ម៉ាក្រុង ៖ បារាំង “ជំពាក់បំណុល” ប្រជាជនប៉ូលីណេស៊ី ទាក់ទងនឹងការសាកល្បងនុយក្លេអ៊ែរ
ក្នុងដំណើរទស្សនកិច្ចនៅប៉ូលីណេស៊ី លោកប្រធានាធិបតី ម៉ាក្រុង ប្រកាសទទួលស្គាល់ថា បារាំង “ជំពាក់បំណុល” ប្រជាជនប៉ូលីណេស៊ី ទាក់ទងនឹងការសាកល្បងនុយក្លេអ៊ែរកាលពីអតីតកាល។ សំណុំរឿងសាកល្បងនុយក្លេអែរ នៅតំបន់ដែនដីនាយសមុទ្រប៉ូលីណេស៊ី គឺជារឿងដ៏រស៊ើប ដែលរដ្ឋអំណាចបារាំង ព្យាយាមជៀសវាង ជាច្រើនទសវត្សរ៍មកហើយ។ ក្នុងដំណើរទស្សនកិច្ច ចំនួន៤ថ្ងៃ ប្រធានាធិបតី ម៉ាក្រុង ក៏បានទុកដល់ថ្ងៃចុងក្រោយ ទើបលោកថ្លែងការណ៍ពីសំណុំរឿងដ៏រស៊ើបនេះ ទៅកាន់ប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៥៩
ក្រៅពីប្រកាសថា ប្រទេសបារាំង « ជំពាក់បំណុល»ពលរដ្ឋប៉ូលីណេស៊ី លោក ម៉ាក្រុង បានសន្យាបើកបង្ហាញការពិតនិងតម្លាភាព រយៈអនុញ្ញាតផ្តល់លទ្ធភាពឲ្យអ្នកស្រាវជ្រាវមើលនិងអានឯកសារសម្ងាត់តម្កល់នៅបណ្ណាសារ។
ការសាកល្បងនុយក្លេអ៊ែររបស់ទ័ពបារាំង នៅប៉ូលីណេស៊ី គឺធ្វើឡើងនៅចន្លោះ ឆ្នាំ១៩៦៦ ដល់១៩៩៦។ ក្នុងរយៈពេល៣០ឆ្នាំនោះ បារាំងបានសាកល្បងនុយក្លេអ៊ែរ ចំនួន១៩៣ នៅលើអាកាស និងនៅក្រោមសមុទ្រ។
អតីតប្រធានាធិបតីបារាំង ហ្វ្រង់ស័រ ហូឡង់ ពេលទៅទស្សនកិច្ចនៅប៉ូលីណេស៊ី កាលពីឆ្នាំ ២០១៦ ទទួលស្គាល់ថា ការសាកល្បងនុយក្លេអ៊ែរ បានជះផលប៉ះពាល់ដល់បរិស្ថាន។ ចំណែកប្រជាពលរដ្ឋប៉ូលីណេស៊ីនិងសមាគមសិទ្ធិមនុស្ស អះអាងថា ព្រោះតែការសាកល្បងនុយក្លេអ៊ែរ គឺធ្វើឲ្យពលរដ្ឋប៉ូលីណេស៊ី មានបញ្ហាជំងឺមហារីក ជាច្រើននាក់។ ព្រឹទ្ធសភា បារាំង បានធ្វើរបាយការណ៍ស៊ើបអង្កេតកាលពីឆ្នាំ២០១៣ រកឃើញថា អាចមានផលប៉ះពាល់ដល់មនុស្សយ៉ាងហោច ២ពាន់នាក់។
ថ្ងៃពុធ ទី២៨កក្កដា ប្រធានាធិបតី ម៉ាក្រុង ថ្លែងថា អ្នកដែលទទួលរកផលប៉ះពាល់ នឹងត្រូវស្រាវជ្រាវរក ហើយនឹងត្រូវជួយប៉ះប៉ូវការខូចខាត។
សូមជ្រាបថា ប៉ូលីណេស៊ី ជា ដែនដីឯនាយសមុទ្ររបស់បារាំង ហើយទទួលជំនួយថវិកាជាប្រចាំ ពីរដ្ឋបារាំង ប្រមាណ ១,៥ ពាន់លានអឺរ៉ូ ជារៀងរាល់ឆ្នាំ។ ពេលទៀតនេះ ប្រមុខរដ្ឋបារាំង បានសន្យាផ្តល់ជំនួយវិនិយោគ ៣០០លានអឺរ៉ូ ហើយ៦០០លានអឺរ៉ូ សម្រាប់ជួយដោះស្រាយវិបត្តិកូវីដ១៩ នៅប៉ូលីណេស៊ី។ លោក ម៉ាក្រុង ក៏បានអំពាវនាវឲ្យពលរដ្ឋប៉ូលីណេស៊ី ទៅទទួលថ្នាំបង្ការកូវីដ ព្រោះបារាំងបានផ្តល់ជំនួយវ៉ាក់សាំង ២៣ម៉ឺនដូស ហើយនៅសល់១១ម៉ឺនដូចទៀត ដែលកំពុងរង់ចាំមនុស្ស ទៅចាក់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ