លោកម៉ាក្រុងថាអូស្ត្រាលីនិយាយកុហកពីកិច្ចព្រមព្រៀងនាវាមុជទឹក
ប្រមុខរដ្ឋបារាំងលោក អេម៉ានុយអែល ម៉ាក្រុង នៅថ្ងៃអាទិត្យ ទី៣១ តុលាម្សិលមិញនិយាយថានាយករដ្ឋមន្ត្រីអូស្ត្រាលីបានកុហករូបលោកទាំងស្រុងទាក់ទងរឿងលុបចោលកិច្ចសន្យាទិញនាវាមុជទឹក។ ការលើកឡើងរបស់លោកម៉ាក្រុងនេះ បានធ្វើឲ្យវិបត្តិការទូតរវាងបារាំងនិងអូស្ត្រាលីដែលតានតឹងនឹងគ្នាស្រាប់កាន់តែធ្លាក់ចុះមួយកម្រិតបន្ថែមទៀត។
ចុះផ្សាយនៅថ្ងៃ៖
ស្តាប់ - ០១:៥៧
នៅក្រៅជំនួបកំពូលហ្សេ២០ កាលពីថ្ងៃអាទិត្យម្សិញមិញ លោកប្រធានាធិបតីបារាំងមានប្រសាសន៍ថានាយករដ្ឋមន្ត្រីអូស្ត្រាលី ស្កុត ម៉ូរីសុន បាននិយាយកុហកលោកទាក់ទិននឹងសំណុំរឿងនាវាមុជទឹក។
លោកប្រមុខរដ្ឋបារាំង មានការខឹងសម្បាយ៉ាងខ្លាំងចំពោះទង្វើអូស្ត្រាលីដែលបានហែកចោលកិច្ចសន្យាទិញនាវាមុជទឹកពីបារាំងចំនួន ១២គ្រឿងដែលមានតម្លៃ ៣១ពាន់លានអឺរ៉ូ និងបែរងាកទៅចុះកិច្ចព្រមព្រៀងសន្តិសុខថ្មីជាមួយសហរដ្ឋអាមេរិក និងអង់គ្លេសដែលហៅថា Aukus។
គួរបញ្ជាក់ថាប្រមុខដឹកនាំបារាំង និងអូស្ត្រាលីបានជួបមុខគ្នាក្នុងទីក្រុងរ៉ូមនៃប្រទេសអ៊ីតាលីដោយផ្ទាល់ជាលើកដំបូងនៅឯជំនួបហ្សេ ២០ ចាប់តាំងពីផ្ទុះវិបត្តិនាវាមុជទឹកក្នុងខែកញ្ញាមក។
នៅខាងក្រៅកិច្ចប្រជុំហ្សេ២០នេះដែរ នៅពេលអ្នកកាសែតអូស្ត្រាលីម្នាក់សួរថាតើលោកអាចនឹងទុកចិត្ត លោក ម៉ូរីសុន ម្ដងទៀតឬអត់? លោកម៉ាក្រុងឆ្លើយថាជឿ ឬមិនជឿគឺវាអាស្រ័យទៅនឹងទង្វើជាក់ស្តែងរបស់នាយករដ្ឋមន្ត្រីអូស្ត្រាលី។
លោកប្រមុខរដ្ឋបារាំងហាក់មិនបានឆ្លើយអស់ចេញពីចិត្តនោះទេនូវទស្សនៈរបស់លោក ហើយលោកបានសង្កត់ធ្ងន់ថាការឆ្លើយ ទៅនឹងសំណួរគឺត្រូវមានការគោរពគ្នាទៅវិញទៅមក។
ដោយឡែក នាយករដ្ឋមន្ត្រីអូស្ត្រាលី ស្កុត ម៉ូរីសុនវិញបានចេញមុខនិយាយការពារអាកប្បកិរិយារបស់ខ្លួន។ ជាក់ស្តែងកាលពីថ្ងៃអាទិត្យម្សិលមិញ ក្រោយការលើកឡើងរបស់លោកម៉ាក្រុង នាយករដ្ឋមន្ត្រីអូស្ត្រាលីរូបនេះបានប្រាប់ក្រុមអ្នកយកព័ត៌មានថា លោកមិនបាននិយាយកុហកមេដឹកនាំបារាំងនៅឯកិច្ចប្រជុំជាមួយគ្នាមួយកាលពីខែមិថុនាឡើយ។
ក្រៅពីនេះ មេដឹកនាំអូស្ត្រាលីក៏បញ្ជាក់ដែរថាកាលពីគ្រាកន្លងកន្លងទៅ លោកបានពន្យល់ភាគីបារាំងច្បាស់រួចហើយថានាវាមុជរបស់បារាំងលែងបំពេញតាមតម្រូវការការពារជាតិរបស់អូស្ត្រាលីទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ