ប្រទេសជាសមាជិក សម្រេចធ្វើកំណែទម្រង់ ដើម្បីពង្រឹងស្ថាប័នអង្គការសុខភាពពិភពលោក
ប្រទេសជាសមាជិកអង្គការសុខភាពពិភពលោកទាំងអស់ បានសម្រេចព្រមព្រៀងគ្នានៅថ្ងៃចន្ទទី ៣១ឧសភា ដែលត្រូវជាថ្ងៃបិទបញ្ចប់មហាសន្និបាតប្រចាំឆ្នាំលើកទី៧៤ ធ្វើកំណែទម្រង់ ដើម្បីពង្រឹងស្ថាប័នអង្គការសុខភាពពិភពលោកឱ្យបានរឹងមាំឡើង។ ប៉ុន្តែគេនៅមិនទាន់ដឹងថាជាកំណែទម្រង់បែបណានិងយ៉ាងដូចម្តេចនៅឡើយ។ ក្រុមការងារទទួលបន្ទុកកិច្ចការនេះនឹងកំណត់នៅតាមក្រោយ។
ចុះផ្សាយនៅថ្ងៃ៖
ស្តាប់ - ០២:១៣
ជាងមួយឆ្នាំក្រោយការផ្ទុះឡើងនៃជំងឺកូវីដ១៩ និងក្នុងអំឡុងពេលនេះកំពុងប្រយុទ្ធប្រឆាំងនឹងជំងឺរាតត្បាតសាកល ដែលបានផ្តាច់ជីវិតមនុស្សអស់ជាង៣,៥លាននាក់ រដ្ឋជាសមាជិកអង្គការសុខភាពពិភពលោកបានអនុម័តសេចក្តីសម្រេចចិត្តធ្វើកំណែទម្រង់ពង្រឹងស្ថាប័ន នៅក្នុងអង្គមហាសន្និបាតលើកទី៧៤។ មហាសន្និបាតដែលបានឆ្លុះបញ្ចាំងឱ្យរដ្ឋជាសមាជិកបានមើលឃើញចំណុចខ្វះខាតជាច្រើនរបស់ស្ថាប័ន តាមរយៈរបាយការណ៍ឯករាជ្យផ្សេងៗ ដែលខ្លះបានអះអាងថា វិបត្តិកូវីដគួរតែអាចបញ្ចៀសបាន និងខ្លះបានបន្ទោសអំពីភាពយឺតយ៉ាវរបស់អង្គការសុខភាពពិភពលោកក្នុងការប្រកាសអាសន្នកូវីដ១៩។
“ជាសេចក្តីសម្រេចចិត្តដ៏សំខាន់បំផុតមួយ ក្នុងប្រវត្តិរបស់អង្គការ”។ នេះបើតាមប្រសាសន៍អបអររបស់លោក តេដ្រូស អាដាណុម ហ្គេប្រេយេស៊ូស អគ្គនាយកអង្គការសុខភាពពិភពលោក។ សេចក្តីសម្រេចចិត្តមានឈ្មោះថា “ពង្រឹងការត្រៀមលក្ខណៈតបតនឹងភាពបន្ទាន់សុខាភិបាល” ជាគម្រោងដែលស្នើឡើងដោយសហរដ្ឋអាមេរិកនិងសហភាពអឺរ៉ុប និងដែលបានគូសបញ្ជាក់អំពីទំនួលខុសត្រូវដ៏ចាំបាច់របស់រដ្ឋាភិបាលនីមួយៗផង អំពីតួនាទីគន្លឹះរបស់អង្គការសុខភាពពិភពលោកផង នៅចំពោះមុខវិបត្តិសុខភាព ដែលអាចមានទំហំធំធេងលើសមត្ថភាពរបស់ស្ថាប័ននាពេលបច្ចុប្បន្ន។
តាមរយៈសេចក្តីសម្រេចចិត្ត ក្រុមការងារស្តីអំពីការពង្រឹងលក្ខណៈត្រៀមនិងបញ្ចេញសកម្មភាពតបតនឹងវិបត្តិសុខភាព នឹងត្រូវបង្កើតឡើង ក្នុងរង្វង់ស្ថាប័នអង្គការសុខភាពពិភពលោក។ គ្រប់ប្រទេសជាសមាជិកសុទ្ធតែអាចចូលរួមក្នុងក្រុមការងារនេះ ដែលមានបន្ទុកសិក្សាពិនិត្យពិច័យរបាយការណ៍ផ្សេងៗ និងផ្តល់សំណើមកកាន់អង្គមហាសន្និបាតលើកទី៧៥។ នាយកអង្គការសុខភាពពិភពលោក ក៏អាចធ្វើសំណើផ្ទាល់ខ្លួនបានដែរ ដើម្បីកែលម្អប្រព័ន្ធប្រកាសអាសន្នរបស់អង្គការ។
អង្គការសុខភាពពិភពលោកត្រូវបង្កើតផែនការមេមួយសម្រាប់វាយតម្លៃការងារត្រៀមប្រឈមវិបត្តិរបស់រដ្ឋសមាជិកនីមួយៗ។ នេះបើតាមសំណើចែងក្នុងសេចក្តីសម្រេចចិត្តដែលបានអំពាវនាវថែមទៀតឱ្យរដ្ឋនីមួយៗបង្កើនសមត្ថភាពឆាប់សម្គាល់បានការគំរាមកំហែងថ្មីៗ។
ជាមួយនឹងការជំរុញឱ្យមានការផ្តល់ព័ត៌មានឱ្យទាន់ពេលវេលា ទៅតាមស្ថានភាពសុខភាពសាធារណៈ ឬទៅតាមការវិវឌ្ឍនៃជំងឺរាតត្បាត សេចក្តីសម្រេចចិត្តរបស់អង្គការសុខភាពពិភពលោកបានស្នើសុំ ជាចុងក្រោយ ឱ្យរដ្ឋជាសមាជិកនីមួយៗ ធានាផ្តល់ហិរញ្ញវត្ថុសមស្រប អាចឡើងចុះទៅតាមស្ថានការណ៍ មានជានិរន្ត និងអាចឱ្យកម្មវិធីរបស់អង្គការសុខភាពពិភពលោកអាចព្យាករបាន។ ការបង់វិភាគទានដែលជាកាតព្វកិច្ចរបស់រដ្ឋសមាជិក តំណាងឱ្យ១៦%នៃថវិការបស់អង្គការ។
រដ្ឋជាសមាជិកទាំង១៩៤ប្រទេសបានសន្យាបើកជំនួបកំពូលវិសាមញ្ញនៅខែវិច្ឆិកា២០២១ ដើម្បីរៀបរាងសន្ធិសញ្ញា ឬអនុសញ្ញាស្តីពីការត្រៀមនិងឆ្លើយតបទៅនឹងវិបត្តិរាតត្បាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ