លោកបូរសី ចនសុនថ្កោលទោសចំពោះការរើសអើងជាតិសាសន៍លើកីឡាករបាល់ទាត់អង់គ្លេស
នាយករដ្ឋមន្ត្រីអង់គ្លេសលោក បូរីស ចនសុន នៅថ្ងៃចន្ទ ១២ កក្កដានេះបាននិយាយថ្កោលទោសចំពោះការរើសអើសជាតិសាសន៍ សំដៅកីឡាបាល់ទាត់អង់គ្លេសស្បែកខ្មៅបីរូបដែលទាត់បាល់ប៉េណាល់ទីមិនចូល ក្នុងពេលប្រកួតវគ្គផ្តាច់ព្រ័ត្រពានរង្វាន់បាល់ទាត់ទ្វីបអឺរ៉ុបឆ្នាំ ២០២០ ទល់នឹងក្រុមជម្រើសជាតិអ៊ីតាលី។
ចុះផ្សាយនៅថ្ងៃ៖
កីឡាករអង់គ្លេសស្បែកខ្មៅទាំងបីរូបរួមមាន Jadon Sancho, Marcus Rashford និង Bukayo Saka។ ពួកគេទាំងបីនាក់ បានក្លាយជាគោលដៅវាយប្រហារតាមរយៈបណ្តាញសង្គមក្រោយខកខានមិនអាចស៊ុតបាល់ប៉េណាល់ទី ឬបាល់ ១១ម៉ែត្រចូលសំណាញ់ទីរបស់អ៊ីតាលីកាលពីយប់ថ្ងៃអាទិត្យម្សិលមិញ។
ប៉ូលិសទីក្រុងឡុងដ៍ដែលកំពុងស៊ើបអង្កេតអំពីការរំលោភបំពាននេះបាននិយាយថា មានការបញ្ចេញមតិជាច្រើនលើបណ្តាញសង្គមតម្រង់ឆ្ពោះទៅកាន់តារាបាល់ទាត់។ មតិដែលមានលក្ខណៈរំលោភបំពាន និងរើសអើងជាតិសាសន៍នឹងមិនត្រូវបានអត់ឱនឲ្យទេ។
ការរើសអើងនេះក៏ត្រូវបានថ្កោលទោសផងដែរពីសំណាក់លោកនាយករដ្ឋមន្ត្រីបូរីស ចនសុន និងព្រះអង្គម្ចាស់វីលៀមដែលមានតួនាទីជាប្រធានសមាគមកីឡាបាល់ទាត់។
លោកចនសុន បាននិយាយថាក្រុមជម្រើសជាតិអង់គ្លេសស័ក្តិសមនឹងទទួលបានការកោតសរសើរថាជាវីរៈបុរសមិនមែនមកត្រូវបានគេរំលោភបំពាន រើសអើងជាតិសាសន៍លើបណ្តាញសង្គមនោះទេ។ ហើយអ្នកដែលបញ្ចេញមតិរិះគន់រំលោភបំពានបែបនេះគួរតែចេះខ្មាស់ខ្លួនឯង។ លោកនាយករដ្ឋមន្ត្រីបានបន្ថែម។
ចំណែកព្រះអង្គម្ចាស់វីលៀម ជាប្រធានសមាគមកីឡាបាល់ទាត់និងដែលបានចូលរួមក្នុងវគ្គក្រកួតបាល់ផ្តាច់ព្រ័ត្រ បានមានព្រះបន្ទូលថាទ្រង់មានការហួសព្រះទ័យណាស់ចំពោះការរំលោភបំពាននេះ។ ព្រះអង្គបានសរសេរលើបណ្តាញសង្គមធ្វីតទ័រថា វាមិនអាចទទួលយកបានទេដែលកីឡាករ ត្រូវស៊ូទ្រាំនឹងអាកប្បកិរិយាគួរស្អប់ខ្ពើមបែបនេះ។ ការរំលោភបំពាន ការរើសអើង ត្រូវតែបញ្ឈប់ឥឡូវនេះ ហើយអ្នកដែលពាក់ព័ន្ធទាំងអស់គួរតែទទួលខុសត្រូវចំពោះទង្វើរបស់ពួកគេ។
នៅក្នុងសេចក្តីថ្លែងការណ៍មួយ ក្រុមហ៊ុនហ្វេសប៊ុកបាននិយាយថាខ្លួនបានលុបចោលមតិយោបល់និងគណនីដែលបង្ហោះសារក្នុងន័យរំលោភបំពានរើសអើសកីឡាករបាល់ទាត់អង់គ្លេសយ៉ាងឆាប់រហ័ស។ ជាមួយគ្នានេះ ហ្វេសប៊ុកថានឹងបន្តចាត់វិធានការប្រឆាំងនឹងអ្នកដែលបំពានគោលការណ៍របស់ខ្លួន។
គួររំឭកថា ការប្រកួតវគ្គផ្តាច់ព្រ័ត្រពានរង្វាន់ជើងឯកបាល់ទាត់ទ្វីបអឺរ៉ុបឆ្នាំ២០២០ (Euro 2020) នាកីឡដ្ឋាន Wembley កាលពីយប់ថ្ងៃអាទិត្យ ១១ កក្កដា រវាងក្រុមជម្រើសជាតិអង់គ្លេស និងអ៊ីតាលីបញ្ចប់ដោយលទ្ធផល ១ ទល់នឹង ១។ ក្រោយបន្ថែមម៉ោង១៥នាទី២ដង ហើយនៅតែមិនអាចរកអ្នកឈ្នះឃើញ ទើបឈានដល់វគ្គបាល់ប៉េណាល់ទីដើម្បីកាត់សេចក្តី។ នៅទីបំផុត ក្រុមអីតាលីបានឈ្នះក្រុមអង់គ្លេសដោយលទ្ធផល ៣ ទល់នឹង២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ