ក្រោយវិបត្តិកូវីដ ពិភពលោកត្រូវធ្ងន់កនឹងបំណុលអាកាសធាតុ
ប្រទេសអ្នកមាន ចាប់បង្កើនចំណាយដ៏មហាសាលដើម្បីសាកល្បងកំរិតឥទ្ធិពលបង្កឡើងដោយការប្រែប្រួលអាកាសធាតុ ជាក់ស្តែង អាល្លឺម៉ង់បានបង្កើតមូលនិធិស្ថាបនាតំបន់រងគ្រោះទឹកជំនន់ឡើងវិញក្នុងទំហំទឹកប្រាក់៣០ពាន់លានអឺរ៉ូ។ សិង្ហបុរី គ្រោងវិនិយោគ៧២ពាន់លានដុល្លារដើម្បីការពារប្រទេសទល់នឹងការឡើងកម្ពស់ទឹកសមុទ្ទ ... ចំណែកប្រទេសកំពុងលូតលាស់ ពិតជាគ្រោះជាន់លើគ្រោះ កំពុងហិនហោចដោយជំងឺរាតត្បាតកូវីដ ត្រូវគិតដល់វិបត្តិអាកាសធាតុមួយទៀត។ ជាសរុប ដោយហេតុកូវីដបំណុលពិភពលោកបានកើនឡើងដល់កំរិតខ្ពស់បំផុតពុំធ្លាប់មានទេ ប៉ុន្តែការប្រែប្រួលអាកាសធាតុនឹងធ្វើឱ្យបំណុលនេះនឹងកាន់ធ្ងន់ធ្ងរខ្លាំងបន្ថែមទៀត រហូតធ្វើឱ្យប្រទេសខ្លះអាចនឹងធ្លាក់ខ្លួនក្ស័យធនតែម្តងផង។ នេះបើតាមការព្យាកររបស់ភ្នាក់ងារជំនាញជាច្រើន។
ចុះផ្សាយនៅថ្ងៃ៖
ស្តាប់ - ០២:២១
កិច្ចសន្យាកាត់បន្ថយឧស្ម័នផ្ទះកញ្ចក់របស់រដ្ឋាភិបាលជាច្រើន ដែលពុំទាន់ហុចលទ្ធផលជាក់ស្តែងនៅពេលនេះ បានមកបំប៉ោងបំណុលពិភពលោកឱ្យកើនឡើងដល់៦២៥០០ពាន់លានដុល្លារនៅចុងឆ្នាំ២០២០។ នេះបើតាមក្រុមអ្នកចាត់ចែងមូលប័ត្រ Janus Henderson ហើយនៅឆ្នាំ២១០០ បើតាមធនាគារអាមេរិក បំណុលពិភពលោកនឹងឡើងដល់ពី៥៤ទៅ៦៩០០០ពាន់លាន សម្រាប់ចំណូលសរុបក្នុងស្រុកដែលមានត្រឹមប្រមាណ៨០០០០ពាន់លានដុល្លារ។ បើនិយាយពីប្រទេសមួយៗវិញ ក្រុមប្រទេសមានសេដ្ឋកិច្ចកំពុងលូតលាស់ នឹងមានបំណុលឡើងដល់៦០%នៃផលិតផលសរុបទល់នឹង៥២% កាលមុនវិបត្តិកូវីដ អាមេរិកនិងអាល្លឺម៉ង់ បំណុលឡើងស្មើនឹងចំណូលសរុប ជប៉ុនឡើងដល់២០០% ។
មិនយូរទេ ដែលបំណុលទាក់ទងនឹងអាកាសធាតុ នឹងធ្លាក់មកសង្កត់ក ពិភពលោកឱ្យត្រដរខ្យល់នោះ។ នេះបើតាមសហប្រធានការសិក្សានិងជាអ្នកទទួលខុសត្រូវការវិនិយោគមិនចេះរីងស្ងួត FTSE Russell ដោយបានសម្តែងការភ្ញាក់ផ្អើលថា ថ្វីបើប្រទេសក្រីក្រកំពុងអភិវឌ្ឍន៍ងាយរងគ្រោះខ្លាំងនឹងការប្រែប្រួលអាកាសធាតុមែន តែប្រទេសអ្នកមាន ប្រទេសជាគំរូល្អ ក៏ទទួលរងផលវិបាកអាក្រក់ខ្លាំងដែរ ហើយសេដ្ឋកិច្ចរបស់ប្រទេសអ្នកមានក៏មិនអាចរួចខ្លួនដែរ។
ក្នុងសេណារីយ៉ូដែលមានការប្រែប្រួលអាកាសធាតុអាក្រក់បំផុត ប្រទេសដូចយ៉ាងម៉ាឡេស៊ី អាហ្វ្រិកខាងត្បូង ម៉ិចស៊ិក ឬក៏ប្រទេសមានសេដ្ឋកិច្ចខ្លាំងដូចយ៉ាងអ៊ីតាលី នឹងអាចត្រូវក្ស័យធននៅឆ្នាំ២០៥០។ នេះបើតាមស្ថាប័ន FTSE Russell ដដែល។
ប៉ុន្តែក្រុមប្រទេសដែលបញ្ចេញសកម្មភាពយឺតយ៉ាវ ដូចជាអូស្ត្រាលី ប៉ូឡូញ ជប៉ុន ឬអ៊ីស្រាអែល ត្រូវប្រឈមនឹងហានិភ័យធ្លាក់ចំណាត់ថ្នាក់ដែរ និងមានរហូតដល់៦៣ប្រទេស នឹងត្រូវភ្នាក់ងារS&P Global, Moody’s & Fitch ទម្លាក់ចំណាត់ថ្នាក់ នៅឆ្នាំ២០៣០ ដោយមូលហេតុអាកាសធាតុប្រែប្រួល។
ចិន ស៊ីលី ម៉ាឡេស៊ី និងម៉ិចស៊ិក អាចនឹងប៉ះពាល់ធ្ងន់ធ្ងរជាងគេ ដោយត្រូវទម្លាក់ចំណាត់៦លេខចុះក្រោម រីឯសហរដ្ឋអាមេរិក អាល្លឺម៉ង់ កាណាដា អូស្ត្រាលី ឥណ្ឌា និងប៉េរ៉ូ អាចនឹងធ្លាក់ចំណាត់ថ្នាក់បួនលេខ។
ចំពោះមូលនិធិរូបិយវត្ថុអន្តរជាតិវិញ ការប្រែប្រួលអាកាសធាតុនឹងធ្វើឱ្យភាពងាយរងគ្រោះកើនឡើងផង និងបង្កើនចំណាយប្រចាំឆ្នាំសម្រាប់សម្របប្រទេសនឹងអាកាសធាតុ កាន់តែធំទៀត។ គឺប្រទេសក្រីក្រកំពុងអភិវឌ្ឍ ដែលត្រូវការចំណាយធំខ្លាំង ដល់ទៅ ៣០០ពាន់លានដុល្លារ នៅឆ្នាំ២០៣០ និង៥០០ពាន់លាន នៅឆ្នាំ២០៥០សម្រាប់សម្របខ្លួននឹងអាកាសធាតុ។ នេះបើតាមភ្នាក់ងារបរិស្ថានអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ