ប្រទេសG7សន្យាបញ្ឈប់ការផ្តល់ប្រាក់ឧបត្ថម្ភធនឲ្យរោងចក្រថាមពលធ្យូងថ្មចាប់ពីឆ្នាំ២០២១តទៅ
ក្រុមប្រទេសមហាអំណាចឧស្សាហកម្ម ៧ ដែលហៅកាត់ថា ហ្សេ៧ (G7) បានសម្រេចកាលពីថ្ងៃសុក ២១ ឧសភាម្សិលមិញ យល់ព្រមបញ្ឈប់នយោបាយផ្តល់ប្រាក់ឧបត្ថម្ភធនរបស់រដ្ឋឲ្យទៅរោងចក្រថាមពលធ្យូងថ្មចាប់ពីចុងឆ្នាំ ២០២១ នេះទៅ។ ការសម្រេចបែបនេះ គឺដើម្បីកាត់បន្ថយការបំភាយឧស្ម័នកាបូនិក និងបែរងាកទៅរកការផ្គត់ផ្គង់ថាមពលអគ្គិសនីឲ្យបានច្រើននៅក្នុងទសវត្សរ៍ឆ្នាំ ២០៣០ ខាងមុខ។
ចុះផ្សាយនៅថ្ងៃ៖
ស្តាប់ - ០២:១៩
នៅបន្ទាប់ពីបានជួបប្រជុំគ្នាតាមអនឡាញរយៈពេលពីរថ្ងៃ រដ្ឋមន្ត្រីអាកាសធាតុ និងបរិស្ថាននៃក្រុមប្រទេសមហាអំណាចឧស្សាហកម្ម G7 បានបញ្ជាក់ជាថ្មីនូវការប្តេជ្ញាចិត្តក្នុងការទប់ស្កាត់កុំឲ្យកម្តៅផែនដីឡើងលើសពី ១,៥ អង្សា ត្រឹមឆ្នាំ ២០៥០។
ការកើនឡើងកំដៅនៃភពផែនដី គឺជាកង្វល់ដ៏ខ្លាំងបំផុតមួយសម្រាប់ពិភពលោក ហើយអ្នកវិទ្យាសាស្ត្រក៏ធ្លាប់បានទាញសញ្ញាអាសន្នជាញឹកញយហើយថា បើកំដៅផែនដីឡើងលើសពីកម្រិត ១,៥ អង្សា ត្រឹមឆ្នាំ ២០៥០ នោះ ការប្រែប្រួលអាកាសធាតុនឹងលែងអាចគ្រប់គ្រងបានទៀតហើយ។
ដោយដឹងថា ការបន្តវិនិយោគជាសកលលើការផលិតថាមពលធ្យូងថ្មគឺជាឧបសគ្គទប់ស្កាត់ការឡើងកំដៅនៃភពផែនដី រដ្ឋមន្ត្រីអាកាសធាតុនៃក្រុមប្រទេស G7 បានបញ្ជាក់ថា ការវិនិយោគអន្ដរជាតិលើថាមពលធ្យូងថ្មដែលគ្មានស្ថិរភាពនេះ ត្រូវតែបិទបញ្ឈប់។ មានន័យថា ក្រុមប្រទេសមហាអំណាចឧស្សាហកម្មទាំង ៧ នឹងបញ្ឈប់នយោបាយផ្តល់ប្រាក់ឧបត្ថម្ភធនរបស់រដ្ឋឲ្យទៅរោងចក្រថាមពលធ្យូងថ្មចាប់ពីចុងឆ្នាំ ២០២១ នេះតទៅ។
រដ្ឋមន្រ្តីក្រសួងបរិស្ថានអាល្លឺម៉ង់ Svenja Schulze បានហៅកិច្ចព្រមព្រៀងខាងលើនេះថាជា ការបោះជំហានទៅមុខដ៏សំខាន់មួយ ដែលក្រុមប្រទេសឧស្សាហកម្មនាំមុខគេ អាចបង្កើតនូវភាពជឿជាក់ និងអាចក្លាយជាគំរូដើម្បីជំរុញឲ្យអ្នកប្រទេសដទៃទៀតធ្វើតាមខ្លួន។
គួរជ្រាបថា ប្រទេស G7 ដែលរួមមានសហរដ្ឋអាមេរិក កាណាដា បារាំង អង់គ្លេស អាល្លឺម៉ង់ អ៊ីតាលី និងជប៉ុនគឺជារោងចក្រផលិតរថយន្តធំៗជាច្រើន។ ការព្រមព្រៀងគ្នាដើម្បីពន្លឿនយន្តការងាកចាកឆ្ងាយពីការប្រើប្រេងឥន្ធនៈ នៅក្នុងឧស្សាហកម្មដឹកជញ្ជូនគឺជាគោលដៅដ៏សំខាន់បំផុតមួរបស់ប្រទេស G7។
កម្មវត្ថុសំខាន់គឺគេចង់កាត់បន្ថយការបំភាយឧស្ម័នកាបូនិក និងបែរទៅរកការផ្គត់ផ្គង់ថាមពលអគ្គិសនីឲ្យបានច្រើននៅក្នុងទសវត្សរ៍ឆ្នាំ ២០៣០។ ប្រទេស G7 បានបញ្ជាក់ជាថ្មីដែរពីគោលបំណងលុបបំបាត់ចោលនូវការឧបត្ថម្ភធនឲ្យរោងចក្រថាមពលធ្យូងថ្មត្រឹមឆ្នាំ ២០២៥ និងបានលើកទឹកចិត្តឲ្យប្រទេសទាំងអស់ក្នុងលោកអនុវត្តតាមខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ