FMI បង្ហាញផែនការ តម្លៃ ៥ពាន់លានដុល្លារ ដើម្បីបិទបញ្ចប់ជំងឺរាតត្បាតកូវីដ១៩
មូលនីធិរូបិយវត្ថុអន្តរជាតិFMI បង្ហាញផែនការបិទបញ្ចប់វិបត្តិកូវីដ ដែលមានតម្លៃ ៥០ពាន់លានដុល្លារ។ តាមផែនការ ដែលFMI បានលាតត្រដាង ជាសាធារណៈ នៅក្នុងជំនួបកំពូលពិភពលោកស្តីពីសុខភាព ក្នុងក្របខ័ណ្ឌ ក្រុមប្រទេសឧស្សាហកម្មG20 នៅទីក្រុងរ៉ូម គេត្រូវការ៥០ពាន់លានដុល្លារ ដើម្បីសម្រេចគោលដៅ ចាក់វ៉ាក់សាំង ឲ្យបាន យ៉ាងតិច ៤០%នៃប្រជាជននៅលើផែនដី ពីពេលនេះ រហូតដល់ចុងឆ្នាំ។
ចុះផ្សាយនៅថ្ងៃ៖
ស្តាប់ - ០៣:០៥
ដើម្បីឈានទៅបិទបញ្ចប់ជំងឺរាតត្បាតសកល កូវីដ១៩ និងចាប់ផ្តើមមានសេដ្ឋកិច្ចឋិតឋេរឡើងវិញ មូលនិធីរូបិយវត្ថុអន្តរជាតិFMI បានស្នើផែនការដែលមានគោលដៅ ចាក់វ៉ាក់សាំង ឲ្យបាន៤០ភាគរយ នៃប្រជាជនក្នុងពិភពលោក ពីពេលនេះ រហូតដល់ដំណាច់ឆ្នាំ២០២១ និង ៦០ភាគរយ នៅ ពាក់កណ្តាលឆ្នាំ ២០២២។
តាមមូលនិធិរូបិយវត្ថុអន្តរជាតិ ដើម្បី អនុវត្តផែនការជំរុញការចាក់វ៉ាក់សាំង គេត្រូវការថវិកា ប្រមាណ ៥០ពាន់លានដុល្លារ។ ក្រុមប្រទេសអ្នកមាន នឹងត្រូវគេអំពាវនាវឲ្យបរិច្ឆាគវិភាគទានច្រើនជាងគេ ជាពិសេស ក្រុមប្រទេសមហាអំណាចឧស្សាហកម្ម G20 ព្រោះគេនៅត្រូវការ ថវិកា ប្រមាណ ១៣ពាន់លានដុល្លារ សម្រាប់ បំពេញ បង្រ្គប់ ឲ្យបាន៥០ពាន់លានដុល្លារ។
ជាមួយ ផែនការជំរុញការចាក់វ៉ាក់សាំង ឲ្យបាន ៤០% នៃប្រជាជនក្នុងពិភពលោក គេត្រូវ ចាក់បញ្ចូលទឹកប្រាក់ ប្រមាណ៩ទ្រីលាន ដុល្លារ(៩ ០០០ ០០០លានដុល្លារ) ទៅក្នុងសេដ្ឋកិច្ចពិភពលោក ពីពេលនេះ រហូតដល់ឆ្នាំ ២០២៥ ដើម្បីជំរុញ ឲ្យសេដ្ឋកិច្ច ចាប់ដើរល្អ ពេញលេញ ឡើងវិញ។
ដើម្បីអូសទាញ សេដ្ឋកិច្ចពិភពលោក ឲ្យស្ថិតនៅលើខ្សែកំណើនឡើងវិញ មូលនិធិរូបិយវត្ថុអន្តរជាតិបានលើកសំណើជាច្រើន ដែលបំពេញបន្ថែម គម្រោងចែកចាយវ៉ាក់សាំងរបស់យន្តការកូវ៉ាក់ និងមានគោលដៅចំបង គឺបំពេញការខ្វះខាតវ៉ាក់សាំងដែលកំពុងកើតមាន នៅក្នុងបណ្តាប្រទេសកំពុងអភិវឌ្ឍ។
គិតមកដល់ចុងខែ មេសា ប្រជាជននៅតំបន់អាហ្វ្រិក មិនដល់ ២%ផងដែរ បានទទួលចាក់វ៉ាក់សាំង ក្នុងខណៈពេលដែល អាមេរិក សម្រេចចាក់វ៉ាក់សាំង ឲ្យប្រជាជនរបស់ខ្លួន បាន ចំនួន ៤០% ចំណែក២០ភាគរយនៃប្រជាជនអឺរ៉ុបបានទទួលវ៉ាក់សាំង បង្ការកូវីដ យ៉ាងហោច សម្រាប់ដូសទី១។ នៅក្នុងចាក់វ៉ាក់សាំងបង្ការកូវីដ អគ្គនាយិការមូលនិធិរូបិយវត្ថុ អន្តរជាតិ លោកស្រី Kristalina Georgieva លើកឡើងសាជាថ្មី ពីគម្លាតយ៉ាងធំ រវាងក្រុមប្រទេសអ្នកមាន និងអ្នកក្រ។
ប៉ុន្តែ សម្រាប់អ្នកសរសេរផែនការរបស់មូលនិធិរូបិយវត្ថុអន្តរជាតិ គ្រប់គ្នាទទួលស្គាល់ថា គេមិនអាចបិទបញ្ចប់វិបត្តិសេដ្ឋកិច្ច បើសិន វិបត្តិសុខភាព ជំងឺកូវីដ នៅតែបន្តរាតត្បាតក្នុងពិភពលោក។ ដើម្បីបានប្រយោជន៍ទាំងអស់គ្នា គ្រប់ប្រទេស ត្រូវតែសកម្ម ចូលរួម ឲ្យស្រុះគ្នាដើម្បី បិទបញ្ចប់វិបត្តិកូវីដលើកនេះ។
ដើម្បីអាចសម្រេចគោលដៅ ចាក់វ៉ាក់សាំង ឲ្យបាន៤០ភាគរយ នៃប្រជាជនក្នុងពិភពលោក ពីពេលនេះ រហូតដល់ចុងឆ្នាំ២០២១នេះ មូលនិធិ FMI ស្នើឲ្យគេសម្រួលការដឹកជញ្ជូនឆ្លងដែន សម្រាប់ វត្ថុធាតុដើម ចែករំលែកវ៉ាក់សាំង ដែលគេបានកុម្ម៉ង់ច្រើនជ្រុល សម្រាប់ជាជំនួយ ដល់ប្រទេសក្រីក្រ តាមរយៈយន្តការកូវ៉ាក់ Covax របស់អង្គការសុខភាពពិភពលោក។ យន្តការកូវ៉ាក់ ត្រូវចែកចាយ វ៉ាក់សាំង ប្រមាណ ២ពាន់លានដូស ពីពេលនេះ រហូតដល់ចុងឆ្នាំ ២០២១ ប៉ុន្តែ គិតចាប់តាំងពីខែ កុម្ភៈមក យន្តការកូវ៉ាក់ ចែកចាយ វ៉ាក់សាំង បានប្រមាណតែ ជាង៦០លានដូសប៉ុណ្ណោះ ទៅដល់ប្រទេសក្រីក្រ។ ប្រឈមនឹងការសន្យាខ្យល់របស់ក្រុមប្រទេសអ្នកមាន ដែលថា នឹងចែករំលែក វ៉ាក់សាំង ដែលគេកុម្ម៉ង់ច្រើនជ្រុល យន្តការកូវ៉ាក់ ត្រូវជួបការខ្វះខាត វ៉ាក់សាំង ម្យ៉ាង ដោយសារតែ ឥណ្ឌាផ្អាកការនាំចេញវ៉ាក់សាំង និងម្យ៉ាងដោយសារ ការកុម្ម៉ង់ទិញ របស់ក្រុមប្រទេសអ្នកមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ