លាប់តែមានទំនាក់ទំនងល្អក់កករជាមួយ បារាំង ក្នុងសំណុំរឿងប្រល័យពូជសាសន៍ កាលពីជាង ២០ឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ