លោកបៃដិនប្រាប់លោកម៉ាក្រុងថាអាមេរិកធ្វើឆ្គាំឆ្គងចំពោះបារាំងពាក់ព័ន្ធសំណុំរឿងនាវាមុជទឹក
ក្នុងជំនួបដោយផ្ទាល់ជាមួយប្រមុខរដ្ឋបារាំងក្នុងទីក្រុងរ៉ូមកាលពីថ្ងៃសុក្រ ២៩ តុលាម្សិលមិញ លោកប្រធានាធិបតីអាមេរិក ចូ បៃដិន បានទទួលស្គាល់ថាអាមេរិកបានធ្វើរឿងឆ្គាំឆ្គងចំពោះបារាំង។ ឆ្គាំឆ្គងដែលអាមេរិកបានចុះកិច្ចព្រមព្រៀងលក់នាវាមុជទឹកដោយសម្ងាត់ឲ្យអូស្ត្រាលី និងដែលបានធ្វើឲ្យបារាំងខាតបង់ប្រាក់អស់ប្រមាណ ៥៦ ពាន់លានអឺរ៉ូ។
ចុះផ្សាយនៅថ្ងៃ៖
ស្តាប់ - ០២:១០
ជំនួបកាលពីថ្ងៃសុក្រម្សិលមិញគឺជាជំនួបដោយផ្ទាល់លើកដំបូងរវាងលោក ចូ បៃដិន និងលោក ម៉ាក្រុង ចាប់តាំងពីផ្ទុះវិបត្តិនាវាមុជទឹកកាលពីខែកញ្ញាមក។ លោកប្រធានាធិបតីអាមេរិកបៃដិនដែលចង់ដោះស្រាយបញ្ហារកាំរកូសនេះ មិនបាននិយាយសុំទោសជាផ្លូវការទៅកាន់លោកប្រមុខរដ្ឋបារាំងម៉ាក្រុងនោះទេ ប៉ុន្តែបានទទួលស្គាល់ថាអាមេរិកមិនគួរចុះកិច្ចព្រមព្រៀងលក់នាវាមុជទឹកទៅឲ្យអូស្ត្រាលី នៅពីក្រោយខ្នងបារាំងដែលជាសម្ព័ន្ធមិត្តឡើយ។
នៅពេលជួបពិភាក្សាជាមួយលោកម៉ាក្រុង លោក បៃដិន បាននិយាយថាបារាំងគឺជាសម្ព័ន្ធមិត្តដ៏ល្អ និងជាដៃគូដ៏មានតម្លៃបំផុតសម្រាប់អាមេរិក។ ហើយបញ្ហាទាក់ទងសំណុំរឿងនាវាមុជទឹកគឺកើតឡើងដោយសារទង្វើឆ្គាំឆ្គងរបស់អាមេរិក។
បើទោះបីជាមិនបាននិយាយសុំទោសជាផ្លូវការយ៉ាងណាក្តី តែគេយល់ច្បាស់ថាកាយវិការរបស់លោក ចូ បៃដិន គឺជាសញ្ញាបញ្ជាក់ពីវិប្បដិសារីនឹកសោកស្តាយរបស់ឋអាមេរិក ក្រោយផ្ទុះជម្លោះការទូតដែលកាលណោះប្រទេសបារាំងបានកោះហៅ ឯកអគ្គរដ្ឋទូតរបស់ខ្លួនពីទីក្រុងវ៉ាស៊ីនតោន និងទីក្រុងកង់បេរ៉ាឲ្យវិលចូលស្រុកវិញ។
ពីខាងលោកភាគីបារាំងវិញ លោក អេម៉ានុយអែល ម៉ាក្រុង បានស្វាគមន៍ចំពោះកិច្ចខិតខំប្រឹងប្រែងរបស់អាមេរិកក្នុងការដោះស្រាយវិបត្តិនឹងគ្នា។ លោកម៉ាក្រុងបានគូសបញ្ជាក់ដែរថាការពិភាក្សាពិគ្រោះយោបល់គ្នាជាបន្តបន្ទាប់រវាងទីក្រុងប៉ារីស និងវ៉ាស៊ីនតោនបានកើតឡើងក្នុងប៉ុន្មានសប្តាហ៍ថ្មីៗនេះ ហើយបារាំងបានបញ្ជាក់ច្បាស់រួចហើយដែរ ពីអ្វីដែលខ្លួត្រូវបញ្ជាក់។ “អ្វីដែលសំខាន់នៅពេលនេះគឺជាអ្វីដែលយើងនឹងធ្វើជាមួយគ្នានាពេលខាងមុខ នាសប្តាហ៍ខាងមុខ ខែខាងមុខ និងនាប៉ុន្មានឆ្នាំខាងមុខ។ លោកម៉ាក្រុងបន្ថែម។
គួរបញ្ជាក់ថា កិច្ចប្រជុំរវាងលោកចូ បៃដិន និងលោកម៉ាក្រុងត្រូវបានធ្វើឡើងនៅឯស្ថានទូតបារាំងប្រចាំនៅបុរីវ៉ាទីកង់ចំកណ្តាលទីក្រុងរ៉ូមប្រទេសអ៊ីតាលី និងបានប្រព្រឹត្តទៅនៅមុនកិច្ចប្រជុំកំពូល G20 នៃមេដឹកនាំប្រទេសដែលមានសេដ្ឋកិច្ចនាំមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ