ណូវ៉ាវ៉ាក់ ថ្នាំបង្ការបែបបូរាណនឹងក្លាយជាវ៉ាក់សាំងប្រឆាំងកូវីដទី៥ នៅអឺរ៉ុប ?
ទីភ្នាក់ងារឱសថអឺរ៉ុប បានផ្តល់សេចក្តីសម្រេចនៅថ្ងៃចន្ទទី ២០ ធ្នូ ២០២១ នេះ ចំពោះសំណើសុំធ្វើចរាចរណ៍ថ្នាំបង្ការកូវីដរបស់ក្រុមហ៊ុនអាមេរិក ណូវ៉ាវ៉ាក់។ អ្នកមិនចង់ចាក់វ៉ាក់សាំងពីមុនអាចនឹងប្តូរចិត្ត ព្រោះបើតាមមន្ទីរពិសោធន៍ ថ្នាំបង្ការនេះផលិតឡើងដោយប្រើបច្ចេកវិទ្យាដ៏ចំណាស់ ដែលពិភពលោកបានស្គាល់ និងប្រើរាប់ទសវត្សរ៍មកហើយ។
ចុះផ្សាយនៅថ្ងៃ៖
ស្តាប់ - ០២:០៥
ទើបក្លាយជាថ្នាំបង្ការកូវីដរទី៥ នៅអឺរ៉ុប វ៉ាក់សាំងប្រឆាំងកូវីដរបស់ក្រុមហ៊ុនណូវ៉ាវ៉ាក់ មានទម្រង់ដូចជាថ្នាំបង្ការជំងឺកុមារជាច្រើនផ្សេងទៀតដែលពិភពលោកធ្លាប់បានប្រើប្រាស់យ៉ាងទូលំទូលាយ ពោលគឺផលិតឡើងដោយគ្មានវីរុសទេ តែដោយប្រើជាតិប្រូតេអ៊ីនជាមូលដ្ឋានគ្រឹះនៃថ្នាំ។ បច្ចេកវិទ្យាបែបនេះធ្លាប់មានប្រើសម្រាប់ផលិតថ្នាំបង្ការជំងឺរលាកថ្លើមប្រភេទបេ និងថ្នាំបង្ការជំងឺក្អកមាន់។
គ្រប់វ៉ាក់សាំងសុទ្ធតែទៅបង្ហាត់បង្រៀនប្រព័ន្ធភាពស៊ាំរបស់មនុស្សឱ្យចេះតតាំងនឹងកូរ៉ូណាវីរុស តែដោយប្រើវិធីផ្សេងគ្នា។ Pfizerនិង Moderna ប្រើបច្ចេកវិទ្យាទំនើបថ្មី ARNm ដែលជាមូលេគុលមានសារបញ្ជាឱ្យកោសិកាត្រូវផលិតប្រព័ន្ធការពារខ្លួនទល់នឹងជំងឺ។ AstraZeneca Johnson & Johnson យកវីរុសមកដកពិស បន្សាបរហូតលែងមានលទ្ធភាពបង្កជំងឺ មកធ្វើជាថ្នាំបង្ការបង្ហាត់សរីរាង្គឱ្យចេះតតាំងនឹងកូវីដ១៩។ ចំណែកណូវ៉ាវ៉ាក់ ផលិតបំបែកដ៏តូចមួយនៃប្រូតេអ៊ីន spike រកឃើញនៅលើផ្ទៃនៃមេរោគកូរ៉ូណា ក្នុងមន្ទីរពិសោធន៍ មកធ្វើជាថ្នាំចាក់ដាស់ប្រព័ន្ធការពារខ្លួនឱ្យបញ្ចេញប្រតិកម្មទប់ទល់ និងវាយប្រហារភ្លាមនៅពេលមានមេរោគកូវីដ១៩ឆ្លងចូល។
ចំពោះប្រសិទ្ធភាពនៃថ្នាំវិញ បើតាមលទ្ធផលនៃការសាកល្បងគ្លីនិក ចេញផ្សាយកាលពីខែមិថុនា២០២១ ថ្នាំបង្ការណូវ៉ាវ៉ាក់ មានប្រសិទ្ធភាពប្រឆាំងនឹងជំងឺបានដល់ទៅ ៩០,៤% និងមានប្រសិទ្ធភាពទប់ស្កាត់ទម្រង់ធ្ងន់ និងមធ្យមនៃជំងឺកូវីដ១៩បាន១០០%។
ដូច្នេះថ្នាំបង្ការរបស់ណូវ៉ាវ៉ាក់ នឹងមានសក្តានុពលខ្ពស់ខ្លាំង អាចជំនះឧបសគ្គជាច្រើនក្នុងយុទ្ធនាការចាក់ថ្នាំបង្ការកំរិតពិភពលោក ជាពិសេសឧបសគ្គនៃការចែកចាយ ដោយថ្នាំមិនត្រូវការសីតុណ្ហភាពត្រជាក់ខ្លាំង ដូចថ្នាំរបស់ក្រុមហ៊ុនផ្សេងផង និងអាចឈ្នះចិត្តអ្នកស្ទាក់ស្ទើរមិនចង់ចាក់វ៉ាក់សាំងផង ព្រោះថ្នាំប្រើបច្ចេកវិទ្យាចំណាស់ និងគ្មានវីរុស។
ក្នុងពេលរង់ចាំសេចក្តីសម្រេចរបស់ទីភ្នាក់ងារឱសថអឺរ៉ុប គណៈកម្មការអឺរ៉ុបបានចុះកិច្ចសន្យា ត្រៀមទុកជាមុន បញ្ជាទិញ ថ្នាំបង្ការចំនួន២០០លានដូស។ ឥណ្ឌូណេស៊ី និងហ្វីលីពីន បានអនុញ្ញាតឱ្យប្រើវ៉ាក់សាំងរបស់ណូវ៉ាវ៉ាក់រួចហើយ។ ចំណែកជប៉ុនក៏ព្រមទិញវ៉ាក់សាំងដល់ទៅ១៥០លានដូសដែរ។
មន្ទីរពិសោធន៍ណូវ៉ាវ៉ាក់ បានប្រកាសទៀតថាកំពុងវាយតម្លៃប្រសិទ្ធភាពថ្នាំរបស់ខ្លួនទល់នឹងអូមីក្រុង និងកំពុងសម្របវ៉ាក់សាំងសម្រាប់ប្រឆាំងនឹងមេរោគកូវីដបំប្លែងខ្លួនអូមីក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ