ទីភ្នាក់ងារឱសថអឺរ៉ុបចាប់ផ្តើមពិនិត្យមើលប្រសិទ្ធភាពវ៉ាក់សាំងស៊ីណូវ៉ាក់របស់ចិន
ទីភ្នាក់ងារឱសថអឺរ៉ុបបានប្រកាសនៅថ្ងៃអង្គារ ទី៤ ឧសភា ថា ខ្លួនបានចាប់ផ្តើមពិនិត្យមើលប្រសិទ្ធភាព និងសុវត្ថិភាពវ៉ាក់សាំងស៊ីណូវ៉ាក់របស់ចិន។ ប្រសិនបើមានការទទួលស្គាល់ពីគុណភាព នោះ វ៉ាក់សាំងស៊ីណូវ៉ាក់របស់ចិន នឹងអាចទទួលបានភ្លើងខៀវឲ្យធ្វើចរាចរណ៍លើទីផ្សារអឺរ៉ុបដែលមានសមាជិកចំនួន ២៧ ប្រទេស។
ចុះផ្សាយនៅថ្ងៃ៖
ស្តាប់ - ០២:១៣
ស៊ីណូវ៉ាក់ គឺជាវ៉ាកសាំងប្រឆាំងកូវីដដំបូងគេរបស់ចិនដែលត្រូវបានយកទៅពិចារណាអនុញ្ញាតឲ្យប្រើប្រាស់នៅក្នុងទឹកដីអឺរ៉ុប។ នៅថ្ងៃអង្គារ ទី៤ ឧសភា ឆ្នាំ២០២១នេះ ទីភ្នាក់ងារឱសថអឺរ៉ុបបានប្រកាសឲ្យដឹងពីការសម្រេចចិត្តរបស់ខ្លួនក្នុងការចាប់ផ្តើមពិនិត្យមើលប្រសិទ្ធភាព និងសុវត្ថិភាព វ៉ាក់សាំងស៊ីណូវ៉ាក់ចិន ដោយផ្អែកលើលទ្ធផលបឋមដែលបានមកពីការធ្វើតេស្តសាកល្បងលើសត្វ និងមនុស្ស។
លទ្ធផលបឋមខាងលើ បង្ហាញថាវ៉ាក់សាំងស៊ីណូវ៉ាក់របស់ចិនមានផ្ទុកមេរោគកូរ៉ូណាវីរុសដែលអសកម្ម ឬងាប់ និងអាចបង្កើតនូវប្រព័ន្ធភាពស៊ាំក្នុងរាងកាយរបស់មនុស្សឲ្យប្រឆាំងទល់នឹងមេរោគកូរ៉ូណាវីរុសដែលបង្កជាជំងឺកូវីដបាន។ នេះបើតាមទីភ្នាក់ងារអឺរ៉ុបនិយាយនៅក្នុងសេចក្តីថ្លែងការណ៍មួយ។
ទីភ្នាក់ងារឱសថអឺរ៉ុបនឹងបន្តការពិនិត្យមើលលើវ៉ាក់សាំងស៊ីណូវ៉ាក់រហូតដល់មានទិន្នន័យគ្រប់គ្រាន់ មុននឹងអនុញ្ញាតឲ្យក្រុមហ៊ុនឱសថចិនអាចដាក់ពាក្យស្នើសុំធ្វើចរាចរណ៍វ៉ាក់សាំងលើទីផ្សារអឺរ៉ុបបាន។
គួររំឭកជូនថា វ៉ាក់សាំងស៊ីណូវ៉ាក់ត្រូវបានអនុញ្ញាតឲ្យប្រើប្រាស់ដោយអាជ្ញាធរចិនកាលពីខែកុម្ភៈ។ ហើយបើតាមទីភ្នាក់ងារព័ត៌មាន AFP បច្ចុប្បន្ននេះ វ៉ាក់សាំងស៊ីណូវ៉ាក់កំពុងប្រើប្រាស់ក្នុងប្រទេសយ៉ាងតិច ២២ នៅអាមេរិកឡាទីន អាហ្វ្រិក និងអាស៊ី។
ក្រៅពីទីភ្នាក់ងារឱសថអឺរ៉ុប អង្គការសុខភាពពិភពលោក ក៏កំពុងពិនិត្យមើលប្រសិទ្ធភាពវ៉ាក់សាំងរបស់ចិនដែរ។ អង្គការសុខភាពពិភពលោកកំពុងពិនិត្យវាយតម្លៃពីប្រសិទ្ធភាពវ៉ាក់សាំងចំនួនពីររបស់ចិន គឺវ៉ាក់សាំងស៊ីណូហ្វាម និងស៊ីណូវ៉ាក់។ បើតាមការចុះផ្សាយរបស់ទីភ្នាក់ងារព័ត៌មាន Reuters អ្នកជំនាញអង្គការសុខភាពពិភពលោកអាចនឹងសម្រេចថាតើទទួលស្គាល់ឬមិនទទួលគុណភាពរបស់វ៉ាកសាំងចិននៅប៉ុន្មានថ្ងៃខាងមុខ។
គួរបញ្ជាក់ជូនដែរថា មកទល់នឹងពេលនេះ អង្គការសុខភាពពិភពលោក ទទួលស្គាល់សុវត្ថិភាពនិងប្រសិទ្ធភាព វ៉ាក់សាំងកូវីដផលិតដោយមន្ទីរពិសោធន៍បួនគឺមន្ទីរពិសោធន៍ Pfizer, AstraZeneca, Johnson & Johnson និង Moderna៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ