ចិនអនុញ្ញាតឱ្យពលរដ្ឋមានកូនដល់បីនាក់
ដោយសំឡឹងឃើញថា ប្រទេសមានមនុស្សចាស់កាន់តែច្រើនឡើងៗ ឯក្មេងកាន់តែតិចទៅៗ អាជ្ញាធរចិនបានប្រកាសនៅថ្ងៃចន្ទទី ៣១ ឧសភា ២០២១ លុបចោលច្បាប់កំរិត ឱ្យពលរដ្ឋមានសិទ្ធិបង្កើតកូនត្រឹមតែពីរនាក់។ ចិនមិនបោះបង់ទាំងស្រុងនយោបាយត្រួតពិនិត្យកំណើតទេ តែជាមួយនឹងការអនុញ្ញាតឱ្យគូស្វាមី មានកូនដល់បីនាក់ ចិនសង្ឃឹមថាអត្រាកំណើតនឹងស្ទុះឡើងវិញ។
ចុះផ្សាយនៅថ្ងៃ៖
ចិនជាប្រទេសដែលមានប្រជាជនច្រើនជាងគេបំផុតនៅលើពិភពលោក ប៉ុន្តែបើតាមលទ្ធផលជំរឿននៅឆ្នាំ២០២០ ចេញផ្សាយកាលពីដើមខែឧសភា បានបង្ហាញថា អត្រាកំណើននៃពលរដ្ឋវ័យចំណាស់ បានស្ទុះឡើងលឿនជាងការព្យករណ៍ និងមានកំណើនប្រជាជនទាបខ្លាំងមិនធ្លាប់មានទេ។ ហេតុដូច្នេះហើយបានជាអាជ្ញាធរចិនបានសម្រេចបើកសេរីភាពនយោបាយគ្រួសារ ដោយអនុញ្ញាតឱ្យគ្រួសារមួយមានកូនដល់បីនាក់ តែមិនឱ្យលើសពីបី នាក់ទេ។ នេះបើតាមសេចក្តីប្រកាសរបស់ភ្នាក់ងារសារព័ត៌មានចិនថ្មី ដែលបូកសរុបលទ្ធផលប្រជុំគណៈកម្មការនយោបាយបក្សកុម្មុយនិស្តដឹកនាំដោយលោកស៊ី ជីនពីង។
នយោបាយបើកទូលាយឱ្យមានកូនយ៉ាងច្រើនដល់បីនាក់នេះ ត្រូវអមជាមួយនូវវិធានការទ្រទ្រង់គ្រួសារផង ប៉ុន្តែសារព័ត៌មានផ្លូវការចិនមិនបានលម្អិតទេ។
បក្សកុម្មុយនិស្តចិនបានប្រកាន់យកគោលការណ៍ “កូនតែមួយ” តាំងពីឆ្នាំ១៩៧៩ ដើម្បីទប់ស្កាត់កំណើនប្រជាជន ដោយជួនចាប់បង្ខំប្រជាជនឱ្យរម្លូតកូន ឱ្យប្រើវិធីពន្យារកំណើត ឱ្យបង់ពិន័យ ឱ្យជាប់ពន្ធនាគារទេ ... ចាប់ពីឆ្នាំ២០១៦មក ចិនចាប់បន្ធូរបន្ថយនយោបាយកំណើត ដោយព្រមឱ្យគ្រួសារមួយអាចមានកូនពីរនាក់។ ប៉ុន្តែផែនការនេះមិនបានជួយចិនឱ្យមានអត្រាកំណើតកើនឡើង។ មូលហេតុមានច្រើនយ៉ាង ៖ ចំនួនអាពាហ៍ពិពាហ៍ធ្លាក់ចុះ តម្លៃស្នាក់នៅនិងការសិក្សាអប់រំឡើងថ្លៃ ស្ត្រីជ្រើសរើសទៅប្រលូកការងារមុនយកកូន និងចំនួនមនុស្សស្រីតិច។ ដោយហេតុកូវីដ មានទារកចិនតែប្រមាណ១២លាននាក់ប៉ុណ្ណោះបាននៅឆ្នាំ២០២០ ទល់នឹង១៤,៦៥លាននាក់កាលពីឆ្នាំ២០១៩ ពោលគឺជាឆ្នាំដែលមានអត្រាកំណើតតិចជាងគេបំផុត គិតចាប់តាំងពីឆ្នាំ ១៩៤៩មក។
បីទសវត្សរ៍នៃនយោបាយត្រួតពិនិត្យកំណើតដ៏តឹងតែង បានបន្សល់ទុកនូវវិសមភាពសង្គមជាច្រើន ៖ កំណើនមនុស្សចាស់ និងកង្វះមនុស្សភេទស្រី ព្រោះចិនចូលចិត្តតែកូនប្រុស។កំណើនមនុស្សចាស់កំពុងក្លាយជា វិបត្តិប្រជាសាស្ត្រ ! បើតាមការប៉ាន់ស្មានរបស់រដ្ឋាភិបាល ចិនមានប្រជាជនវ័យចំណាស់ លើស៦០ឆ្នាំ ចំនួន ២៦៤លាននាក់ ពោលគឺស្មើនឹង១៨,៧%នៃប្រជាជនសរុប និងកើត៥,៤៤%ក្នុងរយៈពេល១០ឆ្នាំ។ ផ្ទុយទៅវិញ ក្នុងរយៈពេលដូចគ្នា ចំនួនពលរដ្ឋសកម្ម (១៥-៥៩ឆ្នាំ) បានធ្លាក់ចុះ៦,៧៩%។
ជាផ្លូវការនិងបើតាមជំរឿនចុងក្រោយ ចិនមានប្រជាពលរដ្ឋសរុប ១៤១១លាននាក់ នៅឆ្នាំ២០២០ ដោយមានកំណើនជាមធ្យមត្រឹមតែ០,៥៣%ក្នុងមួយឆ្នាំៗ តាំងពីឆ្នាំ២០១០មក។ ក្នុងចង្វាក់នេះ ចិននឹងធ្វើឱ្យបាត់បង់នាមជាប្រទេសដែលមានប្រជាពលរដ្ឋច្រើនជាងបំផុតនៅលើពិភពលោក និងមានប្រជាជនត្រឹមតែ១៣២០លាននាក់នៅឆ្នាំ២០៥០។
សំឡេងទាមទារឱ្យចិនលុបបំបាត់ទាំងស្រុងនយោបាយគ្រប់គ្រងកំណើត បានលាន់ឮកាន់តែខ្លាំង តែបក្សកុម្មុយនិស្តបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ