ការសិក្សា៖ ប្រសិទ្ធភាពវ៉ាក់សាំងPfizerនិងAstraZenecaទល់មេរោគដែលតាថយចុះ៣ខែក្រោយចាក់
លទ្ធផលនៃការសិក្សារបស់អង់គ្លេសមួយបង្ហាញថា ប្រសិទ្ធភាពវ៉ាក់សាំង Pfizer និង AstraZeneca ប្រឆាំងទល់នឹងមេរោគបំប្លែងខ្លួនដែលតា ត្រូវថយចុះខ្សោយ នៅរយៈពេល ៣ខែក្រោយចាក់។ យោងតាមអ្នកជំនាញ ការធ្លាក់ចុះនៃប្រសិទ្ធភាពវ៉ាក់សាំង កើតឡើងច្រើនចំពោះក្រុមមនុស្សដែលមានអាយុ ៣៥ ឆ្នាំ និងក្រុមអ្នកដែលមានអាយុក្រោមនេះ។
ចុះផ្សាយនៅថ្ងៃ៖
ស្តាប់ - ០២:២០
អ្នកដែលបានឆ្លងមេរោគបំប្លែងខ្លួនប្រភេទដែលតា ក្រោយពីបានចាក់វ៉ាក់សាំងបង្ការកូវីដ Pfizer-BioNTech ឬ AstraZeneca ពីរដូស អាចមានហានិភ័យខ្ពស់ជាងអ្នកដែលឆ្លងមេរោគបំប្លែងប្រភេទផ្សេងទៀត។ នេះបើយោងតាមលទ្ធផលនៃការស្រាវជ្រាវ។
ផ្អែកលើការសិក្សាលើមនុស្សជាង ៣ លាននាក់នៅក្នុងប្រទេសអង់គ្លេស សាកលវិទ្យាល័យ Oxford បានស្រាវជ្រាវរកឃើញថា រយៈពេល ៩០ ថ្ងៃក្រាយចាក់វ៉ាកសាំង Pfizer ឬ Astrazeneca ដូសទី២ ប្រសិទ្ធភាពវ៉ាក់សាំងប្រឆាំងទល់នឹងមេរោគដែលតាថយចុះដល់ចំនួន ៧៥% និង ៦១%។
អត្រាប្រសិទ្ធភាពធ្លាក់ចុះពីចំនួន ៨៥% និង ៦៨% ត្រូវបានរកឃើញ ក្រោយការចាក់វ៉ាក់សាំងដូសទីពីរហើយបានពីរសប្តាហ៍។ ការធ្លាក់ចុះនៃប្រសិទ្ធភាពវ៉ាក់សាំង ត្រូវបានគេកត់សម្គាល់ឃើញច្រើនក្នុងចំណោមក្រុមមនុស្សដែលមានអាយុ ៣៥ ឆ្នាំ និងក្រុមអ្នកដែលមានអាយុក្រោមនេះ។
យ៉ាងណាក៏ដោយ ការទទួលបានការចាក់ថ្នាំវ៉ាក់សាំង Pfizer-BioNTech ឬវ៉ាក់សាំង AstraZeneca ចំនួនពីរដូស នៅតែជាវិធីល្អបំផុតមួយ ដើម្បីការពារប្រឆាំងទល់នឹងមរោគបំប្លែងដែលកាចសាហាវដូចដែលតា។ នេះបើយោងតាមប្រសាសន៍របស់លោកស្រី Sarah Walker ដែលជាអ្នកជំនាញ និងជាប្រធានផ្នែកសិក្សាស្រាវជ្រាវរបស់សាកលវិទ្យាល័យ Oxford។
គួរបញ្ជាក់ថា មកទល់នឹងពេលនេះ ក្រុមអ្នកស្រាវជ្រាវនៅមិនទាន់សិក្សាដឹងច្បាស់នោះទេថាតើប្រសិទ្ធភាពរបស់វ៉ាក់សាំង Pfizer ឬវ៉ាក់សាំង AstraZeneca ទល់មេរោគដែលតានឹងថយចុះកម្រិតណាឲ្យប្រាកដនោះទេ។ ប៉ុន្តែ គេប៉ាន់ស្មាថាប្រសិទ្ធភាពនៃវ៉ាក់សាំងទាំងពីរប្រភេទអាចធ្លាក់ដល់កម្រិតប្រហាក់ប្រហែលគ្នា ៤-៥ ខែ ក្រោយចាក់ដូសទី២ហើយ។
គួរជ្រាបដែរថា លទ្ធផលនៃការសិក្សារបស់សាកលវិទ្យាល័យOxford មិនខុសគ្នាពីការវិភាគដោយមជ្ឈមណ្ឌលគ្រប់គ្រងនិងបង្ការជំងឺអាមេរិក (CDC) ឡើយ។ ហើយដើម្បីការពារប្រជាជនដែលប្រឈមនឹងមេរោគបំប្លែងខ្លួនដែលតា រដ្ឋាភិបាលអាមេរិកបានដាក់ចេញនូវផែនការបង្កើនសន្ទុះនៃយុទ្ធនាការការចាក់វ៉ាក់សាំងបង្ការកូវីដជូនប្រជាជនឲ្យបានយ៉ាងទូលំទូលាយនៅខែកញ្ញាក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ