ចម្ងល់និងការព្រួយបារម្ភ ក្រោយមហាក្សត្រីអេលីហ្សាបែតទី២ យាងចូលសម្រាកពេទ្យមួយយប់
ព្រះមហាក្សត្រីអេលីហ្សាបែតទី២ បានយាងចូលសម្រាកនៅមន្ទីរពេទ្យមួយយប់ កាលពីថ្ងៃពុធ ឈានចូលថ្ងៃព្រហស្បតិ៍ទី២១តុលា។ ដំណឹងនេះ ត្រូវបានព្រះបរមរាជវាំងអង់គ្លេស លាក់ការណ៍យ៉ាងសម្ងាត់ តែទីបំផុត ត្រូវបានកាសែត The Sun បានចុះផ្សាយទម្លាយ។ ក្រោយការបែកធ្លាយដំណឹងនេះ បានបណ្តាលឲ្យមានចម្ងល់ និងការព្រួយបារម្ភជាខ្លាំង អំពីស្ថានភាពសុខភាព របស់មហាក្សត្រីអេលីហ្សាបែត ទី២ ដែលមានព្រះជន្ន ៩៥ព្រះវស្សាទៅហើយនោះ។
ចុះផ្សាយនៅថ្ងៃ៖
ស្តាប់ - ០២:៣៧
នៅទីបំផុត បន្ទាប់ពីកាសែត The Sun បានចុះផ្សាយ ទើបព្រះបរមរាជវាំង Buckingham បានទទួលស្គាល់នៅយប់ថ្ងៃព្រហស្បតិ៍ ទី២១តុលា ថាព្រះមហាក្សត្រី អេលីហ្សាបែតទី២ ពិតជាបានយាងចូលទៅសម្រាកនៅមន្ទីរពេទ្យ Edward VII ពិតមែន នៅយប់ថ្ងៃពុធ ឈានចូលថ្ងៃព្រហស្បតិ៍។ តែយ៉ាងណា ព្រះបរមរាជវាំងអង់គ្លេស បានអះអាងថា ព្រះមហាក្សត្រីអេលីហ្សាបែតទី២ យាងទៅពិនិត្យសុខភាពតែប៉ុណ្ណោះ តែដើម្បីភាពងាយស្រួល ក៏សម្រាកមួយនៅទីនោះទៅ មិនមែនជាការព្យាបាលអ្វីទេ។
ដោយឡែក យោងតាមការចុះផ្សាយ របស់ទីភ្នាក់ព័ត៌មាន PA បានឲ្យដឹងថា នៅថ្ងៃសុក្រទី២២តុលា ព្រះមហាក្សត្រីអេលីហ្សាបែតទី២ បានយាងទៅសម្រាកព្រះកាយ នៅប្រាសាទ Windsor ជាយទីក្រុងឡុងដ៍។ លោកនាយករដ្ឋមន្ត្រីអង់គ្លេស បូរីស ចនសុន បានផ្ញើសារ ថ្វាយព្រះពរសូមឲ្យព្រះមហាក្សត្រីអេលីហហ្សាបែតទី២ មានសុខភាពមាំមួនផងដែរ។
គួររំលឹកថា កាលពីថ្ងៃពុធ ព្រះមហាក្សត្រីអេលីហ្សាបែតទី២ មានគម្រោងទៅទស្សនកិច្ច នៅអៀរឡង់ខាងជើង។ ក៏ប៉ុន្តែដំណើរនេះ ត្រូវបានលុបចោលវិញ បន្ទាប់ពីគ្រូពេទ្យប្រចាំកាយរបស់ព្រះអង្គ បានស្នើឲ្យព្រះអង្គសម្រាកឲ្យបានច្រើន។ កាលពីសប្តាហ៍មុន គេឃើញព្រះអង្គធ្វើដំណើរដោយកាន់ឈើច្រត់។
សូមបញ្ជាក់ថា ព្រះមហាក្សត្រីអេលីហ្សាបែតទី២ បច្ចុប្បន្នដែលមានព្រះជន្ន៩៥ព្រះវស្សា គឺជាមហាក្សត្រអង់គ្លេស ដែលបានគ្រងរាជបល្ល័ង្គ បានយូរជាងគេបំផុត ពោលគឺតាំងតែពីឆ្នាំ១៩៥២មក។ ប្រមាណជិត៧០មកនេះ ប្រជាប្រិយភាព របស់ទ្រង់នៅតែដក់ជាប់ក្នុងចិត្តប្រជាជនអង់គ្លេសទូទៅ ក៏ដូចជាមនុស្សមួយចំនួនធំទូទាំងពិភពលោក បើទោះបីជារាជវង្សអង់គ្លេស ក៏ដូចជាប្រទេសអង់គ្លេស បានឆ្លងកាត់វិបត្តិខ្លះក៏ដោយ។
ដំណឹងស្តីពីសុខភាពរបស់ព្រះមហាក្សត្រីអេលីហ្សាបែតទី២ គឺតែងតែត្រូវបានព្រះបរមរាជវាំង លាក់ការណ៍សម្ងាត់ខ្លាំងណាស់ ដើម្បីចៀងវាងបញ្ហាចលាចល ក្នុងចំណោមមតិមហាជន។ ថ្វីបើមានព្រះជន្ន ជាង៩០ព្រះវស្សា តែគេសង្កេតឃើញថា ព្រះអង្គមានសុខភាពមាំមួន ដោយថ្មីៗនេះ ព្រះអង្គនៅតែបន្តចូលរួមកម្មវិធីរដ្ឋ និងបានទទួលជួបភ្ញៀវកិត្តិយសធំៗ សឹងជារៀងរាល់ថ្ងៃ។ កាលពីខែមិថុនា ព្រះអង្គបានចូលរួមក្នុងជំនួបកំពូល G7 និងបានទទួលជួបស្វាគមន៍ លោកចូ បៃដិន។ តាមការគ្រោងទុក ព្រះមហាក្សត្រីអេលីហ្សាបែតទី២ ក៏នឹងចូលរួមផងដែរ ក្នុងឱកាសសន្និសីទអន្តរជាតិស្តីពីអាកាសធាតុ COP26 នៅដើមខែវិច្ឆិកា នៅឯទីក្រុងGlasgow តំបន់អេកូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ