ប្រទេសអឺរ៉ុបកាន់តែច្រើន ចាប់ផ្តើមបើកយុទ្ធនាការចាក់វ៉ាក់សាំងបង្ការកូវីដ ទៅលើកុមារ
បណ្តាប្រទេសអឺរ៉ុប កំពុងតែឆ្លងកាត់ សន្ទុះរលកឆ្លងរាលដាលកូវីដ យ៉ាងលឿនរហ័ស នាពេលបច្ចុប្បន្ននេះ។ កូវីដបំប្លែងខ្លួនអូមីក្រុង អាចនឹងឈានគ្របដណ្តប់ ក្លាយជាករណីឆ្លងថ្មីភាគច្រើននៅអឺរ៉ុបថែមទៀតផង។ ប្រឈមនឹងបញ្ហានេះ អាជ្ញាធរសុខាភិបាលប្រទេសអឺរ៉ុប កាន់តែច្រើន បានសម្រេចបើកយុទ្ធនាការចាក់វ៉ាក់សាំង ទៅលើកុមារ បន្ទាប់ពីបានសង្កេតឃើញថា កុមារគឺជាភ្នាក់ងារចម្លងកូវីដ ពីសាលារៀន ទៅកាន់សមាជិកគ្រួសារ ដោយមិនអាចប្រហែសបាន។
ចុះផ្សាយនៅថ្ងៃ៖
ស្តាប់ - ០២:៤៤
កាលពីថ្ងៃទី២៥វិច្ឆិកា ទីភ្នាក់ងារឱសថអឺរ៉ុប បានផ្តល់អាជ្ញាបណ្ណអនុញ្ញាត ឲ្យចាក់វ៉ាក់សាំងបង្ការកូវីដ១៩ ទៅលើកុមារ អាយុចន្លោះពី ៥ ទៅ ១១ ឆ្នាំ។ វ៉ាក់សាំងដែលអាចចាក់បាន គឺជាវ៉ាក់សាំង Pfizer ទម្រង់មួយទៀត ដែលមានលក្ខណៈស្រាលជាងវ៉ាក់សាំង ដែលចាក់ទៅលើមនុស្សធំ។ ក្រោយការសម្រេចនេះ ដាណឺម៉ាក និង អូទ្រីស បានចាប់ផ្តើមបើកយុទ្ធនាការចាក់ភ្លាមៗតែម្តង កាលពីសប្តាហ៍មុន។
នៅអាល្លឺម៉ង់ បើទោះបីជាពុំមានវិធានរួម ចេញដោយរដ្ឋាភិបាលរដ្ឋសហព័ន្ធ តែអាជ្ញាធរតំបន់មួយចំនួន ដូចជាតំបន់ក្រុងប៊ែរឡាំង និង តំបន់បាវីយែរ បានសម្រេចចិត្តបើកយុទ្ធនាការចាក់វ៉ាក់សាំងទៅលើកុមារ ចាប់ពីថ្ងៃពុធទី១៥ធ្នូនេះទៅ។ កុមារអាល្លឺម៉ង់ ដែលមានកម្រិតប្រឈមគ្រោះថ្នាក់ខ្ពស់ ឬ ក៏មានសមាជិកគ្រួសារ ដែលអាចបញ្ហាសុខភាពធ្ងន់ធ្ងរ នឹងត្រូវទទួលការចាក់វ៉ាក់សាំង ចំនួន២ដូស ក្នុងរវាងពី ៣ ទៅ ៦សប្តាហ៍។
ដូចគ្នាដែរ នៅហុងគ្រី ចាប់ពីថ្ងៃពុធនេះទៅ អាជ្ញាធរសុខាភិបាល បានចាប់ផ្តើមចាក់វ៉ាក់សាំង ទៅលើកុមារ អាយុចន្លោះពី ៥ ទៅ ១១ឆ្នាំ។ នៅក្រិកវិញ គ្រាន់តែក្នុងថ្ងៃពុធទី១៥ធ្នូ មានអាណាព្យាបាលចំនួន ២ម៉ឺននាក់ បានណាត់ជួបក្រុមជំនាញ ដើម្បីចាក់វ៉ាក់សាំងបង្ការកូវីដ ទៅឲ្យកូនខ្លួន។ នៅអេស្ប៉ាញ យុទ្ធនាការចាក់វ៉ាក់សាំងទៅលើកុមារ ក៏នឹងចាប់ផ្តើមដែរ។ រដ្ឋមន្ត្រីក្រសួងសុខាភិបាលអេស្ប៉ាញ បានលើកឡើងថា បច្ចុប្បន្ននេះកុមារអាយុក្រោម១២ឆ្នាំ គឺជាក្រុមមនុស្សដែលបានឆ្លងកូវីដ ច្រើនបំផុត។
ប្រទេសអឺរ៉ុបផ្សេងទៀត មានអ៊ីតាលី ប៉ូឡូញ និងប្រទេសតំបន់បាល់ទិកជាដើម នឹងចាប់ផ្តើមយុទ្ធនាការចាក់វ៉ាក់សាំង ទៅលើកុមារដែរ ក្នុងរវាងប៉ុន្មានថ្ងៃខាងមុខ ខណៈរដូវបុណ្យណូអែល កាន់តែខិតជិតមកដល់។ ដោយឡែកនៅបារាំង អាជ្ញាធរសុខាភិបាល បានអនុញ្ញាតឲ្យចាក់វ៉ាក់សាំង ទៅលើកុមារ តែក្នុងករណីកុមារនោះ អាចមានកម្រិតប្រឈមគ្រោះថ្នាក់ ធ្លាក់ខ្លួនឈឺធ្ងន់ ក្នុងករណីឆ្លងកូវីដ១៩ តែប៉ុណ្ណោះ។
គួរបញ្ជាក់ថា យោងតាមតួលេខរបស់អង្គការសុខភាពពិភពលោក កុមារ អាយុពី ៥ ទៅ ១៤ឆ្នាំ បានឆ្លងកូវីដ យ៉ាងច្រើនបំផុត នាពេលបច្ចុប្បន្ននេះ ដែលពេលខ្លះ គឺមានកម្រិតឆ្លងដល់ទៅ៣ដង លើមនុស្សធំ។ តែយ៉ាងណា ការចាក់វ៉ាក់សាំង ទៅលើកុមារ តែងពើបប្រទះនឹងគំនិតរិះគន់ប្រឆាំង ពីសំណាក់អាណាព្យាបាល និងអ្នកជំនាញខ្លះ។ ក្រៅពីប្រទេសអឺរ៉ុប បណ្តាប្រទេសផ្សេងទៀត បានចាប់ផ្តើមចាក់វ៉ាក់សាំងទៅលើកុមាររួចហើយ ដូចជានៅអាមេរិក កាណាដា អ៊ីស្រាអែលជាដើម។ នៅចិន ឈីលី អាហ្សង់ទីនជាដើម គេចាប់ចាក់ចាប់ពី អាយុចាប់ពី៣ឆ្នាំឡើងទៅ។ គិតត្រឹមថ្ងៃទី១៤ធ្នូ យោងតាមតួលេខផ្លូវការ បូកសរុបដោយទីភ្នាក់ងារព័ត៌មានបារាំង AFP កូវីដ១៩ បានសម្លាប់ជីវិតមនុស្ស ចំនួន ៥ ៣១១ ៩១៤ នាក់ហើយ នៅទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ