អង់គ្លេសមានទំនុកចិត្តថា វ៉ាក់សាំងមានប្រសិទ្ធិភាពទប់ទល់ជាមួយ កូវីដ១៩បំប្លែងខ្លួនមកពីឥណ្ឌា
ចាប់ពីថ្ងៃចន្ទនេះ រដ្ឋាភិបាលប្រទេសអង់គ្លេស នឹងចាប់ផ្តើមដកចេញ នូវវិធានការរិតត្បិតមួយចំនួនធំ ដើម្បីបើកចំហរសកម្មភាពសេដ្ឋកិច្ចឡើងវិញ បន្ទាប់ពីបានចាក់វ៉ាក់សាំង ច្រើនបង្គួរទៅឲ្យប្រជាពលរដ្ឋ។ តែយ៉ាងណា មានការព្រួយបារម្ភ អំពីការឆ្លងរាលដាលយ៉ាងលឿនរហ័ស នូវកូវីដ១៩ទម្រង់បំប្លែងខ្លួន មានប្រភពមកពីឥណ្ឌា ដែលកំពុងតែមានវត្តមាន ឆ្លងរាលដាលនៅតំបន់ទីក្រុងឡុងដ៍។ ទោះយ៉ាងនេះក្តី រដ្ឋមន្ត្រីសុខាភិបាលអង់គ្លេសអះអាងថា រដ្ឋាភិបាលមានទំនុកចិត្ត ថាវ៉ាក់សាំងប្រាកដជាអាចការពារ ទប់នឹងកូវីដ១៩បំប្លែងខ្លួនមកពីឥណ្ឌានេះ។
ចុះផ្សាយនៅថ្ងៃ៖
ស្តាប់ - ០២:២៩
រយៈពេលមួយសប្តាហ៍ ចំនួនមនុស្សឆ្លងកូវីដ១៩ទម្រង់បំប្លែងខ្លួនមានប្រភពមកពីឥណ្ឌា បានកើនឡើង មួយទ្វេជាពីរ នៅប្រទេសអង់គ្លេស ពោលគឺមានសរុប ១៣១៣ករណី។ ភាគច្រើននៃការឆ្លងរាលដាលនេះ គឺស្ថិតនៅភាគពាយ័ព្យទីក្រុងឡុងដ៍។
លោក Matt Hancock រដ្ឋមន្ត្រីក្រសួងសុខាភិបាលអង់គ្លេស បានទទួលស្គាល់ថា កូវីដ១៩ទម្រង់បំប្លែងខ្លួនមកពីឥណ្ឌា អាចមានឆ្លងរាលដាលយ៉ាងរហ័ស ក្នុងពេលដ៏ខ្លី ព្រោះតាមការសន្និដ្ឋានរបស់អ្នកជំនាញ គឺវាមានកម្លាំងឆ្លងខ្លាំងជាងកូវីដ១៩ទម្រង់ដើម និងកូវីដ១៩ទម្រង់បំប្លែងខ្លួនអង់គ្លេសទៅទៀត។ ក៏ប៉ុន្តែ លោកបានអះអាងថា រដ្ឋាភិបាលមានទំនុកចិត្ត ថាវ៉ាក់សាំងនឹងមានប្រសិទ្ធិភាពទប់ជាមួយកូវីដ១៩ ទម្រង់បំប្លែងខ្លួនមកពីឥណ្ឌា។ ហេតុដូច្នេះ វាជាការចាំបាច់បំផុត ដែលត្រូវតែបន្តការប្រឹងប្រែងចាក់វ៉ាក់សាំង។
យ៉ាងណាក៏ដោយ លោករដ្ឋមន្ត្រីសុខាភិបាលអង់គ្លេស បានអះអងនៅលើកញ្ចក់ទូរទស្សន៍ BBC ថារដ្ឋាភិបាលនៅតែបន្តអនុវត្តតាមអ្វីដែលគ្រោងទុក គឺចាប់ផ្តើមបើកចំហរសកម្មភាពសេដ្ឋកិច្ចឡើងវិញខ្លះ ចាប់ពីថ្ងៃចន្ទ ទី១៧ឧសភានេះទៅ។ ភោជនីយដ្ឋាន បារ ហាងហ្វេ នឹងអាចបើកទ្វារទទួលភ្ញៀវ ទាំងខាងក្រៅទាំងខាងក្នុងហាង ទីតាំងជួបជុំបែបជំនឿសាសនាក៏អាចដំណើរការវិញដែរ។
សូមបញ្ជាក់ថា គិតត្រឹមថ្ងៃទី១៦ឧសភា នៅប្រទេសអង់គ្លេស ចំនួនអ្នកទទួលបានវ៉ាក់សាំង១ដូស គឺមាន៣៦លាននាក់ និងបានទទួលគ្រប់២ដូស គឺមាន២០លាននាក់។ ក្នុងន័យប្រុងប្រយ័ត្នជាមួយកូវីដ១៩ ទម្រង់បំប្លែងខ្លួនមកពីឥណ្ឌា អាជ្ញាធរសុខាភិបាលអង់គ្លេស បានបង្ខិតគំលាតចាក់វ៉ាក់សាំងទាំង២ដូស ពី៣ខែ មកនៅត្រឹម២ខែវិញ សម្រាប់អ្នកមានអាយុលើសពី៥០ឆ្នាំឡើងទៅ។ តំបន់ដែលមានការឆ្លងរាលដាល មេរោគនេះខ្លាំង អាជ្ញាធរអង់គ្លេសបានបង្កើនសមត្ថភាពធ្វើតេស្ត។
យោងតាមគណកម្មាធិការវិទ្យាសាស្ត្រ ដែលផ្តល់ប្រឹក្សាដល់រដ្ឋាភិបាលអង់គ្លេស គឺ កូវីដ១៩ទម្រង់បំប្លែងខ្លួនមកពីឥណ្ឌា អាចមានកម្លាំងឆ្លងរាលដាល លើសកូវីដ១៩ទំរង់បំប្លែងខ្លួនអង់គ្លេស ប្រមាណជា៥០%។ ប្រការនេះបានធ្វើឲ្យមានការព្រួយបារម្ភជាខ្លាំង ខ្លាចថា អង់គ្លេសនឹងត្រូវគ្របសង្កត់ដោយរលកឆ្លងរាលដាលខ្លាំងជាថ្មីម្តងទៀត ដូចកាលពីចុងឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ