ក្រុមG៧ ឈានទៅសម្រេចកិច្ចព្រមព្រៀង កំណត់អត្រាពន្ធរួម លើក្រុមហ៊ុនពហុជាតិ
មិនទាន់ចេញជាកិច្ចព្រមព្រៀងទេ តែមិនយូរទៀតឡើយ។ ការយកពន្ធក្រុមហ៊ុនអន្តរជាតិ បានក្លាយជាប្រធានបទនៃជំនួបប្រជុំក្រុមប្រទេសមហាឧស្សាហកម្មទាំង៧ នាទីក្រុងឡុងដ៍ដែលគ្រប់ភាគីបានបង្ហាញវត្តមានដោយផ្ទាល់ ជាលើកទីមួយ គិតតាំងពីវិបត្តិកូវីដ១៩បានផ្ទុះឡើង។ នៅថ្ងៃសៅរ៍ទី ៥ មិថុនា ក្រុមរដ្ឋមន្ត្រីក្រសួងហិរញ្ញវត្ថុG7 ត្រូវបន្តចរចាលើសំណុំរឿងនេះជាបន្តទៀត ដើម្បីត្រួសត្រាយផ្លូវឱ្យកាន់តែប្រសើរឡើង សម្រាប់ជំនួបប្រជុំក្រុមប្រមុខរដ្ឋ-រដ្ឋាភិបាលG7 នៅសប្តាហ៍ក្រោយ។ សម្រាប់ពេលនេះ ក្រុមG7 បានព្រមព្រៀងគ្នាជាគោលការណ៍ ចែករំលែកលទ្ធផលនៃការសាកល្បងវ៉ាក់សាំង និងថ្នាំព្យាបាលជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:១១
កិច្ចព្រមព្រៀងជាប្រវត្តិសាស្ត្រស្តីពីការយកពន្ធពីក្រុមហ៊ុនសហគ្រាសពហុជាតិ នឹងអាចសម្រេច នៅក្នុងជំនួបលើកក្រោយនាខែកក្កដាខាងមុខនេះហើយ។ នេះបើតាមប្រសាសន៍របស់លោករដ្ឋមន្ត្រីក្រសួងហិរញ្ញវត្ថុបារាំង ព្រុយណូ ឡឺម៉ែរ Bruno Le Maire ។ ការចរចាបានប្រព្រឹត្តទៅយ៉ាងស្វាហាប់។ ឱកាសបានធ្វើកំណែទម្រង់ប្រព័ន្ធពន្ធដារពិភពលោក ដែលគ្មាននរណាគិតគូរ តាំងពីជាច្រើនទសវត្សរ៍មក ចាប់មានឥទ្ធិពលហើយ។
ក្រុមប្រទេសមហាឧស្សាហកម្មកំពូលគេនៅលើពិភពលោកបានព្រមព្រៀងគ្នា លើគោលការណ៍ស្តារឱ្យមានការកំណត់អត្រារួមនៃការយកពន្ធពីក្រុមហ៊ុនសហគ្រាសធំៗខ្នាតពហុជាតិ គ្រាន់តែនៅពុំទាន់ត្រូវរ៉ូវគ្នា ថាប៉ុន្មាន និងនរណាខ្លះប៉ុណ្ណោះ ព្រោះសំណុំរឿងនេះមានលក្ខណៈបច្ចេកទេសផង នយោបាយផង។
បារាំងដែលជាអ្នកផ្តួចផ្តើមគំនិត ចង់កំណត់កំរិតពន្ធលើក្រុមហ៊ុនពហុជាតិឱ្យបានខ្ពស់ និងលើស១៥% នៃសំណើរបស់សហរដ្ឋអាមេរិក។ សម្រាប់រដ្ឋមន្ត្រីក្រសួងហិរញ្ញវត្ថុបារាំង ១៥%ជាកំរិតអប្បបរិមានៃការចាប់ផ្តើមចរចាតែប៉ុណ្ណោះ។ ដំបូងឡើយសហរដ្ឋអាមេរិកក៏ចង់កំរិតអត្រាពន្ធដល់២១%ដែរ តែក្រោយមកបានប្តូរចិត្តវិញ ដើម្បីងាយប្រមូលការគាំទ្រ។ ស៊ីប អៀរឡង់ ឬ ហុងគ្រី ដែលជាប្រទេសមានអត្រាពន្ធទាបខ្លាំងបំផុតនោះ ធ្លាប់បានសម្តែងការប្រឆាំងនឹងគម្រោងយកពន្ធរួមនេះរួចហើយ។
ចំណុចសំខាន់ដែលត្រូវកំណត់ មុននឹងអាចសម្រេចចេញជាកិច្ចព្រមព្រៀងបាន នោះគឺក្រៅពីក្រុមហ៊ុនឌីជីថលយក្ស Google Apple Facebook Amazon Microsoft តើមានក្រុមហ៊ុនសហគ្រាសពហុជាតិណាខ្លះទៀតដែលត្រូវជាប់កាតព្វកិច្ចបង់ពន្ធ ?
នៅថ្ងៃសៅរ៍ទី ៥មិថុនានេះ ក្រុមហ្សេ៧ ត្រូវបន្តការជជែកពិភាក្សាអំពីនយោបាយជួយទ្រទ្រង់សេដ្ឋកិច្ច បង្កឡើងដោយវិបត្តិកូវីដ១៩ ដែលជាអ្នកមកពន្លឿនពិភពលោកឱ្យគិតគូរយកពន្ធក្រុមហ៊ុនធំៗ។ ត្រង់ចំណុចនេះ ក្រុមរដ្ឋមន្ត្រីក្រសួងសុខាភិបាលG៧ បានព្រមព្រៀងគ្នាជាគោលការណ៍បង្កើតឱ្យមានយន្តការត្រៀមការពារវិបត្តិ និងយន្តការចែកចាយលទ្ធផលសាកល្បងថ្នាំវ៉ាក់សាំង លទ្ធផលព្យាបាលកូវីដ១៩ ឱ្យបានកាន់តែប្រសើរឡើង។ ប៉ុន្តែពុំមានទេសេចក្តីថ្លែងការណ៍ច្បាស់លាស់ស្តីអំពីផែនការពង្រីកយុទ្ធនាការចាក់ថ្នាំបង្ការកូវីដ១៩នៅលើពិភពលោករបស់មូលនិធិរូបិយវត្ថុអន្តរជាតិ។ ស្ថាប័នសន្យាត្រឹមផ្តល់ការគាំទ្រក្នុងទំហំទឹកប្រាក់៥០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ