អឺរ៉ុបចង់ធ្វើច្បាប់ ហាមឃាត់ការនាំចូលទំនិញណា ដែលបានមកពីការបំផ្លាញព្រៃឈើ
គណកម្មការអឺរ៉ុប បានដាក់ស្នើគម្រោងច្បាប់មួយ ដែលកំណត់ហាមឃាត់ ការនាំចូលមកអឺរ៉ុប នូវទំនិញមួយចំនួន ដែលបានចូលរួមកាប់បំផ្លាញព្រៃឈើ។ ទំនិញទាំងនោះ អាចមានដូចជា សណ្តែកសៀង សាច់គោ ឈើ កាហ្វេ និងប្រេងដូង ជាដើម។ តែយ៉ាងណា គម្រោងចង់លាបពណ៌បៃតង ឲ្យដល់វិស័យនាំចូលអឺរ៉ុបនេះ ត្រូវតែឆ្លងកាត់ ការជជែកអនុម័តពីសមាជិកសភាអឺរ៉ុប ជាមុនសិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ជាយូរមកហើយ ដែលអង្គការបរិស្ថាននានា បានទាមទារឲ្យអឺរ៉ុប ត្រូវតែមានច្បាប់តាមដាន ហាមឃាត់ ការនាំចូលទំនិញណា ដែលបានចូលរួមបំផ្លាញព្រៃឈើ។ ទីបំផុតក្រោយ គណកម្មការអឺរ៉ុប បានសម្រេចស្នើសេចក្តីព្រាងច្បាប់មួយ ដាក់ទៅកាន់សភាអឺរ៉ុបអនុម័ត។ តាមរយៈគម្រោងច្បាប់នេះ អឺរ៉ុបចង់រៀបចំយន្តការច្បាប់ ហាមឃាត់ការនាំចូលទំនិញមួយចំនួន ដូចជាសណ្តែកសៀង សាច់គោ ប្រេងដូងប្រេង កាហ្វេ ឈើ និងកាកាវ ព្រមទាំងទំនិញកែច្នៃផ្សេងទៀតដូចជាគ្រឿងសង្ហារឹម សម្ភារៈតុបតែងផ្ទះជាដើម ឲ្យតែទំនិញទាំងនោះ មានពាក់ព័ន្ធ នឹងការកាប់បំផ្លាញព្រៃឈើ។
យោងតាមសេចក្តីព្រាង ដែលគណកម្មការអឺរ៉ុបបានបង្ហាញ គឺក្រុមហ៊ុននាំចូលទាំងអស់ ត្រូវមានកាតព្វកិច្ចប្រគល់ទិន្នន័យ និងព័ត៌មានច្បាស់លាស់ ស្តីពីប្រភព និងទីតាំងផលិត នៃផលិតផលនីមួយៗ។ វិធានការនេះគឺដើម្បីធានាថា វត្ថុធាតុដើម និងផលិតផលទាំងនោះ មិនបានកើតចេញពីការកាប់បំផ្លាញព្រៃឈើ ក្រោយខែធ្នូឆ្នាំ២០២០ ហើយជាផលិតផល ដែលមិនបំពាននឹងច្បាប់ហាមឃាត់ ក្នុងប្រទេសដើម។ ច្បាប់នេះ នឹងធ្វើការបែងចែក តំបន់ផ្សេងៗក្នុងពិភពលោក ដែលមានកម្រិតប្រឈមនឹងការកាប់បំផ្លាញព្រៃឈើខុសៗគ្នា ហើយយន្តការតាមដានពិនិត្យ នឹងមានកម្រិតពីស្រាលទៅធ្ងន់ ទៅតាមនោះដែរ។
សូមបញ្ជាក់ថា យោងតាមអង្គការ WWF ១៦% នៃទំនិញ ដែលនាំចូលមកអឺរ៉ុប គឺសុទ្ធតែមានប្រភព ឬពាក់ព័ន្ធនឹងការកាប់បំផ្លាញព្រៃឈើ។ លោក Virginijus Sinkevicius ស្នងការអឺរ៉ុប ទទួលបន្ទុកកិច្ចការបរិស្ថាន បានលើកឡើងថា គម្រោងច្បាប់ថ្មីរបស់អឺរ៉ុបនេះ នឹងអាចផ្តល់លទ្ធផលជាក់ស្តែង ដើម្បីឈានទៅទប់ស្កាត់ការបាត់បង់ សិករិចរិលនៃប្រព័ន្ធជីវចម្រុះ ព្រមទាំងទាំងដើម្បីប្រយុទ្ធប្រឆាំងនឹងបម្រែបម្រួលអាកាសធាតុ។ លោកអះអាងថា ការកាប់បំផ្លាញព្រៃឈើ បានចូលរួមចំនួនប្រមាណ១១% នៃទំហំឧស្ម័នផ្ទះកញ្ចក់។ អឺរ៉ុប រំពឹងថា គម្រោងច្បាប់ថ្មីនេះ នឹងអាចកាត់បន្ថយការបញ្ចេញឧស្ម័នកាបូនិក ចំនួន ៣១.៩លានតោន ក្នុងមួយឆ្នាំ។
គួរកត់សំគាល់ថា គម្រោងច្បាប់ថ្មីរបស់អឺរ៉ុបនេះ ត្រូវបានអង្គការបរិស្ថានភាគច្រើនអបអរ។ តែយ៉ាងណា អង្គការ Greenpeace បានលើកឡើងថា វានៅចំណុចខ្វះចន្លោះច្រើន ព្រោះវាមិនមានពាក់ព័ន្ធទៅនឹងទំនិញមួយចំនួនទៀត ដូចជា ពោត កៅស៊ូឡាតិច សាច់ជ្រូក និងសាច់សត្វស្លាប។ បន្ថែមពីនេះ គម្រោងច្បាប់នេះ រាប់តែព្រៃឈើមួយមុខ ដោយមិនបានរាប់បញ្ចូលទេ អំពីការបាត់បង់តំបន់ធម្មជាតិផ្សេងទៀត ដូចជាតំបន់ដីសណ្តរ តំបន់វាលទំនាបដីសើម តំបន់វាលស្មៅនិងព្រៃរបោះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ