វេទិកាដើម្បីសមភាពបុរស-ស្ត្រី ប្រមូលថវិកាបាន៤ម៉ឺនលានដុល្លារ ដើម្បីលើកកំពស់សិទ្ធិស្ត្រី
“វេទិកាជំនាន់សមភាព បុរស-ស្ត្រី” ដែលត្រូវបានរៀបចំឡើងនៅទីក្រុងប៉ារីស ដោយអង្គការសហប្រជាជាតិ បានបិទបញ្ចប់ទៅកាលពីល្ងាចថ្ងៃពុធ ទី៣០មិថុនាម្សិលមិញ។ ជាវេទិកា ដែលត្រូវបានចូលរួម ដោយថ្នាក់ដឹកនាំប្រទេស និងតំណាងអង្គការ សមាគមជាច្រើន ដែលធ្វើការ ក្នុងយុទ្ធនាការការពារសិទ្ធិស្ត្រី ប្រឆាំងនឹងអសមភាព អំពើហិង្សា និងការរើសអើងទាំងឡាយ ធ្វើទៅលើស្ត្រីភេទ។ នៅចុងបញ្ចប់ វេទិកានេះបានទទួលការសន្យា ចូលរួមថវិកា ចំនួន៤ម៉ឺនលានដុល្លារ ពីគ្រប់ភាគីទាំងអស់ ដើម្បីចំណាយ នៅក្នុងការងារលើកកំពស់សិទ្ធិស្ត្រី។
ចុះផ្សាយនៅថ្ងៃ៖
ស្តាប់ - ០២:៤០
ការរីកចម្រើនទាំងឡាយ ទាក់ទិននឹងសិទ្ធិរបស់ស្ត្រី កំពុងតែរងនូវការគំរាមកំហែង ដោយចរន្តគំនិត អភិរក្សនិយមជ្រុល បែបចាស់គំរិស។ នេះគឺជាការលើកឡើង របស់លោក អង់តូនីញ៉ូ ហ្គូទែរ អគ្គលេខាធិការអង្គការសហប្រជាជាតិ នៅក្នុងឱកាសបើក “វេទិកាជំនាន់សមភពបុរសស្ត្រី” នៅទីក្រុងប៉ារីស។
ដូចគ្នាដែរ លោកម៉ាក្រុង ប្រធានាធិបតីបារាំង បានថ្លែងថា ស្ត្រីបានរងនូវការគំរាមកំហែងកាន់តែខ្លាំង ដោយគ្រាន់តែពួកគេ ចង់មានសិទ្ធិបើកបរ ចង់មានសិទ្ធិរំលូតកូន ឬមិនចង់ទទូលហ៊ុំក្រណាត់លើក្បាលជាដើម ។ល។ អំណាចផ្តាច់ការ នៃទ្រឹស្តី ដែលគិតថាមនុស្សប្រុស មានសិទ្ធិអំណាចធំជាងមនុស្សស្រី គឺវាកំពុងតែមកបំផ្លេចបំផ្លាញ ការរីកចម្រើន នៅទូទាំងពិភពលោក។ ថ្លែងពីចំងាយ តាមប្រព័ន្ធវីស្យូខុនហ្វឺរិនស៍ លោកស្រី កាម៉ាឡា ហារីស អនុប្រធានាធិបតីអាមេរិក បានលើកឡើងថា ដើម្បីការពារលទ្ធិប្រជាធិបតេយ្យ គឺយើងត្រូវតែប្រយុទ្ធ ដើម្បីសមភាព រវាងបុរស និងស្ត្រី។
គួរកត់សំគាល់ថា វាគ្មិនដែលបានចូលរួម វេទិកានេះ បានយល់ដូចៗគ្នា ថាវិបត្តិកូវីដ១៩ បានបង្កផលវិបាកកាន់តែខ្លាំង ទៅលើស្ត្រី ជាក់ស្តែង ដោយសារតែវិបត្តិសេដ្ឋកិច្ច ក្មេងស្រីកាន់តែច្រើន ត្រូវបង្ខំចិត្តបោះបង់ចោលការសិក្សា ស្ត្រីកាន់តែច្រើន បានធ្លាក់ទៅក្នុងភាពក្រីក្រតោកយ៉ាក។ វិធានការបិទខ្ទប់ បានធ្វើឲ្យស្ត្រីរងនូវ អំពើហិង្សាក្នុងគ្រួសារកាន់តែច្រើនផងដែរ។
វេទិកាដែលផ្តូចផ្តើមឡើងដោយអង្គការសហប្រជាជាតិនេះ មានកម្មវត្ថុ ឈានទៅគូសវាស “ផែនការពិភពលោក” មួយ សំដៅសម្រេចឲ្យបាននូវ សមភាពរវាងបុរស និងស្រ្តី។ ប្រធានបទធំៗមួយចំនួន ត្រូវគេលើកមកពិភាក្សា ដូចជាបញ្ហាអំពើហិង្សាលើសតិស្មារតី និងរូបរាងកាយស្ត្រី សិទ្ធិជាម្ចាស់ការលើខ្លួនប្រាណរបស់ស្ត្រី សិទ្ធិទទួលបានការអប់រំរបស់ក្មេងស្រី ព្រមទាំងសមភាពក្នុងវិស័យសេដ្ឋកិច្ចជាដើម។ លោកស្រី Delphine O អគ្គលេខាធិការចាត់ចែងវេទិកានេះ បានលើកឡើងថា គ្រប់គ្នាត្រូវឈប់ ថ្លែងត្រឹមតែពាក្យពិរោះ តទៅទៀតទៅ។ អ្វីដែលចាំបាច់នៅពេលនេះ គឺត្រូវ មានវិធានការជាក់ស្តែង មានតម្លាភាព និងត្រូវផ្តល់មធ្យោបាយថវិកាច្បាស់លាស់ ដើម្បីលើកកំពស់សិទ្ធិស្ត្រី។
សូមបញ្ជាក់ថា វេទិកានេះ បានប្រមូលការសន្យាចំណាយប្រាក់ សរុបចំនួន ៤ម៉ឺនលានដុល្លារ ក្នុងនោះមានជាអាទិ ១៧០០០លានដុល្លារ គឺជាការសន្យារបស់រដ្ឋាភិបាល ១ម៉ឺនលាន គឺជាថវិកាផ្តល់ឲ្យដោយធនាគារពិភពលោក និង ប្រមាណជាង២ពាន់លានដុល្លារ បានមកពី មូលនិធិ Bill និង Melinda Gates។
អង្គការ Oxfam ដែលចូលរួមយ៉ាងសកម្មនៅក្នុងវេទិកានេះ បានលើកឡើងថា បារាំងត្រូវតែមានវិធានការ ជាគម្រូដល់ប្រទេសផ្សេងៗ តាមរយៈការលើកកំពស់ គោលនយោបាយសាធារណៈ សម្រាលបន្ទុកការងារផ្ទះរបស់ស្រ្តី លើកកំពស់សមភាពក្នុងវិស័យ បណ្តុះបណ្តាល និងការងារ ឲ្យស្ត្រីបានទទួលសិទ្ធិស្មើបុរស ទាំងប្រាក់ខែ ទាំងការផ្តល់តម្លៃលើសមត្ថភាព។ លោកស្រី Marie Véron តំណាងអង្គការសិទ្ធិស្ត្រីមួយទៀត បានលើកឡើងថា រដ្ឋាភិបាលគ្រប់ប្រទេសទាំងអស់ ត្រូវតែចំណាយប្រាក់យ៉ាងហោច ០,១%នៃចំណូលដុលក្នុងស្រុក ដើម្បីប្រយុទ្ធប្រឆាំងនឹងអំពើហិង្សាធ្វើទៅលើស្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ