IMF៖ប្រាក់ចំណូលធ្លាក់ចុះ និងចំណីអាហារឡើងថ្លៃនឹងរុញមនុស្ស ៦២លាននាក់ឲ្យធ្លាក់ក្នុងភាពអត់ឃ្លាន
នៅថ្ងៃអង្គារ ទី៦ មេសា អង្គការមូលនិធិរូបិយវត្ថុអន្តរជាតិហៅកាត់ IMF បានចេញផ្សាយរបាយការណ៍មួយស្តីពីចក្ខុវិស័យនៃសេដ្ឋកិច្ចសកល។ របាយការណ៍បានទាញសញ្ញាអាសន្នថា ការធ្លាក់ចុះប្រាក់ចំណូលក្នុងឆ្នាំ ២០២០ និងការឡើងថ្លៃតម្លៃចំណីអាហារជាមូលដ្ឋានដោយសារវិបត្តិកូវីដ១៩ នឹងរុញមនុស្សចំនួន ៦២លាននាក់ឲ្យធ្លាក់ក្នុងភាពអត់ឃ្លាន ពោលមានការកើនឡើងចំនួន ៤លាននាក់បន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២៨
ទាក់ទងនឹងតម្លៃវត្ថុធាតុដើមទូទៅ របាយការណ៍របស់ IMF បានសង្កេតឃើញមានការកើនឡើងចំនួន ២៩% នៅចន្លោះខែសីហា ឆ្នាំ ២០២០ និងខែកុម្ភៈឆ្នាំ ២០២១។ ការឡើងថ្លៃវត្តុធាតុដើមទូទៅនេះ ពិសេសប្រេងឆៅ បានកើតមានឡើងនៅក្រោយការប្រកាសពីផលិតកម្មវ៉ាក់សាំងមានប្រសិទ្ធភាពបង្ការនឹងកូវីដ១៩ ក្នុងខែវិច្ឆិកា ឆ្នាំ ២០២០។ បន្ទាប់មក ការឡើងថ្លៃនេះបានបន្តមាននាខែមករា ឆ្នាំ ២០២១ ជាបន្តទៀត ទោះបីជាមានវិធានការរឹតបន្តឹងទប់ស្កាត់ការឆ្លងកូវីដ១៩ ដែលនាំឲ្យមានការកាត់បន្ថយសកម្មភាពសេដ្ឋកិច្ច និងការធ្លាក់ចុះនូវតម្រូវការប្រេងឆៅក៏ដោយ។ ជាក់ស្តែង តម្លៃប្រេងឆៅបានឡើងថ្លៃចំនួន ៣៩% នៅចន្លោះខែសីហា ឆ្នាំ ២០២០ និងខែកុម្ភៈឆ្នាំ ២០២១។
និយាយពីតម្លៃលោហធាតុជាមូលដ្ឋាន ដូចជាស្ពាន់ ឬរ៉ែដែកវិញ តម្លៃរបស់វាបានឡើងថ្លៃចំនួន ៣០%។ នេះដោយសារតែសកម្មភាពឧស្សាហកម្មនៅចិនបានផ្តើមដំណើរការឡើងវិញ និងភាពសុទិដ្ឋនិយមកើតចេញពីផែនការផ្តល់សន្ទុះរបស់រដ្ឋបាលអាមេរិកដែលមានទឹកប្រាក់ដល់ទៅ ១ ៩០០ ០០០លានដុល្លារ។ បើតាមរបាយការណ៍របស់ IMF តម្លៃលោហធាតុជាមូលដ្ឋាននេះត្រូវឡើងថ្លៃ ៣២,១% ក្នុងឆ្នាំ ២០២១ នេះ មុននឹងធ្លាក់ចុះ ៤,៥% នៅឆ្នាំ ២០២២។ ទាក់ទងនឹងតម្លៃផលិតផលចំណីអាហារជាមូលដ្ឋានត្រូវបាន IMF បញ្ជាក់ថា មានការឡើងថ្លៃចំនួន ២០% ក្នុងចន្លោះខែសីហា ឆ្នាំ ២០២០ និងខែកុម្ភៈឆ្នាំ ២០២១។
ផលិតផលដែលឡើងថ្លៃខ្លាំងជាងគេរួមមាន ប្រេងឆាបានឡើងថ្លៃចំនួន ៤៥% គ្រាប់ធុញ្ញជាតិបានឡើងថ្លៃចំនួន ៤១%។ នេះដោយមិនបានរាប់ចូលនូវតម្លៃសណ្តែកសៀង និងគ្រាប់ពោតដែលបានស្ទុះឡើងដល់ទៅ ៥០% និងស្រូវសាឡីឡើងថ្លៃចំនួន ៣៨%។ ប្រឈមនឹងកំណើនតម្លៃចំណីអាហារជាមូលដ្ឋាន និងការធ្លាក់ចុះប្រាក់ចំណូលដោយសារវិបត្តិកូវីដ១៩ IMF បារម្ភពីផលវិបាកក្នុងការទទួលបានស្បៀងអាហារនៅតាមតំបន់ខ្លះក្នុងលោក និងសម្រាប់ក្រុមប្រភេទមនុស្សមួយចំនួន។ IMF យល់ថា ជំងឺកូវីដ១៩ កំពុងបំផ្លាញលើសមិទ្ធិផលដែលសម្រេចបានជាច្រើនទសវត្សក្នុងការប្រឆាំងនឹងកង្វះអាហារូបត្ថម្ភនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ