នារីអត្តពលិកបេឡារុស ដែលរិះគន់ថ្នាក់ដឹកនាំខ្លួន ចាកចេញពីតូក្យូឆ្ពោះទៅប៉ូឡូញ
កីឡាការិនីអូឡាំពិកជាតិបេឡារុស ដែលរិះគន់សហព័ន្ធកីឡាជាតិរបស់ខ្លួន បានធ្វើដំណើរទៅដល់ទីក្រុងវីយ៉ែន ប្រទេសអូទ្រីស ហើយ ពីថ្ងៃពុធ ទី៤សីហា។ អ្នកនាំពាក្យក្រសួងការបរទេសអូទ្រីស ប្រកាសប្រាប់អ្នកកាសែតថា នាងបន្តដំណើរទៅក្រុងវ៉ាសូវី ប្រទេសប៉ូឡូញជាបន្តទៀត។ នារីអត្តពលិករូបនេះ ព្រួយបារម្ភពីសុវត្ថិភាពរបស់ខ្លួន និងមិនហ៊ានត្រឡប់ទៅស្រុកកំណើតវិញ គឺក្រោយនាងបានរិះគន់គណៈកម្មាធិការអូឡាំពិកបេឡារុស ដែលដឹកនាំដោយកូនប្រុសរបស់បុរសខ្លាំងបេឡារុស គឺលោកប្រធានាធិបតី អាឡិចសង់ លូកាឆិនកូ។ នាងបានសុំជំនួយពីគណៈកម្មាធិការអូឡាំពិកអន្តរជាតិ ហើយនៅពេលនេះ ប្រទេសប៉ូឡូញ បានសម្រេចផ្តល់«ទិដ្ឋាការមនុស្សធម៌»ដល់រូបនាងនិងស្វាមី។
ចុះផ្សាយនៅថ្ងៃ៖
ស្តាប់ - ០២:២៦
តាមពិតទៅ នាង Krystsina Tsimanouskaya ត្រូវជិះយន្តហោះត្រង់ឆ្ពោះទៅក្រុងវ៉ាសូវី ប្រទេសប៉ូឡូញតែម្តង ក៏ប៉ុន្តែគម្រោងការនេះត្រូវកែប្រែយ៉ាងឆាប់រហ័ស និងយ៉ាងសម្ងាត់ ដោយត្រូវចុះចតនៅក្រុងវីយែន ប្រទេសអូទ្រីសសិន។ ការផ្លាស់ប្តូរយ៉ាងលឿនដូចផ្លែកបន្ទោរនេះ ព្រោះក្រែងរដ្ឋអំណាចបេឡារុស លួចបង្វែរយន្តហោះ ឲ្យហោះត្រឡប់ទៅប្រទេសបេឡារុស។ គេបារម្ភដូច្នេះ ព្រោះថា រដ្ឋអំណាចបេឡារុស ថ្មីៗនេះ បានបង្វែរយន្តហោះដឹកនាំអ្នកកាសែតប្រឆាំង រួចម្តងហើយ។
ដើមហេតុនៃការរត់ភៀសខ្លួនយ៉ាងទាន់ហន់ដូច្នេះ ពីព្រោះកីឡាការិនី បេឡារុសរូបនេះ មិនហ៊ានទៅស្រុកកំណើតវិញ ព្រួយខ្លាចពីសុវត្ថិភាព។ ជាច្រើនថ្ងៃមកហើយ នាងសម្ងំលាក់ខ្លួន ក្នុងស្ថានទូតប៉ូឡូញ នៅប្រទេសជប៉ុន ជាទីដែលនាងចូលរួមប្រកួតកីឡាអូឡាំពិក។
កាលពីថ្ងៃសុក្រ សប្តាហ៍មុន កីឡាការិនី វ័យ២៤ឆ្នាំ រូបនេះ រិះគន់ខ្លាំងៗ ជាវីដេអូ ដាក់ក្នុងបណ្តាញសង្គម ស្តីបន្ទោសការធ្វេសប្រហែលរបស់សហព័ន្ធកីឡាបេឡារុស។ សហព័ន្ធតម្រូវទាំងបង្ខំឲ្យរូបនាងរត់តវិញ្ញាសាផ្សេងបន្ថែមលើវិញ្ញាសារបស់នាង។ ដ្បិតកីឡាករផ្សេងៗជាប់ធ្វើតេស្តសុខភាព និងខ្វះកីឡាករ។ បន្ទាប់ពីរិះគន់យ៉ាងដូច្នេះ នៅថ្ងៃអាទិត្យ នាងស្រាប់តែត្រូវប៉ុនប៉ង់ចាប់បង្ខំពីសំណាក់គ្នីគ្នារដ្ឋអំណាច ក្នុងបំណងយករូបនាងពីតូក្យូទៅបេឡុរស។
តាមប្រភពស្និទនឹងកីឡាការិនីរូបនេះ នាងក៏ចង់សុំសិទ្ធជ្រកកោននៅអូទ្រីសដែរ ព្រោះគ្រូបង្វិកនាងម្នាក់ គឺជាជនជាតិអូទ្រីសស្រាប់។ ក៏ប៉ុន្តែ ប្រទេសអូទ្រីស គឺជាដៃគូសេដ្ឋកិច្ចចម្បងមួយ របស់បេឡារុស ហើយមានក្រុមហ៊ុនបេឡារុស៤ធំៗ កំពុងតែប្រតិបត្តិការណ៍នៅអូទ្រីសទៀត។ ដូច្នេះហើយ ទើបនាងទំនងជាត្រូវសម្រេចជ្រើសរើសបន្តទៅប៉ូឡូញ។
ពេលស្របាលដំណាលគ្នាដែលយន្តហោះក្រុមហ៊ុនអូទ្រីសដឹកនាំរូបនាងចុះចតដល់ក្រុងវីយ៉ែន វេលាម៉ោង៣រសៀល ម៉ោងនៅក្នុងស្រុកអូទ្រីស អ្នកនាំពាក្យរដ្ឋាភិបាលប៉ូឡូញ ក៏បានប្រកាសប្រាប់អ្នកកាសែត ថា ប៉ូឡូញបានផ្តល់ ទិដ្ឋាការមនុស្សធម៌ មួយទៀត ជូនស្វាមីរបស់នាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ