សម្តេចប៉ាប ហ្វ្រង់ស័រទៅជួបសន្ទនាជាមួយនាយករដ្ឋមន្រ្តីប្រជានិយម របស់ហុងគ្រី
ប្រមុខសង្ឃកាតូលិក សម្តេចប៉ាប ហ្រ្វង់ស័របានយាងទៅដល់ទីក្រុងប៊ូដាប៉េស នៅថ្ងៃអាទិត្យនេះ ដើម្បីចូលរួមក្នុងពិធីបិទសមាជសាសនាអន្តរជាតិ។ នៅក្នុងដំណើរទស្សនកិច្ចរយៈពេលដ៏ខ្លី តែ ៧ម៉ោង គ្រប់ក្រសែភ្នែកកំពុងសំលឹងតាមដានមើលជំនួបពិភាក្សា រវាងប្រមុខសង្ឃកាតូលិក ដែលគាំទ្រ បុព្វហេតុជួយប្រជាជនអន្តោប្រវេសន៍ និងនាយករដ្ឋមន្រ្តីហុងគ្រី លោកវិចទ័រ អរបាន ដែលមាននិន្នាការ ប្រឆាំង បិទទ្វារមិនទទួលជនបរទេស។
ចុះផ្សាយនៅថ្ងៃ៖
ស្តាប់ - ០២:២៥
សម្តេចប៉ាប ហ្វ្រង់ស័រ បានជួបចាប់ដៃជាមួយនាយករដ្ឋមន្រ្តីហុងគ្រី លោកវិចទ័រ អរបាន ដែលមានអមដោយឧបនាយករដ្ឋមន្រ្តី និងប្រធានាធិបតី ហុងគ្រី នៅក្នុងជំនួបបិទទ្វារមួយ នៅថ្ងៃអាទិត្យនេះ នៅសារមន្ទីរជាតិ នៅទីក្រុងប៊ូដាប៉េស។
រូបភាព ចាប់រលាក់ដៃរវាង ប្រមុខសង្ឃកាតូលិក និង នាយករដ្ឋមន្រ្តីហុងគ្រី មានបង្កប់ដោយអត្ថន័យជ្រៅ ព្រោះថា ម្ខាង គឺជា នាយករដ្ឋមន្រ្តី ហុងគ្រី មេដឹកនាំដែល ចេញមុខអះអាងថា ជាអ្នកការពារ សាសនាគ្រឹះនៅទឹកដីអឺរ៉ុប ពីការលុកលុយ របស់ជនអន្តោប្រវេសន៍ អ៊ីស្លាម។ ចំណែកម្ខាងទៀត គឺសម្តេចសង្ឃ កាតូលិក ហ្វ្រង់ស័រ ដែល តែជំរុញ ឲ្យមេដឹកនាំទាំងអស់ ជួយ ប្រជាជនមកពីគ្រប់ជំនឿសាសនា ដែលបានរត់គេចចេញពីសង្រ្គាម និងភាពក្រីក្រ។
សម្តេចប៉ាប មិនដែលរារែក នឹងថ្កោលទោស អំពើហិង្សា ការរើសអើងទៅលើជនភៀសខ្លួន ជនអន្តោប្រវេសន៍ មកពីស៊ីរី អាហ្វហ្កានីស្ថាន អ៊ីរ៉ាក់ ដែលត្រូវជាប់គាំងនៅមាត់ច្រកទ្វារចូលអឺរ៉ុប បន្ទាប់ពីប្រទេសអឺរ៉ុបមួយចំនួន ដូចជាហុងគ្រីជាដើមដែលបានបិទព្រំដែន មិនទទួលជនអន្តោប្រវេសន៍ ជនភៀសខ្លួន។ រហូតមក សម្តេចប៉ាបតែង និយាយបញ្ចុះបញ្ចូលមេដឹកនាំស្តាំនិយមជ្រុលក្នុងពិភពលោក ឲ្យចែករំលែកគំនិតសណ្តោសប្រណី អ្នកដទៃ ជាមួយព្រះអង្គ។
ជាមួយ លោកនាយករដ្ឋមន្រ្តី ហុងគ្រី តើ ប្រមុខសង្ឃកាតូលិក នឹងនិយាយ ពីបញ្ហាជនអន្តោប្រវេសន៍ ការយោគយល់ ដល់អ្នកដែលស្រឡាញ់ភេទដូចគ្នា ដែលសុទ្ធតែជារឿង រសើប ហាមឃាត់ របស់រដ្ឋាភិបាលហុងគ្រី ដែរឬទេ?
នៅក្រោយ ជំនួប ជាមួយសម្តេចសង្ឃ លោកនាយករដ្ឋមន្រ្តី ហុងគ្រី បានសរសេរបង្ហោះ ក្នុងទំព័រហ្វេសប៊ុករបស់លោកថា “ខ្ញុំបានស្នើសុំសម្តេចសង្ឃជួយកុំឲ្យសាសនាគ្រឹស្តសាសនានៅ ហុងគ្រី ត្រូវរលាយ” ចំណែក បុរីវ៉ាទីកង់វិញ បានចេញសេចក្តីថ្លែងការណ៍ដែលថា សម្តេចប៉ាបបាននិយាយពីប្រធានបទសំខាន់ៗមួយចំនួន ដូចជា តួនាទីរបស់វិហារកាតូលិក នៅហុងគ្រី ការចូលរួមការពារបរិស្ថាន និងការជួយការពារលើកតម្កើង តម្លៃគ្រួសារ។
សេចក្តីថ្លែងការណ៍របស់បុរីវ៉ាទីកង់មិនបានលើកឡើងថា សម្តេចប៉ាបបាននិយាយពីបញ្ហារើសអើងជនអន្តោប្រវេសន៍ដែរឬយ៉ាងណានោះទេ។ នៅមុនទស្សនកិច្ចរបស់ប្រមុខសង្ឃកាតូលិកនៅ ប្រទេសហុងគ្រី ប្រព័ន្ធផ្សព្វផ្សាយ ដែលគាំទ្រ លោកនាយករដ្ឋមន្រ្តី អភិរក្សនិយមជ្រុល វិចទ័រ អរបានហើយនិងអ្នកនយោបាយស្តាំនិយមជ្រុល នៅហុងគ្រីមួយចំនួន ធ្លាប់បានសរសេររិះគន់ខ្លាំង សម្តេចប៉ាប ហ្រ្វង់ស័រ ថា ជាអ្នកប្រឆាំង គ្រឹស្តសាសនា ព្រោះព្រះអង្គតែងសំដែងក្តីមេត្តា ដល់ជនភៀសខ្លួន ដែលភាគច្រើន មានប្រភពចេញមកពីប្រទេសកាន់សាសនាអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ