រុស្ស៊ីនិងអ៊ីរ៉ង់រួមគ្នាបន្ទោសអឺរ៉ុប និងបង្ខំឲ្យអាេមរិកដកទណ្ឌកម្ម បើសិនចង់សង្គ្រោះកិច្ចព្រមព្រៀងនុយក្លេអ៊ែរ
សំណុំរឿងនុយក្លេអ៊ែរអ៊ីរ៉ង់វិញ កាន់តែស្មុគស្មាញ និងដើរដល់ចំណុចទ័លច្រក បន្ទាប់ពីអ៊ីរ៉ង់ និងក្រុមប្រទេសអឺរ៉ុប លែងចុះសម្រុងគ្នា។ កាលពីថ្ងៃចន្ទទី១២មេសា សហភាពអឺរ៉ុបបានដាក់ទណ្ឌកម្មទៅលើអ៊ីរ៉ង់ ទាក់ទិននឹងបញ្ហាសិទ្ធិមនុស្ស។ ជាការឆ្លើយតបវិញ អ៊ីរ៉ង់សម្រេចព្យួរទំនាក់ទំនងសហប្រតិបត្តិការជាមួយសហភាពអឺរ៉ុប។ ចំណែករុស្ស៊ី បានចេញមុខការពារអ៊ីរ៉ង់ ដោយចោទសហភាពអឺរ៉ុប ថាកំពុងតែបំផ្លាញការខិតខំប្រឹងប្រែងចរចា ដើម្បីស្រោចស្រង់កិច្ចព្រមព្រៀងនុយក្លេអ៊ែរ។
ចុះផ្សាយនៅថ្ងៃ៖
តើអឺរ៉ុប និងអ៊ីរ៉ង់ កំពុងតែដើរបែកផ្លូវគ្នាឬ? ខណៈដែលការខំប្រឹងប្រឹងចរចា ដើម្បីស្រោចស្រង់កិច្ចព្រមព្រៀងនុយក្លេអ៊ែរ កំពុងតែបន្តនៅទីក្រុងវីយែន សហភាពអឺរ៉ុប និង អ៊ីរ៉ង់បែរជាមើលមុខគ្នាលែងត្រង់។
កាលពីថ្ងៃចន្ទ ទី១២មេសា សហភាពអឺរ៉ុប បានសម្រេចដាក់ទណ្ឌកម្មទៅលើមន្ត្រីអ៊ីរ៉ង់ មួយចំនួន ដែលគេចោទថាជាអ្នកទទួលខុសត្រូវ លើការបង្ក្រាបយ៉ាងហិង្សាបំផុត ធ្វើទៅប្រជាជនអ៊ីរ៉ង់ ដែលបានធ្វើបាតុកម្មកាលពីខែវិច្ឆិកា ឆ្នាំ២០១៩។ ជាការឆ្លើយតបវិញ រដ្ឋាភិបាលអ៊ីរ៉ង់ បានសម្រេច ព្យួរ កិច្ចសហការទាំងអស់ ជាមួយសហភាពអឺរ៉ុប មិនថាការសន្ទនាគ្នារឿងសិទ្ធិមនុស្ស និងកិច្ចសហប្រតិបត្តិការ ក្នុងវិស័យទេសចរណ៍ និងការបង្រ្កាបការជួញដូរគ្រឿងញៀងជាដើម។
ទន្ទឹមគ្នានេះ រុស្ស៊ីបានចូលខ្លួនមកកាន់តែកៀក នឹងអ៊ីរ៉ង់។ នៅក្នុងសន្និសីទកាសែត ពីទីក្រុងតេអេរ៉ង់ លោកប្រមុខការទូតរុស្ស៊ី បាននិយាយបន្ទោសសហភាពអឺរ៉ុប ថាបានធ្វើទាំងទទឹងទិស។ លោកថា នៅក្នុងសហភាពអឺរ៉ុប គ្មានអ្វីមួយធ្វើទៅឲ្យស្របគ្នាសោះ ដៃស្តាំ មិនដឹងថាដៃឆ្វេងកំពុងធ្វើអ្វី។
ការថ្លែងចោទប្រកាន់ដូចនេះ គឺប្រមុខការទូតរុស្ស៊ី ចង់សំដៅថា បារាំង អាល្លឺម៉ង់ កំពុងព្យាយាមចរចា ជាមួយភាគីអ៊ីរ៉ង់និងប្រទេសហត្ថលេខីឯទៀត ដើម្បីស្រោចស្រង់កិច្ចព្រមព្រៀងនុយក្លេអ៊ែរ។ ប៉ុន្តែសហភាពអឺរ៉ុប បែរជាដាក់ទណ្ឌកម្មបន្ថែមមកលើអ៊ីរ៉ង់ទៅវិញ។ នៅក្នុងសន្និសីទកាសែត ប្រមុខការទូតរុស្ស៊ី និងប្រមុខការទូតអ៊ីរ៉ង់ បានអះអាងជាថ្មីថា សហរដ្ឋអាមេរិក ត្រូវតែដកចេញនូវទណ្ឌកម្មទាំងអស់ ពីអ៊ីរ៉ង់ បើសិនជាចង់ឲ្យកិច្ចព្រមព្រៀងនុយក្លេអ៊ែរអាចរស់ឡើងវិញបាន។
យ៉ាងណាមិញ លោកប្រមុខការទូតអ៊ីរ៉ង់ បានលើកឡើងថា អ៊ីរ៉ង់អាចត្រលប់មកគោរពការសន្យាវិញបានដោយគ្មានបញ្ហា ក៏ប៉ុន្តែសូមអាមេរិក បញ្ឈប់យុទ្ធសាស្ត្រដាក់ទណ្ឌកម្ម គំរាមមកលើអ៊ីរ៉ង់ ឬបំផ្លាញហេដ្ឋរចនាសម្ព័ន្ធរបស់អ៊ីរ៉ង់ទៀតទៅ។ ការលើកឡើងរបស់លោករដ្ឋមន្ត្រីការបរទេសអ៊ីរ៉ង់នេះ គឺសំដៅទៅដល់ការវាយប្រហារមួយ កាលពីចុងសប្តាហ៍កន្លងទៅ នៅទីតាំងស្ថានីយ៍នុយក្លេអ៊ែរអ៊ីរ៉ង់ តំបន់Natanz ហើយដែលអ៊ីរ៉ង់ ចោទថាជាស្នាដៃរបស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ