ប្រធានាធិបតីបារាំង និងនាយករដ្ឋមន្ត្រីអ៊ីតាលី អំពាវនាវឲ្យអឺរ៉ុបធ្វើកំណែទម្រង់ បន្ធូរបន្ថយវិធានច្បាប់ថវិកា
លោកអេម៉ានុយអែល ម៉ាក្រុង ប្រធានាធិបតីបារាំង និងលោក ម៉ារីយ៉ូ ដ្រាហ្គី នាយករដ្ឋមន្ត្រីអ៊ីតាលី បានរួមគ្នា អំពាវនាវ ស្នើសុំឲ្យសហភាពអឺរ៉ុប ធ្វើកំណែទម្រង់ បន្ធូរបន្ថយវិធានច្បាប់ថវិកាកុំឲ្យតឹងតែងពេក។ មេដឹកនាំបារាំង និងអ៊ីតាលី អះអាងថា ក្នុងកំឡុងពេលវិបត្តិកូវីដ រដ្ឋាភិបាលគ្មានជំរើសផ្សេងក្រៅពីបញ្ចេញប្រាក់ចំណាយ ដើម្បីជួយជីវភាព និងសេដ្ឋកិច្ចនោះទេ ហើយដែលប្រការនេះ វាធ្វើឲ្យប៉ោងតួលេខបំណុលសាធារណៈ ដោយមិនអាចចៀសបាន។
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងអត្ថបទមួយ ចុះផ្សាយដោយកាសែត The Financial Times លោកអេម៉ានុយអែល ម៉ាក្រុង និងលោក ម៉ារីយ៉ូ ដ្រាហ្គី បានរួមគ្នាអំពាវនាវ ឲ្យមានការធ្វើកំណែទម្រង់ វិធានច្បាប់ថវិកា នៅក្នុងក្របខណ្ឌសហភាពអឺរ៉ុប។ ជាកំណែទម្រង់ ដែលមេដឹកនាំទាំង២នាក់ ប្រាថ្នាចង់ឲ្យឈានទៅបន្ធូរបន្ថយកុំតឹងតែងពេក ព្រមទាំងត្រូវផ្តោតអាទិភាព ទៅដល់ការវិនិយោគចាំបាច់ ក្នុងបរិបទវិបត្តិអាកាសធាតុ និងពង្រឹងអធិបតេយ្យភាពសេដ្ឋកិច្ចរបស់អឺរ៉ុប។
មេដឹកនាំបារាំង និងអ៊ីតាលី បានលើកឡើងថា វិបត្តិកូវីដប្រមាណជិត២ឆ្នាំមកនេះ បានតម្រូវឲ្យរដ្ឋាភិបាល ត្រូវតែអនុវត្តគោលនយោបាយ ជួយសហគ្រាស ក្រុមហ៊ុន ជំនួញផ្សេងៗ ព្រមទាំងជួយដល់ជីវភាពប្រជាពលរដ្ឋ។ គោលនយោបាយទាំងនេះ គឺធ្វើឲ្យប្រទេសសមាជិកអឺរ៉ុប មានបំណុលសាធារណៈកើនឡើងខ្លាំង លើសពីកម្រិតអតិបរមា កំណត់ដោយវិធានច្បាប់ថវិកាអឺរ៉ុប។ វិបត្តិកូវីដ ក៏បានបង្ហាញឲ្យឃើញផងដែរ នូវចំណុចខ្សោយរបស់សេដ្ឋកិច្ចអឺរ៉ុប ដោយសារតែបញ្ហាខ្វះវត្ថុធាតុដើមមកពីបរទេស និងរំពឹងលើទំនិញនាំចូលខ្លាំងពេក។
លោកប្រធានាធិបតីបារាំង និង លោកនាយករដ្ឋមន្ត្រីអ៊ីតាលី បានអះអាងថា ជាការពិតណាស់ដែលគ្រប់គ្នាចង់កាត់បន្ថយ កម្រិតបំណុល។ ក៏ប៉ុន្តែ សម្រាប់កាលៈទេសៈនេះគឺគេមិនអាច ទៅដំឡើងពន្ធពីប្រជាពលរដ្ឋ ឬកាត់បន្ថយការចំណាយលើសេវាសាធារណៈបានទេ។ ដូច្នេះ អឺរ៉ុបត្រូវតែធ្វើកំណែទម្រង់ វិធានច្បាប់ថវិកា ដើម្បីបើកសិទ្ធិ ឲ្យប្រទេសសមាជិក មានលទ្ធភាពធំទូលាយ ក្នុងការវិនិយោគលើវិស័យចាំបាច់ឲ្យបានច្រើន ដើម្បីធានាការពារសុខមាលភាពសង្គម និងការរីកចម្រើនយូរអង្វែង សម្រាប់ក្មេងជំនាន់ក្រោយ។
គួរបញ្ជាក់ថា យោងតាមការអះអាង របស់វិមានអេលីហ្សេបារាំង គឺលិខិតប្រកាសរួមគ្នា របស់លោកប្រធានាធិបតីបារាំង និងនាយករដ្ឋមន្ត្រីអ៊ីតាលីនេះ បានបញ្ជូនទៅកាន់ថ្នាក់ដឹកនាំប្រទេសសមាជិកអឺរ៉ុប ឲ្យបានដឹងមុន មុននឹងចុះផ្សាយនៅលើទំព័រកាសែត។ តែយ៉ាងណា គោលជំហរចង់ឲ្យមានការបន្ធូរបន្ថយវិធានច្បាប់ថវិកាអឺរ៉ុបនេះ ត្រូវឆ្លងកាត់ការគាំទ្រជាចំបាច់ ពីសំណាក់រដ្ឋាភិបាលថ្មី របស់អាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ